(ສພຊ) ວັນທີ 9 ກັນຍາ 2021, ທີ່ສະພາແຫ່ງຊາດນະຄອນຫລວງວຽງຈັນ ໄດ້ມີກອງປະຊຸມປຶກສາຫາລື ກ່ຽວກັບກົນໄກການແກ້ໄຂຄຳຮ້ອງຂໍຄວາມເປັນທຳ ເພື່ອກຳນົດເຂົ້າໃສ່ກົດໝາຍວ່າດ້ວຍການແກ້ໄຂຄຳຮ້ອງຂໍຄວາມເປັນທຳ ໂດຍການເປັນປະທານຂອງທ່ານ ຄຳແພງ ວິລະພັນ ປະທານກຳມາທິການຍຸຕິທຳ ສະພາແຫ່ງຊາດ; ເຂົ້າຮ່ວມມີບັນດາຮອງປະທານອົງການກວດກາແຫ່ງລັດ, ຮອງປະທານສານປະຊາຊົນສູງສຸດ, ຮອງລັດຖະມົນຕີ, ຮອງຫົວໜ້າຫ້ອງວ່າການສຳນັກນາຍົກລັດຖະມົນຕີ, ຮອງຫົວໜ້າຫ້ອງວ່າກາານສຳນັກງານປະທານປະເທດ ແລະ ຮອງປະທາກຳມາທິການກົດໝາຍ.

ໃນກອງປະຊຸມ, ຜູ້ເຂົ້າຮ່ວມໄດ້ປະກອບຄຳຄິດຄຳເຫັນເພື່ອປັບປຸງກົນໄກ, ວິທີການ ແລະ ແບບແຜນການພິຈາລະນາແກ້ໄຂຄຳຮ້ອງທຸກ ໃຫ້ຖືກຕ້ອງສອດຄ່ອງ ແລະ ຮັດກຸມ ໃນການຕິດຕາມກວດກາ, ຮັບແລະ ພິຈາລະນາຄຳຮ້ອງທຸກໃຫ້ສອດຄ່ອງຕາມພາລະບົດບາດ, ສິດ ແລະ ໜ້າທີ່ຂອງແຕ່ລະອົງການ ຕາມລັດຖະທຳມະນູນ ແລະ ກົດໝາຍ ທັງຮັບປະກັນໃຫ້ການປັບປຸງກົດໝາຍວ່າດ້ວຍ ການແກ້ໄຂຄຳຮ້ອງທຸກໃຫ້ສອດຄ່ອງຕາມເນື້ອໃນຈິດໃຈຂອງມະຕິຄະນະບໍລິຫານງານສູນກາງພັກປະຊາຊົນປະຕິວັດລາວ ສະບັບເລກທີ 037/ຄປສພ, ລົງວັນທີ 18 ມິຖຸນາ2018 ວ່າດ້ວຍການຍົກສູງປະສິດທິພາບການຄຸ້ມຄອງລັດ,ຄຸ້ມຄອງສັງຄົມດ້ວຍກົດໝາຍແລະ ມະຕິຂອງກົມການເມືອງສູນກາງພັກ ສະບັບເລກທີ 112/ກມສພ, ລົງວັນທີ 2 ມິຖຸນາ 2020 ວ່າດ້ວຍການຍົກສູງຄຸນນະພາບການດຳເນີນຄະດີຕາມຂະບວນຍຸຕິທຳ ແລະ ສາມາດໄດ້ຜ່ານໃນກອງປະຊຸມສະພາແຫ່ງຊາດ ໃນທ້າຍປີ 2022.

ທ່ານ ຄຳແພງ ວິລະພັນ ​ທ່ານ​ໃຫ້​ຮູ້ວ່າ: ໄລຍະແຕ່ທີ່​ມີ​ການປັບປຸງກົດໝາຍ ຄະນະປະຈຳສະພາແຫ່ງຊາດ ຕ້ອງໄດ້ປັບປຸງກົນໄກ, ວິທີການ ຕາມທິດຮັບ ແລະ ພິຈາລະນາຄໍາຮ້ອງຂໍຄວາມເປັນທຳ ໂດຍສົ່ງໃຫ້ພາກສ່ວນກ່ຽວຂ້ອງ ເປັນຜູ້ພິຈາລະນາແກ້ໄຂ ຕາມພາລະບົດບາດແລະ ຂັ້ນຕອນຂອງກົດໝາຍ; ສະພາແຫ່ງຊາດຈະເຮັດບົດບາດຕິດຕາມກວດກາ ໂດຍຈະໄດ້ກວດກາເບິ່ງເນື້ອໃນກົດໝາຍວ່າ ມີມາດຕາໃດຂັດກັບກົນໄກແລະ ວິທີການແລ້ວສະເໜີຂໍທິດຊີ້ນຳຈາກຄະນະປະຈຳສະພາແຫ່ງຊາດ ແລະ ກົມການເມືອງສູນກາງພັກ ເພື່ອຍົກເວັ້ນການນຳໃຊ້ບາງມາດຕາດັ່ງກ່າວ ແລະເຮັດທົດລອງ ໄລຍະ 6 ເດືອນຈາກນັ້ນ ສະຫລຸບຕີລາປະເມີນຜົນຄືນ.

(ນາງ ອາລິນ ສຸພິມມະປະດິດ)