ໃນຕອນເຊົ້າ ຂອງວັນທີ 12 ມີນາ 2024 ນີ້, ສະພາປະຊາຊົນແຂວງໄຊສົມບູນ ໄດ້ເປີດກອງປະຊຸມຂຶ້ນ ໂດຍພາຍໃຕ້ການເປັນປະທານ ຂອງທ່ານ ນາງ ຂັນກາບ ໄຊຍະກຸມມານ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 18, ຄະນະປະຈໍາ ແລະ ພ້ອມທັງເປັນເລຂາທິການສະພາປະຊາຊົນແຂວງ; ເຂົ້າຮ່ວມມີ ຄະນະຕາງໜ້າຈາກພະແນກພາຍໃນແຂວງ, ມີທ່ານ ສົມດີ ຈັນທະວົງ ຄະນະປະຈໍາ, ສສຂ ປະຈໍາເຂດເລືອກຕັ້ງ ເມືອງທ່າໂທມ, ປະທານຄະນະກໍາມະການວັດທະນະທໍາ-ສັງຄົມ ແລະບັນດາເຜົ່າ ມີ ທ່ານ ບີ ເຮີ່ ແລະ ທ່ານ ຢີຊົ່ງ ຕົ່ງເລັ່ງ ຮອງເລຂາທິການ ຕະຫຼອດຮອດ ບັນດາ ຫົວໜ້າ, ຮອງຫົວໜ້າຂະແໜງການຕ່າງໆ ພາຍໃນສະພາປະຊາຊົນແຂວງໄຊສົມບູນ ເຂົ້າຮ່ວມຢ່າງພ້ອມພຽງ.

ໃນໂອກາດນີ້, ທ່ານ ນາງ ຂັນກາບ ໄຊຍະກຸມມານ ປະທານກອງປະຊຸມ ໄດ້ກ່າວຈຸດປະສົງໃຫ້ຮູ້ວ່າ: ການເປີດກອງປະຊຸມຂຶ້ນໃນຄັ້ງນີ້ ແມ່ນປະຕິບັດຕາມພາລະບົດບາດ, ສິດ ແລະໜ້າທີ່ ຂອງກະຕິກາ ແລະລະບຽບການ ທີ່ພັກ-ລັດ ໄດ້ກໍານົດໄວ້ໃນກົດໝາຍຂອງລັດຖະກອນ ທີ່ຕ້ອງປຶກສາຫາລື ໃນການຈັດຕັ້ງປະຕິບັດວຽກງານ, ການປະສານງານ, ການບໍລິການຂອງ ບັນດາຂະແໜງການຕ່າງໆ ຂອງບັນດາພະແນກການ, ອົງການ, ກົມກອງ ທີ່ຕ້ອງໄດ້ເປີດກອງປະຊຸມຂຶ້ນ ແລະ ກໍານົດໜ້າວຽກໃນແຕ່ລະຂະແໜງຂອງຕົນ. ສ່ວນສະພາປະຊາຊົນແຂວງໄຊສົມບູນ ແມ່ນໄດ້ມອບໃຫ້ຄະນະກໍາມະການເສດຖະກິດແຜນການ ແລະການເງິນ ປັບປຸງພາລະບົດບາດການເຄື່ອນໄຫວຂອງຂະແໜງການຕົນ ໃຫ້ລະອຽດຈະແຈ້ງຂຶ້ນຕື່ມ; ຂະແໜງບໍລິຫານ-ການເງິນ ຕ້ອງວິໄຈ-ໄຈແຍກໜ້າວຽກຂອງຕົນ ໃຫ້ອອກເປັນ 3 ໜ້າວຽກໃຫຍ່; ແຕ່ງຕັ້ງຄະນະຮັບຜິດຊອບການຂຽນກໍານົດຕໍາແໜງງານ ແລະ ມອບວຽກງານການຂຽນກໍານົດຕໍາແໜງງານໃຫ້ ທ່ານ ຢີຊົ່ງ ຕົ່ງເລັ່ງ ຮອງເລຂາທິການສະພາປະຊາຊົນແຂວງ ເປັນຜູ້ຮັບຜິດຊອບ ແລະ ພົວພັນປະສານງານ ກັບບັນດາຄະນະກໍາມະການເພື່ອຄວາມລະອຽດອອນ, ຊອດຄ່ອງໃນການປະຕິບັດຈັດຕັ້ງ ແລະເພື່ອໃຫ້ແທດເໝາະກັບຄວາມເປັນຈິງ. ໃນເວລາດຽວກັນນີ້, ຜູ້ເຂົ້າຮ່ວມກອງປະຊຸມ ໄດ້ປະກອບຄໍາເຫັນກັນຢ່າງຄຶ້ກຄຶ້ນແບບກົງໄປກົງມາ ແລະທີ່ປະຊຸມໄດ້ຕົກລົງເຫັນດີເປັນເອກະພາບ ມອບໃຫ້ແຕ່ລະຂະແໜງການຕ່າງໆ ພາຍໃນສະພາປະຊາຊົນແຂວງ ເລີ່ມກໍານົດໜ້າວຽກຂອງຕົນ ໃຫ້ມີສະຖຽນລະພາບ ດັ່ງທີ່ກ່າວມາຂ້າງເທິງນີ້.

(ນາງ ອໍາໄພພອນ ແກ້ວວິໄລ)