(ສພຊ) – ປະຕິບັດຕາມແຜນການເຄື່ອນໄຫວວຽກງານຂອງຄະນະກໍາມະການລະດັບຊາດ ປັບປຸງລັດຖະທໍາມະນູນ ແຫ່ງ ສປປລາວ ສະບັບປີ 2015 (ຄລຊ) ແລະ ແຜນການເຄື່ອນໄຫວຂອງອະນຸກຳມະການເນື້ອໃນ; ວັນທີ 10 ກັນຍານີ້ ທີ່ສະພາແຫ່ງຊາດ (ສພຊ) ຄະນະກໍາມະການລະດັບຊາດ ໄດ້ຈັດກອງປະຊຸມປຶກສາຫາລືກ່ຽວກັບການປັບປຸງລັດຖະທຳມະນູນ ສະບັບປີ 2015 ໂດຍການເປັນປະທານຂອງທ່ານ ສຈ. ປອ. ກິແກ້ວ ໄຂຄຳພິທູນ ຮອງນາຍົກ ລັດຖະມົນຕີ, ຮອງປະທານ ຄລຊ ເຊິ່ງມີບັນດາທ່ານຄະນະກຳມະການ, ກອງເລຂາ ແລະ ອະນຸກຳມະການຕ່າງໆຂອງ ຄລຊ ເຂົ້າຮ່ວມຢ່າງພ້ອມພຽງ.
ກອງປະຊຸມໄດ້ຮັບຟັງການແຈ້ງຜົນຂອງກອງປະຊຸມກົມການເມືອງສູນກາງພັກ ໃນຄັ້ງວັນທີ 29 ສິງຫາ 2024 ໄດ້ມີທິດຊີ້ນໍາຕໍ່ການປັບປຸງລັດຖະທໍາມະນູນ ສະບັບປີ 2015; ຂໍ້ຕົກລົງສະບັບເລກທີ 88/ຄລຊ, ລົງວັນທີ 6 ກັນຍາ 2024 ກ່ຽວກັບການແບ່ງຄວາມຮັບຜິດຊອບໃນການປັບປຸງລັດຖະທໍາມະນູນ ສະບັບປີ 2015; ແລກປ່ຽນຄວາມເຫັນຕໍ່ທິດຊີ້ນໍາຂອງກົມການເມືອງສູນກາງພັກ, ບັນຫາສໍາຄັນທີ່ສັງລວມໄດ້ຈາກການປະເມີນການຈັດຕັ້ງປະຕິບັດລັດຖະທໍາມະນູນ ສະບັບປີ 2015 ແລະ ຮູບແບບການຄົ້ນຄວ້າເນື້ອໃນຂອງລັດຖະທຳມະນູນ.

   (ນາງ ກຸກກິກ ບຸດດາໄຊ)