ກອງປະຊຸມປຶກສາຫາລືກ່ຽວກັບການກະກຽມ ແລະ ດໍາເນີນກອງປະຊຸມແລກປ່ຽນບົດຮຽນ ລະຫວ່າງ ສພຂ 04 ແຂວງ ພາກໃຕ້ ໄດ້ຈັດຂຶ້ນໃນຕອນເຊົ້າວັນທີ 27 ເມສາ 2023 ນີ້, ທີ່ຫ້ອງປະຊຸມທາງໄກ ສະພາປະຊາຊົນແຂວງ ເຊກອງ (ກອງປະຊຸມເຊິ່ງໜ້າ) ໂດຍການເປັນປະທານ ຂອງທ່ານ ນາງ ຄໍາໄພ ວິລະສານ ເລຂາທິການສະພາປະຊາຊົນແຂວງ ເຊກອງ, ມີບັນດາທ່ານ ເລຂາທິການ, ຮອງເລຂາທິການ ພ້ອມດ້ວຍຫົວໜ້າ ແລະ ຮອງຂະແໜງຄົ້ນຄວ້າ-ສັງລວມ ແລະ ຂໍ້ມູນຂ່າວສານ 04 ແຂວງພາກໃຕ້ (ຈໍາປາສັກ, ສາລະວັນ, ເຊກອງ ແລະ ອັດຕະປື) ເຂົ້າຮ່ວມ.          ໂດຍກອງປະຊຸມ ໄດ້ພ້ອມກັນຄົ້ນຄວ້າ, ປຶກສາຫາລືຫຼາຍບັນຫາ ກ່ຽວກັບການກະກຽມ ແລະ ດໍາເນີນກອງປະຊຸມແລກປ່ຽນບົດຮຽນ ລະຫວ່າງ ສພຂ 04 ແຂວງ ພາກໃຕ້ ໂດຍສະເພາະດ້ານຮູບແບບ ແລະ ວິທີການ, ການກໍານົດດ້ານເນື້ອໃນທີ່ຈະແລກປ່ຽນຖອດຖອນບົດຮຽນຮ່ວມກັນ, ການກໍານົດດ້ານກິດຈະກໍາ, ວັນ, ເວລາ ແລະ ເປົ້າໝາຍທີ່ຈະເຂົ້າຮ່ວມ.        ທັງນີ້, ກໍເພື່ອເປັນການຮັບປະກັນໃຫ້ແກ່ການກະກຽມຮອບດ້ານໃຫ້ແກ່ ກອງປະຊຸມແລກປ່ຽນບົດຮຽນ ລະຫວ່າງ ສພຂ 04 ແຂວງ ພາກໃຕ້ (ຈໍາປາສັກ, ສາລະວັນ, ເຊກອງ ແລະ ອັດຕະປື) ໃຫ້ໄດ້ຮັບຜົນສໍາເລັດຕາມຈຸດປະສົງ ແລະ ລະດັບຄາດໝາຍທີ່ວາງໄວ້ ແລະ ເປັນການແລກປ່ຽນຖອດຖອນບົດຮຽນເຊິ່ງກັນ ແລະ ກັນ ໃນການເຄື່ອນໄຫວຈັດຕັ້ງປະຕິບັດວຽກງານຂອງສະພາປະຊາຊົນແຂວງ 04 ແຂວງພາກໃຕ້ ໃນໄລຍະຜ່ານມາຕາມພາລະບົດບາດ, ສິດ ແລະ ໜ້າທີ່ ຂອງຕົນ ທີ່ໄດ້ກໍານົດໄວ້ໃນລັດຖະທໍາມະນູນ ແລະ ກົດໝາຍ ເພື່ອນໍາໄປເປັນບົດຮຽນຈັດຕັ້ງປະຕິບັດວຽກງານໃນຕໍ່ໜ້າໃຫ້ເກີດດອກອອກຜົນດີຂຶ້ນກວ່າເກົ່າ.             ຜ່ານການຄົ້ນຄວ້າ ແລະ ປຶກສາຫາລື ໃນກອງປະຊຸມ ໄດ້ຕົກລົງເຫັນດີເປັນເອກະພາບກັນ ຄາດວ່າກອງປະຊຸມດັ່ງກ່າວ ຈະໄດ້ດໍາເນີນໃນທ້າຍເດືອນ ສິງຫາ ຫາຕົ້ນເດືອນ ກັນຍາ ປີ 2023.

#ໂດຍ: ອາລົມດີ.