ແລະແລ້ວວັນເວລາກໍໝູນວຽນປ່ຽນໄປໃນທີ່ສຸດ ພວກເຮົາກໍກ້າວສູ່ປີໃໝ່ລາວ ຈ.ສ 1384; ພ.ສ 2565 ປີໃໝ່ລາວປີນີ້ ພັກຍາວຫາກລວມວັນເສົາ-ອາທິດເຂົ້າກໍເປັນ 5 ວັນພໍດີ.

          ​ພວກເຮົາສະຫຼອງປີໃໝ່ລາວປີນີ້ບໍ່ຄ່ອຍສະດວກສະບາຍເພາະການລະບາດຂອງພະຍາດໂຄວິດ-19 ມັນມາແຮງຫຼາຍ (ຮອບສາມ) ສະນັ້ນ, ຈະຕ້ອງພ້ອມກັນກຳແໜ້ນ ແລະ ເຊື່ອມຊຶມແຈ້ງການ ຕ່າງໆ ເປັນຕົ້ນແມ່ນ ແຈ້ງການຈາກຄະນະສະເພາະກິດຂັ້ນສູນກາງ ເລກທີ 370/ສພກ, ລົງວັນທີ 30 ມີນາ 2022; ຕິດຕາມໄປດ້ວຍແຈ້ງການຂອງຫ້ອງວ່າການສຳນັກງານນາຍົກເລກທີ 367/ຫສນຍ ລົງວັນທີ 23 ມີນາ 2022. (ທັງສອງແຈ້ງການນີ້ ໜັງສືພິມເຮົາລົງພິມແລ້ວ) ບໍ່ທໍ່ນັ້ນ ຈະຕ້ອງຕິດຕາມແຈ້ງການທ້ອງຖິ່ນທີ່ຕົນອາໄສຢູ່ ບໍ່ວ່າຢູ່ໃນນະຄອນຫຼວງ ກໍຄືແຂວງຕ່າງໆໃນຂອບ ເຂດທົ່ວປະເທດ.

​          ສຳຄັນທີ່ສຸດ ແມ່ນໝົດທຸກຄົນຕ້ອງໄດ້ປະຕິບັດຕົນຢ່າງເຂັ້ມງວດຕໍ່ແບບແຜນວິຖີດຳລົງຊີວິດ ແບບໃໝ່ (NEWNORMAL).

 ​         ອີງຕາມຮີດຄອງປະເພນີທີ່ສືບທອດກັນມາໃນແຕ່ລະປີ ເພິ່ນຈະມີຄຳທຳນາຍ ເຊິ່ງໃນປີນີ້ ມີ ຄຳທຳນາຍ ໂດຍການຄຳນວນຂອງສາທຸ ບຸນທັນ ປຸນຍະກາມະ ເຖຣະ, ວັດປ່າໂພນເພົາວະນາຣາມ, ນະຄອນຫຼວງພະບາງ ດັ່ງນີ້:

          ຄໍາທໍານາຍນາງສັງຂານປີໃໝ່ລາວ ຈ.ສ 1384, ຄສ 2022, ພ.ສ 2565.

          ວັນສັງຂານລ່ວງ: ວັນພະຫັດ ຂຶ້ນ 13 ຄ່ຳ, ເດືອນ 5, ພ.ສ 2564 ກົງກັບວັນທີ 14 ເມສາ 2022, ເວລາ 9 ໂມງ 52 ນາທີ 12 ວິນາທີ.

          ວັນສັງຂານເນົາ: ວັນສຸກ ຂຶ້ນ 14 ຄ່ຳ, ເດືອນ 5, ພ.ສ 2564 ກົງກັບວັນທີ 15 ເມສາ 2022 (ເນົາວັນດຽວ)

          ວັນສັງຂານຂຶ້ນ: ວັນເສົາ ຂຶ້ນ 15 ຄໍ່າ, ເດືອນ 5, ພ.ສ 2564 ກົງກັບວັນທີ 16 ເມສາ 2022, ເວລາ 13 ໂມງ 49 ນາທີ 48 ວິນາທີ ປ່ຽນວັນຖະເຫລີງ ສົກປີໃໝ່ລາວຈຸນລະ ສັກກະຣາດເປັນ 1384.

          ນາງສັງຂານ: ນາງເທບທິດາອົງທີ 5 ຂອງພຣະຍາກະບິນລະພຣົມ ຊົງພຣະນາມວ່າ : “ກິຣິນີເທ ວີ” ຊົງພະຫຸຣັດທັດດອກມົນທາ ອາພອນປະດັບໄປດ້ວຍແກ້ວມໍຣະກົດ (ແກ້ວສີຂຽວ) ສະເຫວີຍ ຖົ່ວງາເປັນອາຫານ,              ພຣະຫັດຂວາຊົງຖືຂໍຊ້າງ ພຣະຫັດຊ້າຍຊົງຖືປືນ, ສະເດັດຢືນມາເທິງຫລັງ ຊ້າງເປັນພາຫະນະ (ຂີ່ຊ້າງ).

           ເກນພິຣຸນນະສາດ: ພຣະອາທິດເປັນອະທິບໍດີ, ນາກຫຼິ້ນນໍ້າ 4 ໂຕ ບັນດານໃຫ້ຝົນຕົກ 400 ຫ່າ, ໃນນີ້ ຕົກໃນຂອບຈັກກະວານ 160 ຫ່າ ຕົກໃນປ່າຫິມະພານ 120 ຫ່າ, ຕົກໃນມະຫາສະໝຸດ 80 ຫ່າ, ຕົກໃນມະນຸດໂລກ 40 ຫ່າ (ຝົນໜ້ອຍ).

          ເກນທາຣາທິຄຸນ: ຕົກຣາສີເຕໂຊ, ນ້ຳຈະໜ້ອຍ, ຝົນຕົ້ນປີຈະຕົກພໍດີ-ກາງປີຈະແລ້ງ-ປາຍປີ ຈະຕົກຫລາຍ, ນາລຸ່ມຈະດີ ແຕ່ນາໂພນບໍ່ດີ, ຈະມີລົມພັດແຮງທີ່ສຸດມາຈາກທິດທັງ 4 ຕາມຣະດູການ.

          ເກນທັນຍາຫານ: ຊື່ວ່າ ປັຈສິມະ,ເຂົ້າກ້າໄຮ່ນາຈະໄດ້ແຕ່ 1 ສ່ວນ ເສຍໄປ 5 ສ່ວນ, ໂພຊະນີ ຍາຫານມີພໍຄວນ, ປະຊາຊົນພົນລະເມືອງຈະສຸກແດ່ ທຸກແດ່ ປະປົນກັນໄປ.

          ເກນຜະລາມັດສະມັງສາຫານ: ໝາກໄມ້ຈະເປັນດ້ວງເປັນແມງຈໍານວນຫລາຍ, ຊີ້ນປາອາ ຫານຈະແພງ

          ເກນຣຸກຂະຊາດ: ໄມ້ງິ້ວເປັນພະຍາ, ບ້ານເມືອງຈະສະຫງົບສຸກດີ ແຕ່ຟ້າຝົນບໍ່ສູ້ດີປານໃດ.

          ເກນກາລະໂຍກ: ວັນພຸດເປັນທຸງໄຊ, ວັນອັງຄານເປັນອະທິບໍດີ, ວັນອາທິດເປັນວັນອຸ ບາດ, ວັນພະຫັດເປັນໂລກາວິນາດ.

​          ສ່ວນທາງການນັ້ນ ອີງຕາມແຈ້ງການເລກທີ 367/ຫສນຍ, ລົງວັນທີ 23 ມີນາ 2022 ຂອງຫ້ອງວ່າການສຳນັກງານນາຍົກລັດຖະມົນຕີ ນັ້ນມີສອງຈຸດສຳຄັນ ຄື:

1. ເຫັນດີ ກຳນົດເອົາວັນພຸດ ທີ 13 ເມສາ 2022 ເປັນວັນພັກຊົດເຊີຍປີໃໝ່ລາວ ປີ 2012 ທົດແທນວັນເສົາທີ 16 ເມສາ 2012 ເຊິ່ງເປັນວັນພັກລັດຖະການ. ການສະຫຼອງປີໃໝ່ຕ້ອງບົນຈິດ ໃຈປະຢັດມັດທະຍັດທີ່ສຸດ ແລະ ບໍ່ໃຫ້ສໍານັກງານອົງການຂັ້ນສູນກາງ ແລະ ທ້ອງຖິ່ນ ຈັດງານລ້ຽງ ສະຫຼອງປີໃໝ່ ແລະ ອວຍພອນກັນຢ່າງເດັດຂາດ ເພື່ອເປັນແບບຢ່າງໃຫ້ແກ່ສັງຄົມ.

2. ມອບໃຫ້ຄະນະສະເພາະກິດ ໂຄວິດ-19 ຂັ້ນສູນກາງ, ຄະນະສະເພາະກິດນະຄອນຫຼວງ ວຽງຈັນ ແລະ ບັນດາແຂວງ ໃນຂອບເຂດທົ່ວປະເທດ ເປັນຜູ້ຕົກລົງ ແລະ ອອກແຈ້ງການແນະນໍາ ລະອຽດ ເພື່ອໃຫ້ທຸກພາກສ່ວນກ່ຽວຂ້ອງຮັບຊາບ ແລະ ຈັດຕັ້ງປະຕິບັດກ່ຽວກັບມາດຕະການຕ່າງໆ ໃນການປ້ອງກັນການແຜ່ລະບາດຂອງພະຍາດໂຄວິດ-19 ໃນໄລຍະການສະຫຼອງບຸນປີໃໝ່ລາວ ໂດຍໃຫ້ອີງໃສ່ສະພາບການລະບາດຕົວຈິງ ຂອງແຕ່ລະປອນ.

         ຈາກແຈ້ງການນີ້ ວັນພັກຈະແກ່ຍາວຄື: ວັນທີ 13, 14, 15, 16 ແລະ 17 ເມສາ 2022. ວັນເລີ່ມເຮັດວຽກແມ່ນ 18 ເມສາ 2022 ເປັນຕົ້ນໄປ.

ໃນໂອກາດປີໃໝ່ນີ້, ທາງຄະນະບັນນາທິການພວກເຮົາ ຂໍອວຍພອນໃຫ້ຄະນະພັກ-ຄະນະນຳ ຂອງສະພາແຫ່ງຊາດທຸກໆທ່ານ ຈົ່ງມີແຕ່ຄວາມສຸກຄວາມຈະເລີນ ສຳເລັດໜ້າທີ່ທຸກປະການ. ປີໃໝ່ຂໍ ໃຫ້ມີແຕ່ສິ່ງດີໆເຂົ້າມາໃນຊີວິດສ່ວນຕົວ ແລະ ຄອບຄົວຂອງບັນດາທ່ານ.

         ອວຍພອນເພື່ອນຜູ້ອ່ານ ປີໃໝ່ໂຊກໃຫຍ່ໄຊງາມຫ່າງຫາຍຈາກພະຍາດໂລຄາທັງປວງ ໂດຍ ສະເພາະພະຍາດລະບາດໂຄວິດ-19.