ຂປລ. ໃນການຈັດຕັ້ງປະຕິບັດວຽກງານກວດຄົນ ເຂົ້າ-ອອກເມືອງ ແລະ ຄຸ້ມຄອງຄົນຕ່າງປະເທດ ຢູ່ ສປປ ລາວ ຂອງກະຊວງປ້ອງກັນຄວາມສະຫງົບ ໃນໜຶ່ງປີ 2019 ເຫັນວ່າມີບັນຊີບຸກຄົນຕ້ອງຫ້າມເຂົ້າ ສປປ ລາວ ທັງໝົດ 3.342 ຄົນ, ເພດຍິງ 433 ຄົນ, ມີ 79 ສັນຊາດ. ໃນນີ້, ຫ້າມເຂົ້າຖາວອນ 1.409 ຄົນ, ເພດຍິງ 176 ຄົນ, ມີ 17 ສັນຊາດ.
ທ່ານ ພົນໂທ ວິໄລ ຫລ້າຄຳຟອງ ລັດຖະມົນຕີ ກະຊວງປ້ອງກັນຄວາມສະຫງົບ ໄດ້ຊີ້ແຈງຕໍ່ຄຳຊັກຖາມຂອງສະມາຊິກສະພາແຫ່ງຊາດ ໃນວາລະການດໍາເນີນກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ VIII ໃນວັນທີ 13 ພະຈິກ 2019 ວ່າ: ພາຍຫລັງ ພັກ-ລັດຖະບານ ໄດ້ກຳນົດແນວທາງ ແລະ ນະໂຍບາຍ ເປີດປະຕູສູ່ໂລກພາຍນອກ ເພື່ອເປັນການຮ່ວມມືກັບຕ່າງປະເທດ ຖືວ່າຖືກຕ້ອງສອດຄ່ອງ ກັບສະພາບຄວາມເປັນຈິງຂອງປະເທດເຮົາ ແລະ ແທດເໝາະກັບສະພາບການສາກົນ, ພາກພື້ນເງື່ອນໄຂເຊືອມໂຍງ, ເຊື່ອມຈອດ ທັງໄດ້ຫັນແນວທາງເປັນກົດໝາຍ, ເປັນນິຕິກຳທີ່ເປັນບ່ອນອີງໃຫ້ແກ່ການປະຕິບັດວຽກງານ ຂອງແຕ່ລະຂົງເຂດຢ່າງຮັດກຸມ. ໜຶ່ງປີຜ່ານມາ ກະຊວງປ້ອງກັນຄວາມສະຫງົບ ໄດ້ເອົາໃຈໃສ່ອຳນວຍຄວາມສະດວກ, ຕິດຕາມກວດກາ ແລະ ຂຶ້ນທະບຽນຄຸ້ມຄອງ ນັບທັງຄົນລາວ ຄົນຕ່າງດ້າວ, ຄົນຕ່າງປະເທດ ແລະ ຄົນບໍ່ມີສັນຊາດ ທີ່ຜ່ານປະຕູດ່ານເຂົ້າ-ອອກ ສປປ ລາວ, ຈັດສັນຄວາມເປັນລະບຽບຮຽບຮ້ອຍ ໃນຂົງເຂດການທ່ອງທ່ຽວ ແລະ ອຳນວຍຄວາມສະດວກໃຫ້ແກ່ນັກທ່ອງທ່ຽວ ແນ່ໃສ່ຊອກຮູ້ ແລະ ສະກັດກັ້ນກຸ່ມຄົນບໍ່ຫວັງດີ, ພວກລະເມີດລະບຽບກົດໝາຍ ແລະ ພວກກໍ່ອາຊະຍາກຳຕ່າງໆ ທີ່ຈະເລັດລອດ ເຂົ້າ-ອອກ ແລະ ເຄື່ອນໄຫວກໍ່ຄວາມບໍ່ສະຫງົບ ທຳລາຍຄວາມເປັນລະບຽບຮຽບຮ້ອຍຂອງ ສປປ ລາວ.
ໃນປີ 2019 ມີຈຳນວນຄົນເຂົ້າເມືອງ 9.852.571 ເທື່ອຄົນ, ມີ 166 ສັນຊາດ ຫລາຍກວ່າໝູ່ແມ່ນສັນຊາດຈີນ 807.737 ເທື່ອຄົນ ແລະ ມີຄົນອອກເມືອງ 10.149.008 ເທື່ອຄົນ ມີ 103 ສັນຊາດ.