(ສພຊ) ກອງປະຊຸມຝຶກອົບຮົມສ້າງຄວາມເຂັ້ມແຂງໃຫ້ແກ່ ສະມາຊິກສະພາປະຊາຊົນແຂວງ (ສສຂ) ແລະ ພະນັກງານ ທີ່ສັງກັດຢູ່ຄະນະກຳມະການເສດຖະກິດແຜນການແລະການເງິນ (ຄສຜງ) ໄດ້ອັດລົງດ້ວຍຜົນສຳເລັດຕາມແຜນທີ່ວາງໄວ້ ພາຍຫຼັງດຳເນີນ ມາເປັນເວລາ 2 ວັນ ເລີ່ມແຕ່ວັນທີ 9-10 ພຶດສະພາ 2022 ທີ່ສະໂມສອນຂອງເມືອງເລົ່າງາມ ແຂວງສາລະວັນ; ໂດຍການເປັນປະທານປິດກອງປະຊຸມຝຶກອົບຮົມຂອງທ່ານ ນາງ ສູນໄຖ ໄຊຍະແສງ ກຳມະການພັກແຂວງ ຮອງປະທານ ສະພາປະຊາຊົນແຂວງ (ສພຂ) ສາລະວັນ; ເຂົ້າຮ່ວມມີຄະນະປະຈໍາ ສພຂ, ຄະນະກຳມະການ, ຄະນະເລຂາທິການ, ຜູ້ປະສານງານໂຄງການ, ສສຂ ແລະ ພະນັກງານ ທີ່ສັງກັດຢູ່ ຄສຜງ, ມີຄູຝຶກວິທະຍາກອນຈາກສູນກາງ ແລະ ພາຍໃນແຂວງເຂົ້າຮ່ວມໃນຄັ້ງນີ້.

ກອງປະຊຸມຝຶກອົບຮົມດັ່ງກ່າວ ນັກສຳມະນາກອນ ໄດ້ຮັບຟັງບົດຮຽນໃນການຈັດກອງປະຊຸມຮູບແບບທາງໄກ ຈາກທ່ານ ປອ ສາຍທອງ ພົມມະວົງ ຮອງຫົວໜ້າກົມການເງິນ,ການທະນາຄານແລະການກວດສອບ ໃນບົດຮຽນກ່ຽວກັບ ການຕິດຕາມກວດກາແຜນງົບປະມານແລະແຜນພັດທະນາເສດຖະກິດ-ສັງຄົມ; ຝຶກແບບເຊິ່ງໜ້າ ໃນບົດຮຽນ ການຄົ້ນຄວ້າແຜນພັດທະນາເສດຖະກິດ-ສັງຄົມທີ່ຕິດພັນກັບບັນດາຄາດໝາຍມະຫາພາກ, ການຈັດສັນງົບປະມານແລະການລົງທຶນໃນຂົງເຂດເສດຖະກິດ; ບົດຮຽນ ຂະບວນການສ້າງແຜນການລົງທຶນຂັ້ນແຂວງປະຈໍາປີ ຈາກທ່ານ ບຸນລົມ ອິນສຸທາ ຮອງຫົວໜ້າພະແນກແຜນການແລະການລົງທຶນແຂວງ, ບົດຮຽນ ການພິຈາລະນາຮັບຮອງເອົາແຜນການລົງທຶນຂອງ ສພຂ ຈາກທ່ານ ສາຍສະໝອນ ອິນທິເສນ ປະທານ ຄສຜງ; ບົດຮຽນ ວິທີການຄິດໄລ່ລວມຍອດຜະລິດຕະພັນພາຍໃນ (GDP) ແລະ ການຄິດໄລ່ລວມຍອດລາຍໄດ້ແຫ່ງຊາດ (GIN) ຈາກທ່ານ ຄຳກິ່ງ ແກ້ວສຸພັນ ຮອງຫົວໜ້າພະແນກແຜນການແລະການລົງທຶນແຂວງ; ໃນວາລະ ບັນດານັກສຳມະນາກອນ ກໍ່ຍັງໄດ້ປະກອບຄຳເຫັນແລກປ່ຽນບົດຮຽນໃນແຕ່ລະຫົວຂໍ້ຕ່າງໆຢ່າງສ້າງສັນ ແລະ ກົງໄປກົງມາ ທີ່ຕິດພັນກັບໜ້າທີ່ການເມືອງຂອງແຕ່ລະພາກສ່ວນ; ຈາກນັ້ນ,ກໍ່ຍັງໄດ້ຮັບຟັງການເຜີຍແຜ່ມະຕິ ຂອງຄະນະປະຈໍາ ສພຂ ສະບັບເລກທີ 89/ຄຈສຂ.ສວ ລົງວັນທີ 23 ສິງຫາ 2021 ກ່ຽວກັບການ ຈັດຕັ້ງການເຄື່ອນໄຫວຂອງ ຄສຜງ ຕື່ມອີກ;

ນອກນັ້ນ,ກອງປະຊຸມຍັງໄດ້ຄົ້ນຄວ້າ, ແລກປ່ຽນ ແລະ ປະກອບຄຳຄິດຄຳເຫັນບົນພຶ້ນຖານຄວາມເປັນເອກະພາບ ເຂົ້າໃສ່ຮ່າງຂໍ້ຕົກລົງ ວ່າດ້ວຍ ກົນໄກການພົວພັນປະສານງານລະຫວ່າງ ຄສຜງ ກັບ ບັນດາພະແນກການທີ່ກ່ຽວຂ້ອງ ເຊິ່ງປະກອບມີ 2 ພາກ, 3 ໝວດ, 18 ມາດຕາ, ເຊິ່ງແນ່ໃສ່ໃຫ້ເນື້ອໃນຄົບຖ້ວນ, ສົມບູນ ແລະ ເທດເໝາະກັບສະພາບຄວາມເປັນຈິງໃນການຈັດຕັ້ງປະຕິບັດຂະບວນການພົວພັນປະສານງານໃຫ້ມີຄວາມໂລ່ງລ່ຽນ ແລະ ມີປະສິດທິພາບສູງ ຮອງຮັບໃຫ້ແກ່ວຽກງານຂອງ ສພຂ ທີ່ຈະຈັດກອງປະຊຸມສະໄໝສາມັນໃນແຕ່ລະຄັ້ງ.

ຕອນທ້າຍກອງປະຊຸມຝຶກອົບຮົມ ກໍ່ໄດ້ຮັບຟັງການໂອລົມຈາກ ທ່ານ ນາງ ສູນໄຖ ໄຊຍະແສງ ເຊິ່ງທ່ານໄດ້ກ່າວວ່າ: ເພື່ອເຮັດໃຫ້ເນື້ອໃນຈິດໃຈຂອງກອງປະຊຸມຝຶກອົບຮົມໃນຄັ້ງນີ້ບັນລຸຕາມຈຸດປະສົງ ແລະ ຄາດໝາຍຮຽກຮ້ອງໃຫ້ ນັກສຳມະນາກອນ ກໍ່ຄືບັນດາທ່ານ ສສຂ ແລະ ພະນັກງານ ທີ່ສັງກັດຢູ່ໃນ ຄສຜງ ຈົ່ງຍົກສູງຄວາມຮັບຜິດຊອບໃນພາລະບົດບາດໜ້າທີ່ການເມືອງຂອງຕົນ ນຳເອົາເນື້ອໃນຈິດໃຈ ບົດຮຽນທີ່ມີຄວາມໝາຍຄວາມສຳຄັນນີ້ ໄປຈັດຕັ້ງຜັນຂະຫຍາຍເຂົ້າສູ່ວຽກງານໃຫ້ເລິກເຊິ່ງ ແລະ ເປັນຮູບປະທຳ ທີ່ຈະເປັນຂີດໝາຍໜຶ່ງເພື່ອຮັບໃຊ້ໃຫ້ແກ່ສອງວາລະແຫ່ງຊາດ ໂດຍສະເພາະ ແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດແລະການເງິນ ໃຫ້ມີຜົນສຳເລັດໃນປີ 2023;

ກອງປະຊຸມຝຶກອົບຮົມໃນຄັ້ງນີ້ໄດ້ຮັບການສະໜັບສະໜູນຈາກ ແຜນງານການມີສ່ວນຮ່ວມຂອງປະຊາຊົນຕໍ່ວຽກງານປົກຄອງທີ່ດີ ແລະ ການສ້າງລັດທີ່ປົກຄອງດ້ວຍກົດໝາຍ (ແຜນງານເຊກາ).

ຂ່າວ: ດີລຳພົນ ພົມມະຈັນ