(ສພຊ) ໃນຕອນເຊົ້າວັນທີ 20 ທັນວາ 2023 ທີ່ຫໍສະພາແຫ່ງຊາດ ໄດ້ຈັດກອງປະຊຸມປຶກສາຫາລືການກະກຽມງານສົມໂພດພຣະພຸດທະຮູບ ແລະ ງານແຫ່ພຣະພຸດທະຮູບ ໄປວັດລາວ ຢູ່ທີ່ນະຄອນຫຼວງພະນົມເປັນ ປະເທດກຳປູເຈຍ ໂດຍການເປັນປະທານຂອງທ່ານ ດຣ. ນາງ ວິພາວັນ ພົມວິຫານ ປະທານກອງທຶນຊ່ວຍເຫຼືອສັງຄົມສະພາແຫ່ງຊາດ, ເຂົ້າຮ່ວມມີຕາງໜ້າຈາກອົງການພຸດທະສາສະໜາສັມພັນ ແຫ່ງ ສປປລາວ, ຄະນະກອງທຶນ, ກອງເລຂາກອງທຶນ ພ້ອມດ້ວຍພະນັກງານວິຊາການ.

ກອງປະຊຸມ ໄດ້ແຕ່ງຕັ້ງຄະນະຮັບຜິດຊອບໃນງານສົມໂພດພຣະພຸດທະຮູບ ແລະ ງານແຫ່ພຣະພຸດທະຮູບ ໄປວັດລາວ ທີ່ຢູ່ນະຄອນຫຼວງພະນົມເປັນ ປະເທດກຳປູເຈຍ ເຊິ່ງຄາດຄະເນວ່າຈະຈັດຂຶ້ນໃນເດືອນມັງກອນ 2024 ນີ້. ຫຼັງຈາກນັ້ນ, ກອງປະຊຸມໄດ້ພ້ອມກັນປຶກສາຫາລື ແລະ ເປັນເອກະພາບກັນໃນໜ້າວຽກຕ່າງໆ ພ້ອມທັງຮັບຟັງການໃຫ້ທິດຊີ້ນຳຂອງປະທານກອງປະຊຸມ ເພື່ອເຮັດໃຫ້ງານສົມໂພດພຣະພຸດທະຮູບ ແລະ ງານແຫ່ພຣະພຸດທະຮູບ ປະສົບຜົນສໍາເລັດຢ່າງຈົບງາມ.

(ພາບ ແລະ ຂ່າວ: ກຸກກິກ ບຸດດາໄຊ)