(ສພຊ) – ທ່ານ ຈັນທະວົງ ແສນອາມາດມົນຕີ ຮອງປະທານກໍາມາທິການການຕ່າງປະເທດ ພ້ອມດ້ວຍຄະນະ ໄດ້ສຳເລັດການເຂົ້າຮ່ວມກອງປະຊຸມການຈັດຕັ້ງປະຕິບັດຂໍ້ແນະນຳຂອງອາຊຽນ ວ່າດ້ວຍການສົ່ງເສີມການລົງທຶນຢ່າງມີຄວາມຮັບຜິດຊອບໃນຂະແໜງການອາຫານ, ກະສິກໍາ ແລະ ປ່າໄມ້ (AIPA-FAO) ຄັ້ງທີ 3 ພາຍໃຕ້ຫົວຂໍ້ “ການນໍາລັດຖະສະພາ ແລະ ການເປັນຄູ່ຮ່ວມການລົງທຶນແບບຍືນຍົງ ໃນຂະແໜງການອາຫານ, ກະສິກໍາ ແລະ ປ່າໄມ້” ທີ່ຈັດຂຶ້ນໃນວັນທີ 10-13 ທັນວາ 2024 ທີ່ຈາກາຕາ, ປະເທດອິນໂດເນເຊຍ; ກ່າວເປີດກອງປະຊຸມຢ່າງເປັນທາງການໂດຍທ່ານ ນາງ ຊິຕິ ໂຣໄຊເມຣິຢັນຕີ ດາໂຕະ ຮາຈິ ອັບດຸນ ຣາມັນ (Siti Rozaimeriyanty Dato Haji Abdul Rahman) ເລຂາທິການໃຫຍ່ໄອປາ, ມີທ່ານ ນາງ ເທຣຸມິ ໂອນຸມະ (Terumi Onuma) ຜູ້ຮັບຜິດຊອບການລົງທຶນທາງດ້ານກະສິກຳຢ່າງມີຄວາມຮັບຜິດຊອບ ປະຈໍາອົງການ FAO ແລະ ສະມາຊິກລັດຖະສະພາຈາກບັນດາປະເທດສະມາຊິກອາຊຽນເຂົ້າຮ່ວມ.

ຈຸດປະສົງຕົ້ນຕໍຂອງກອງປະຊຸມດັ່ງກ່າວນີ້ ແມ່ນເພື່ອວາງພື້ນຖານສໍາລັບການນໍາໃຊ້ຂໍ້ແນະນໍາຂອງອາຊຽນ (ASEAN RAI) ໃຫ້ເປັນຂອບໃນການຈັດຕັ້ງປະຕິບັດ ໂດຍກໍານົດໃຫ້ບັນດາສະມາຊິກລັດຖະສະພາໄອປາ ຕິດຕາມກວດກາ, ຊຸກຍູ້ການຈັດຕັ້ງປະຕິບັດໃຫ້ມີຄວາມເຂັ້ມແຂງ ເພື່ອຕອບສະໜອງບັນດາສິ່ງທ້າທາຍຕ່າງໆທີ່ອາດຈະເກີດຂຶ້ນ ເຊິ່ງອາຊຽນໄດ້ຮັບຮອງເອົາຂໍ້ສະເໜີແນະການລົງທຶນຢ່າງມີຄວາມຮັບຜິດຊອບ ໃນຂະແໜງການອາຫານ, ກະສິກໍາ ແລະ ປ່າໄມ້ ASEAN RAI ໃນປີ 2018 ບັນດາຂໍ້ສະເໜີແນະດັ່ງກ່າວນີ້ ແນໃສ່ການສົ່ງເສີມການລົງທຶນຢ່າງມີຄວາມຮັບຜິດຊອບທີ່ມີຄວາມສອດຄ່ອງກັບຄໍາໝັ້ນສັນຍາວ່າດ້ວຍການຄໍ້າປະກັນດ້ານສະບຽງອາຫານ, ການຄຸ້ມຄອງຊັບພະຍາກອນທໍາມະຊາດແບບຍືນຍົງ ແລະ ການຮັບມືກັບການປ່ຽນແປງດິນຟ້າອາກາດ.

ກອງປະຊຸມ AIPA-FAO ຄັ້ງທີ 3 ໄດ້ສະເໜີພາບລວມ ແລະ ແຜນງານໃນຕໍ່ໜ້າຂອງບັນດາຂໍ້ແນະນໍາຂອງອາຊຽນ ວ່າດ້ວຍການລົງທຶນຢ່າງມີຄວາມຮັບຜິດຊອບ ໃນຂະແໜງອາຫານ, ກະສິກໍາ ແລະ ປ່າໄມ້ ASEAN RAI 2024-2030; ທົບທວນຄືນແຜນງານຕົ້ນຕໍຂອງອາຊຽນ; ການສ້າງຄວາມເຂັ້ມແຂງພາຍໃນພາກພື້ນ ໃນການຈັດຕັ້ງປະຕິບັດການລົງທຶນຢ່າງມີຄວາມຮັບຜິດຊອບ ໃນຂະແໜງອາຫານ, ກະສິກໍາ ແລະ ປ່າໄມ້. ນອກຈາກນັ້ນ, ຍັງໄດ້ພ້ອມກັນປຶກສາຫາລື, ແລກປ່ຽນຄໍາຄິດເຫັນກ່ຽວກັບຂອດການສົ່ງເສີມການຈັດຕັ້ງປະຕິບັດບັນດາຂໍ້ສະເໜີແນະດັ່ງກ່າວ, ພ້ອມທັງວາງທິດທາງໃນຕໍ່ໜ້າ ເພື່ອໃຫ້ບັນດາສະມາຊິກລັດຖະສະພາອາຊຽນ ມີຄວາມເຂົ້າໃຈແຈ້ງ ແລະ ສາມາດນໍາໃຊ້ບັນດາຂໍ້ແນະນໍາເຫຼົ່ານີ້ ຢ່າງມີປະສິດທິພາບ ແລະ ປະສິດທິຜົນສູງໃນພາກພື້ນອາຊຽນ.