ຖ້າຈຳບໍ່ຜິດ, ປີທ່ອງທ່ຽວລາວທີ່ກຳນົດໃສ່ປີ 2024 ນີ້ ເປັນຄັ້ງທີ 3 ຄັ້ງທີ 1 ແມ່ນ 1999-2000, ຄັ້ງທີ 2 ຄົງແມ່ນປີທີ່ພວກເຮົາຈັດກອງປະຊຸມສຸດຍອດອາຊຽນ, 2016. ປີ 2024 ຈະເປັນປີທີ່ລາວພວກເຮົາໄດ້ຮັບກຽດເປັນເຈົ້າພາບກອງປະຊຸມ ອາຊຽນ ເຊິ່ງກວມເອົາ ທັງກອງປະຊຸມສຸດຍອດ, ກອງປະຊຸມລັດຖະມົນຕີການຕ່າງປະເທດ ແລະ ກະຊວງຂະແໜງການທີ່ປິ່ນອ້ອມ 3 ເສົາຄໍ້າຂອງ ອາຊຽນຄື ດ້ານຄວາມໝັ້ນຄົງ, ເສດຖະກິດ ແລະ ສັງຄົມ-ວັດທະນະທຳ.

ເພື່ອເປັນບົດຮຽນແຮໄວ້ ສຳລັບປີທ່ອງທ່ຽວ, ຜູ້ຂຽນຂໍຈັດສັນກັ່ນຕອງເອົາບາງບົດຮຽນເດັດໆຂອງບາງປະເທດ ກ່ຽວກັບການພັດທະນາອຸດສາຫະກຳທ່ອງທ່ຽວ. ແຕ່ລະບົດຮຽນຈະຄັດເຂົ້າສັ້ນໆ ເອົາແຕ່ຕັບແຕ່ບີຂອງມັນ. ຂໍ້ມູນທັງໝົດທີ່ຊິເວົ້າສູ່ຟັງນີ້ ໄດ້ມາຈາກ ໜັງສືພິມ ຕ່າງປະເທດ ແລະ ໜັງສືພິມພາຍໃນຂອງພວກເຮົາແຕ່ປີ 2015 ມາຮອດປັດຈຸບັນ. ຂໍສະເໜີໄປເປັນແຕ່ລະປະເທດດັ່ງນີ້:

ກຳປູເຈຍ: ບົດຮຽນທີ່ຄວນພິຈາລະນາຖອດຖອນຈາກກຳປູເຈຍກໍຄືເລື່ອງມາດຕະການຄຸ້ມຄອງ ແລະ ຄວບຄຸມການເຄື່ອນໄຫວຂອງ ບັນດາຜູ້ນຳທ່ຽວໃຫ້ຢູ່ຂອບຂອງກົດໝາຍ, ປ້ອງກັນບໍ່ໃຫ້ມີຜູ້ນຳທ່ຽວເຖື່ອນ, ຊອກຍາດອາຊີບຜູ້ນຳທ່ຽວພາຍໃນທີ່ຈົດທະບຽນ ແລະ ເຄື່ອນໄຫວຖືກຕ້ອງຕາມກົດໝາຍແທ້ໆ. ໃນສອງ-ສາມປີຜ່ານມານີ້, ບັນດາຜູ້ນຳທ່ຽວເຖື່ອນໄດ້ເພີ່ມຈຳນວນຂຶ້ນປານດອກເຫັດຢູ່ກຳປູເຈຍ. ຜູ້ນຳທ່ຽວຜິດກົດໝາຍເຫຼົ່ານີ້ ແມ່ນຄົນຕ່າງປະເທດທີ່ອາໄສຢູ່ກຳປູເຈຍ, ບາງຄົນກໍໄດ້ສິດຢູ່ແບບຖາວອນ, ບາງຄົນກໍໄດ້ສັນຊາດກຳປູເຈຍ, ຮູ້ພາສາ, ຮີດຄອງປະເພນີກຳປູເຈຍເປັນຢ່າງດີ. ເວລາມີນັກທ່ອງທ່ຽວຈາກປະເທດກຳເນີດຂອງພວກຕົນເຂົ້າໄປກຳປູເຈຍ, ພວກນຳທ່ຽວເຫຼົ່ານີ້ ກໍຈະລັດຄີວໃຫ້ບໍລິການນຳທ່ຽວ ຫຼື ແປພາສາດ້ວຍ ລາຄາທີ່ຖືກກວ່າ (ເພາະບໍ່ໄດ້ລົງຈົດທະບຽນ) ດັ່ງນັ້ນ, ພວກເຂົາຈຶ່ງໄດ້ປຽບທັງຂຶ້ນທັງລ່ອງ. ນອກຈາກນັ້ນ ນັກທ່ອງທ່ຽວເປັນກຸ່ມໃຫຍ່ຈາກບາງປະເທດ ກໍມັກຈະເອົາຜູ້ນຳທ່ຽວຂອງຕົນເອງມາພ້ອມ. ໃນທີ່ສຸດ ທາງ ກຳປູເຈຍກໍອອກກົດລະບຽບໄມ້ຕາຍເພື່ອເອົາຜິດຜູ້ນຳທ່ຽວເຖື່ອນເຫຼົ່ານີ້ ພ້ອມທັງຮຽກຮ້ອງໃຫ້ທົ່ວສັງຄົມ ເປັນຫູເປັນຕາ ຕິດຕາມຄົນຕ່າງປະເທດທີ່ອາໄສຢູ່ກຳປູເຈຍເປັນເວລາດົນນານ ເພື່ອບໍ່ໃຫ້ພວກເຂົາລັກລອບໃຫ້ບໍລິການແປພາສາ ຫຼື ນຳທ່ຽວເດັດຂາດ.

ຫວຽດນາມ: ເມື່ອສອງປີຜ່ານມາມີຂ່າວວ່າ ທາງການຫວຽດນາມ ໄດ້ອອກລະບຽບການ ບັງຄັບໃຫ້ຜູ້ນຳທ່ຽວ, ຜູ້ແປພາສາໃຫ້ນັກທ່ອງທ່ຽວ ຕ້ອງຈົດທະບຽນກັບຫ້ອງການທ່ອງທ່ຽວທາງການ ຫຼື ກັບ ບໍລິສັດ ທ່ອງທ່ຽວ ທີ່ໄດ້ທະບຽນຖືກຕ້ອງຕາມກົດໝາຍ ທັງນີ້ກໍເພື່ອກຳຈັດພວກເຄື່ອນໄຫວເຖື່ອນ, ໃຜບໍ່ຈົດທະບຽນກໍຈະຖືກຕັດສິດເຄື່ອນໄຫວ. ລະບຽບການນີ້ໃນເບື້ອງຕົ້ນກໍພົບກັບກະແສຄັດຄ້ານ ໂດຍມີການອ້າງວ່າ ຈະເຮັດໃຫ້ຜູ້ນຳທ່ຽວຈຳນວນຫຼວງຫຼາຍຕົກງານແຕ່ທາງການຫວຽດນາມບໍ່ສົນ, ລະບຽບເປັນລະບຽບ. ການຈົດທະບຽນຈະຊ່ວຍໃຫ້ທາງການ ຄຸ້ມຄອງຜູ້ນຳທ່ຽວໄດ້ດີ ແລະ ທົ່ວເຖິງ.

ສປຈີນ: ເມື່ອປະມານ 5 ປີຜ່ານມາ ທາງການຈີນໄດ້ອອກກົດລະບຽບເຫຼັກ ເພື່ອຄຸ້ມຄອງຜູ້ນຳທ່ຽວໃຫ້ຖືກຕ້ອງຕາມກົດໝາຍທ່ອງທ່ຽວ ແລະ ຈັນຍາບັນໃນອາຊີບ ໂດຍໄດ້ກຳນົດຂໍ້ຫ້າມຫຼາຍຂໍ້ເຊັ່ນ: ຫ້າມຕົ້ມຕຸ໋ນຂູດຮີດເງິນນັກທ່ອງທ່ຽວ, ຫ້າມຕີຄໍເຂົ້າກັບຮ້ານຄ້າ-ຮ້ານອາຫານ ເພື່ອຜູກຂາດໃຫ້ນັກທ່ອງທ່ຽວໃຊ້ບໍລິການສະເພາະ, ຫ້າມຊັກຊວນນັກທ່ອງທ່ຽວເຮັດໂລໆເລໆ ທີ່ພົວພັນກັບຄວາມໝັ້ນຄົງຂອງຊາດ, ຢາເສບຕິດ, ໂສເພນີ, ການລັກລອບຊື້ຂາຍບູຮານນະຄະດີ ທາງປະຫວັດສາດ ແລະ ວັດທະນະທຳ ແລະ ອື່ນໆ (ເຊີນຕິດຕາມເລື່ອງຂໍ້ຫ້າມສຳລັບນັກທ່ອງທ່ຽວໃນວັນຈັນໜ້າ).