(ສພຊ) – ລະຫວ່າງວັນທີ 04-07 ພະຈິກ 2024 ທ່ານ ສຈ. ປອ. ຫົງຄຳ ສຸວັນນະວົງ ກຳມະການຂອງກຳມາທິການການຕ່າງປະເທດ ແລະ ກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ຕາງໜ້າໃຫ້ສະພາແຫ່ງຊາດລາວ ແລະ ໃນນາມເປັນສະມາຊິກສະພາທີ່ປຶກສາອົງການ AAWC ພ້ອມດ້ວຍທ່ານເອກອັກຄະລັດຖະທູດ ແຫ່ງ ສປປ ລາວ ປະຈຳ ສ.ເກົາຫຼີ ໄດ້ເຂົ້າຮ່ວມກອງປະຊຸມໂຕະມົນສະພາທີ່ປຶກສາເລື່ອງພະຍາກອນອາກາດ ແລະ ນ້ຳ ຂອງສະພາແຫ່ງຊາດບັນດາປະເທດສະມາຊິກອາຊີ (The Asia National Assembly Water Consultative Board Round-Table) ທີ່ຈັດຂຶ້ນຢູ່ນະຄອນຫຼວງເຊອູນ, ສ.ເກົາຫຼີ ເຊິ່ງມີບັນດາປະເທດໃນຂົງເຂດເຂົ້າຮ່ວມ.

ກອງປະຊຸມຄັ້ງນີ້ ໄດ້ປຶກສາຫາລື ແລະ ແລກປ່ຽນຄວາມຄິດເຫັນບັນຫາທີ່ກະທົບຂອງແຕ່ລະປະເທດ, ຜົນກະ ທົບຕໍ່ການດຳລົງຊີວິດຂອງປະຊາຊົນ, ການຄຸ້ມຄອງນ້ຳທາງດ້ານກົດໝາຍ ແລະ ນິຕິກຳຕ່າງໆ, ບັນຫາຄຸ້ມຄອງການບໍລິຫານນ້ຳ, ແລກປ່ຽນປະສົບ ການ ແລະ ວິທີການແກ້ໄຂບັນຫານໍ້າຂອງແຕ່ລະປະເທດ, ການແລກປ່ຽນປະສົບການ, ບັນຫາການຮ່ວມມືລະຫວ່າງປະເທດໃນຂົງເຂດ ເພື່ອການນຳໃຊ້ຊັບພະຍາກອນນໍ້າຮ່ວມກັນ, ການແກ້ໄຂບັນຫາພະຍາ ກອນອາກາດ ແລະ ບັນຫານ້ຳແບບຍືນຍົງ.

ຄະນະຜູ້ແທນສະພາແຫ່ງຊາດລາວ ໄດ້ປະກອບຄຳເຫັນກ່ຽວກັບການຄົ້ນຄວ້ານະ ໂຍບາຍກ່ຽວກັບນ້ຳ, ພາລະບົດບາດ ແລະ ການຊ່ວຍເຫຼືອຂອງອົງການຕ່າງໆຂອງ ສ.ເກົາ ຫຼີ ໃນປະເທດຕ່າງໆ, ວິທີການບໍລິຫານ ແລະ ນຳໃຊ້ຮ່ວມກັນຂອງພະຍາກອນອາກາດ ແລະ ນ້ຳ, ການແລກປ່ຽນປະສົບການຂອງແຕ່ລະປະເທດ, ການລາຍງານຂອງອົງການຕ່າງ ໆຂອງ ສ.ເກົາຫຼີ ແລະ ການສະເໜີໂຄງການຂອງແຕ່ລະປະເທດ; ນອກຈາກນັ້ນ, ຍັງໄດ້ໄປຢ້ຽມຢາມໂຄງການຕ່າງໆເຊັ່ນ: ໂຄງການເຂື່ອນໄຟຟ້າ, ໂຄງການລະບົບການຄຸ້ມຄອງນໍ້າໂດຍລະບົບປັນຍາປະດິດ (ເອໄອ), ໂຄງການພັດທະນາສິ່ງແວດລ້ອມຄົບວົງຈອນ ແລະ ໂຄງການພັດທະນາຕົວເມືອງໃໝ່ສີຂຽວ.