(ສພຊ) – ເພື່ອປຶກສາຫາລື ແລະ ຮັບຟັງຄຳຄິດຄຳເຫັນເຊິ່ງກັນແລະກັນກ່ຽວກັບການປະສານງານ ແລະ ການປະຕິບັດໜ້າທີ່ຕາມພາລະບົດບາດ ໃນການຊຸກຍູ້ ແລະ ອຳນວຍຄວາມສະດວກໃຫ້ແກ່ການຈັດຕັ້ງປະຕິບັດແຜນງານຕ່າງໆຂອງອາຊຽນ ກໍຄືບັນດາມະຕິຂອງໄອປາ ໃຫ້ມີປະສິດທິພາບ ແລະ ບັນລຸຕາມຈຸດປະສົງລະດັບຄາດໝາຍ; ຕອນບ່າຍວັນທີ 19 ຕຸລານີ້ ທີ່ຫໍປະຊຸມແຫ່ງຊາດ ໄດ້ມີກອງປະຊຸມພົບປະປຶກສາຫາລືລະຫວ່າງກອງເລຂາໄອປາ ແລະ ກອງເລຂາອາຊຽນ ພາຍໃຕ້​ຫົວ​ຂໍ້: “ຊຸກຍູ້ການເຊື່ອມຈອດ ແລະ ການເຕີບໂຕແບບກວມລວມຂອງອາຊຽນ: ສົ່ງເສີມການພົບປະ, ການຮ່ວມມື ແລະ ການປຶກສາຫາລື ລະຫວ່າງໄອປາ ແລະ ອາຊຽນ”.

ທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ໄດ້ມີຄຳເຫັນວ່າ: ກອງປະຊຸມຄັ້ງນີ້ ຈະໄດ້ລົງເລິກກ່ຽວກັບການເພີ່ມທະວີການປະສານງານ, ການປຶກສາຫາລືລະຫວ່າງກອງເລຂາໄອປາ ແລະ ອາ​ຊຽນ ເພື່ອຮັບປະກັນການເຊື່ອມຈອດ ແລະ ການເຕີບໂຕແບບກວມລວມໃນພາກພື້ນ; ການປຶກສາຫາລືພາຍ​ໃຕ້​ຫົວ​ຂໍ້​ດັ່ງ​ກ່າວ ຈະ​ເປັນປະໂຫຍດຫຼາຍໃນການເສີມຂະຫຍາຍບົດບາດ ແລະ ໜ້າທີ່ຂອງສອງອົງການໃຫ້ມີປະສິດທິພາບກວ່າເກົ່າ ປະກອບ ສ່ວນເຂົ້າໃນການຊຸກຍູ້ບົດບາດການເປັນແກນກາງຂອງອາ​ຊຽນ, ສົ່ງເສີມການມີສ່ວນຮ່ວມຂອງປະຊາຊົນໃຫ້ຫຼາຍຂຶ້ນ ເພື່ອບັນລຸວິໄສທັດການສ້າງ​ປະຊາຄົມອາຊຽນ 2025 ແລະ ໄລຍະຕໍ່ໜ້າ. ອາຊຽນ-ໄອປາ ໄດ້ມີການຮ່ວມມື, ຕິດຕໍ່ພົວພັນ ແລະ ປະສານງານເຊິ່ງກັນແລະກັນ ໃນຖານະເປັນຄູ່ຮ່ວມມືຜ່ານກົົນໄກການຈັດກອງປະຊຸມລະຫວ່າງຜູ້ນຳອາຊຽນ-ໄອປາ ແລະ ກອງປະຊຸມປຶກສາຫາລືລະຫວ່າງເລຂາທິການໃຫຍ່ຂອງອາຊຽນ ແລະ ໄອປາ ໄດ້ປະສົບຜົນສໍາເລັດຫຼາຍດ້ານ; ເຖິງຢ່າງໃດກໍຕາມ, ເພື່ອຕອບສະໜອງກັບຄວາມຮຽກຮ້ອງຕ້ອງການ ແລະ ຮັບມືກັບສິ່ງທ້າທາຍຕ່າງໆທີ່ພວມປະເຊີນໜ້າຢູ່ໃນປັດຈຸບັນ ກໍຄືໃນອະນາຄົດ ແລະ ເພື່ອເຮັດໃຫ້ວຽກງານຂອງລັດຖະບານມີການເກາະກ່າຍກະທົບເຊິ່ງກັນແລະກັນ ກໍຄືການປະສານງານກັບວຽກງານນິຕິບັນຍັດໃຫ້ກົມກຽວນັ້ນ, ຍິ່ງຕ້ອງເພີ່ມທະວີການພົວພັນຮ່ວມມື ແລະ ການປຶກສາຫາລືໃຫ້ຫຼາຍຂຶ້ນ ເພື່ອຮັບປະກັນໃຫ້ແກ່ການພົວພັນຮ່ວມມືລະຫວ່າງລັດຖະບານ ແລະ ລັດຖະສະພາຂອງປະເທດອາຊຽນ ກໍຄືຄູ່ຮ່ວມມືຂອງອາຊຽນ-ໄອປາ ມີປະສິດທິພາບ ແລະ ປະສິດທິຜົນສູງຂຶ້ນ ແນໃສ່ປະຕິບັດຕາມທິດການເຊື່ອມຈອດ ແລະ ການເຕີບໂຕແບບກວມລວມຂອງອາຊຽນ.

ໃນກອງປະຊຸມ, ກອງເລຂາໄອປາ, ກອງເລຂາອາຊຽນ ແລະ ລັດຖະສະພາສະມາຊິກໄອປາ ໄດ້ຮ່ວມກັນຕີລາຄາຄືນກ່ຽວກັບກົນໄກ ແລະ ວິທີການຕ່າງໆໃນການພົວພັນປະສານງານໃຫ້ມີປະສິດທິພາບສູງກວ່າເກົ່າ, ພ້ອມກັນຈັດຕັ້ງປະຕິບັດວິໄສທັດປະຊາຄົມອາຊຽນ 2025 ແລະ ຫຼັງປີ 2025 ກໍຄືສົ່ງເສີມປະຊາຄົມອາຊຽນໃຫ້ມີການເຊື່ອມໂຍງ ແລະ ເຊື່ອມຈອດຢ່າງເປັນຮູບປະທຳ.

(ນາງ ອາລິນ ສຸພິມມະປະດິດ)