(ສ​ພ​ຊ) ພາຍ​ຫລັງ​ໄດ້ດຳ​ເນີນມາ​ເປັນ​ເວ​ລາ 16 ວັນ (ບໍ່​ນັບ​ວັນ​ພັກ​ລັດ​ຖະ​ການ) ໃນ​ຕອນບ່າຍ​ວັນ​ທີ 17 ພະ​ຈິກ 2020 ທີ່ຫ້ອງປະຊຸມສະພາແຫ່ງຊາດ (ຫລັກ 6) ນະຄອນຫລວງວຽງຈັນ, ກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດ (ສພຊ) ຊຸດທີ VIII ໄດ​້ປິດລົງຢ່າງ​ເປັນ​ທາງ​ການ ​ພາຍ​ໃຕ້​ການເປັນປະທານຂອງທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ; ເຂົ້າຮ່ວມມີທ່ານ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ, ທ່ານ ທອງລຸນ ສີສຸລິດ ນາຍົກລັດຖະມົນຕີ; ມີີ​ອະດີດການນໍາ-ການ​ນຳ​ພັກ-ລັດ,​ ສະມາຊິກສະພາແຫ່ງຊາດ (ສ​ສ​ຊ), ຕາງໜ້າຈາກອົງການຈັດຕັ້ງພັກ-ລັດ, ອົງການຈັດຕັ້ງແນວລາວສ້າງຊາດ, ອົງການຈັດຕັ້ງມະຫາຊົນ ພ້ອມ​ດ້ວຍຜູ້ຕາງໜ້າຈາກພາກສ່ວນຕ່າງໆ ​ແລະ ແຂກຖືກເຊີນ.

​ວາ​ລະ​ດຳ​ເນີນກອງປະຊຸມ​ຕະ​ຫລອດ 16 ວັນ, ຄ​ະ​ນະ​ປະ​ທານ​ໄດ້​ຜັດ​ປ່ຽນ​ກັນ​ເປັນ​ປະ​ທານກອງ​ປະ​ຊຸມ, ຮັບ​ຟ​ັງການ​ລາຍ​ງານ, ຄ​ຳ​ຊີ້​ແຈງ​ຈາ​ກ​ພາກ​ສ່ວນ​ຕ່າງໆ; ພ​້​ອມດ​ຽວ​ກັນ​ນີ້, ບັນ​ດາ​​ ສ​ສຊ ປະ​ຈຳ​ເຂດ​ເລືອກ​ຕັ້ງ​ທົ່ວ​ປະ​ເທດ ໄດ້ສຸມໃສ່​ຄົ້ນ​ຄວ້າພິຈາລະນາ ແລະ ເຫັນ​ດີຮັບ​ຮອງ​ບາງບັນຫາສຳຄັນ​ຕ່າງໆ​ຂອງ​ຊາດ.

ສ​ຳ​ລັບ​ວາ​ລະກອງ​ປະ​ຊຸມ​ນັບ​ແຕ່​ວັນ​ທີ 16 ພະ​ຈິກ​ເປັນ​ຕົ້ນ​ມາ ພາຍ​ໃຕ້​​ການເປັນ​ປະ​ທານ​​ຂອງ​ທ່ານ ນາງ ປາ​ນີ ຢາ​ທໍ່​ຕູ​້ ໄດ້​ຮັບ​ຟັງ​ການ​ລາຍ​ງານ​ການ​ຈັດ​ຕັ້ງ​ປະ​ຕິ​ບັດ​ແຜນ​ການ​ເຄື່ອນ​ໄຫວ​ວຽກ​ງານ 5 ປີ (2016-2020) ແລະ ປີ 2020 ຂອງ ສ​ພ​ຊ ຊຸ​ດທີ VIII, ຄາດ​ຄະ​ເນ​ແຜນ​ການ ປະ​ຈ​ຳ​ປີ 2021 ແລະ ຮ່າງ​ທິດ​ທາງ​ແຜນ​ການ​ເຄື່ອນ​ໄຫວ​ວຽກ​ງານ 5 ປີ (2021-2025) ຂອງ​ ສພຊ ຊຸດ​ທີ IX ຈາກ​ທ່ານ ນາງ ສີ​ໃສ ລື​ເດດ​ມູນ​ສອນ ຮອງ​ປະ​ທານ ສ​ພ​ຊ; ຈາກນັ້ນ, ທ່ານ ນາງ ຄ​ຳ​ຈັ​ນ ພົ​ນ​ແສງ​ສະ​ຫວັນ ຮອງ​ປະ​ທານ​ສູນ​ກາງ​ແນວ​ລາວ​ສ້າງ​ຊາດ​ ໄດ້ຂຶ້ນ​ປະ​ກອບ​ຄຳ​ເຫັນ​ຕໍ່​ການ​ເຄື່ອນ​ໄຫວ​ວຽງານ​ຂອງ ສ​ພ​ຊ ຊຸດ​ທີ VIII ແລະ ບັນ​ດາ ສ​ສ​ຊ ​ໄດ້​ສຸມ​ໃສ່​ປະ​ກອບ​ຄຳ​ຄິດ​ຄຳ​ເຫັນຢ່າງ​ມີ​ຈຸ​ດ​ສຸມ, ກົງ​ໄປ​ກົງ​ມາ ແລະ ເຮັດ​ໃຫ້​ບົດ​ລາຍ​ງານ​ດັ່ງ​ກ່າວ ມີ​ຄວາມ​ສົມ​ບູນ​ຍິ່ງ​ຂຶ້ນ; ພ້ອມນັ້ນ, ບັ​ນ​ດາ​ທ່ານ​ຜູ້​ຕາງ​ໜ​້າ​ໃຫ້​ຄະ​ນະ​ປະ​ຈຳ ສ​ພ​ຊ ກໍໄດ້ຂຶ້ນ​ໃ​ຫ້​ຄວາມ​ກະ​ຈ່າງ​ແຈ້ງ​ຕໍ່​ວຽກ​ງານ ສ​ພ​ຊ ​ເພີ່ມ​ເຕີມ.

ຕອນບ່າຍວັນທີ 17 ພະຈິກ, ທ່ານ ນາງ ສວນ​ສະ​ຫວັນ ວິ​ຍະ​ເກດ ​ຫົວ​ໜ້າ​ກອງ​ເລ​ຂາ​ກອງ​ປະ​ຊຸມ, ເລ​ຂາ​ທິ​ການ ສ​ພ​ຊ ໄດ້​ຂຶ້ນສະ​ເໜີ​ຮ່າງ​ມະ​ຕິ​ກອງ​ປະ​ຊຸມ ສ​ພ​ຊ ວ່າ​ດ້ວຍ​ການ​ຮັບ​ຮອງ​ເອົາ​ບົດ​ລາຍ​ງານ​ການ​ຈັດ​ຕັ້ງ​ປະ​ຕິ​ບັດ​ແຜນ​ການ​ເຄື່ອນ​ໄຫວວ​ຽກ​ງານ 5 ປີ (2016-2021) ແລະ ປີ 2020 ຂອງ ສ​ພ​ຊ ຊຸ​ດ​ທີ VIII, ຄາດ​ຄະ​ເນ​ແຜນ​ການ ປະ​ຈ​ຳ​ປີ 2021; ຈາກນັ້ນ, ສ​ສ​ຊ ໄດ້​ປະ​ກອບຄຳ​ເຫັນ ແລະ ລົງ​ຄະ​ແນນ​ສຽງ​ຮັບ​ຮອງເອົາ​ມະ​ຕິ​ດັ່ງ​ກ່າວ ​ດ້ວຍຄະແນນສຽງເຫັນດີ 128 ທ່ານ, ບໍ່ເຫັນດີ 0 ທ່ານ, ບໍ່ອອກສຽງ 3 ທ່ານ ໃນຈຳນວນ ສສຊ ທີ່ເຂົ້າຮ່ວມທັງໝົດ 131 ທ່ານ.

ຕອນ​ທ້າຍຂ​ອງກ​ອງ​ປະ​ຊຸ​ມ, ທ່ານ ນາງ ປານີ ຢາທໍ່ຕູ້ ໄດ້ຂຶ້​ນກ່າວສູນທອນພົດ ​ເພື່ອ​ອັດກອງປະຊຸມຢ່າງເປັນທາງການ ເຊິ່ງ​ເນື້ອ​ໃນ​ຂອງ​ສູນ​ທອ​ນ​ພົດໄດ້​ຍົກໃຫ້ເຫັນ​ເຖິງ​ຜົນ​ສຳ​ເລັດ​​, ຄວາມ​ເອົາ​ໃຈ​ໃສ່ ແລະ ການ​ມີ​ສ່ວນ​ຮ່ວມ​ຢ່າງ​ຕັ້ງ​ໜ້າ​ຂ​ອງ ສ​ພ​ຊ, ຄະ​ນະ​ລັດ​ຖະ​ບານ, ອົງ​ການ​ທີ່​ກ່ຽວ​ຂ້ອງ ກໍ​ຄື​​ບັນ​ດາ ສ​ສ​ຊ ແລະ ​ທຸ​​ກ​ພາກ​ສ່ວນ​ທີ່​ກ່ຽວ​ຂ້ອງ​ໃນ​ການ​ຈັດ​ກອງ​ປະ​ຊຸມ​ຄັ້ງ​ນີ້ ​ເຮັດ​ໃຫ​້ກອງ​ປະ​ຊຸມ​ປິ​ດ​ລົງໄດ້​ດ້ວຍ​ຜົນ​ສຳ​ເລັດ​ອັນ​ຈົບ​ງາມຕາມ​ລະ​ດັບ​ຄາດ​ໝາຍ​ທີ່​ວາງ​ໄວ້.

ແຫຼ່ງຂ່າວທີ່ມາ: ສະພາແຫ່ງຊາດ