ໃນຕອນເຊົ້າຂອງວັນທີ 7 ມີນາ 2024, ທີ່ຫ້ອງປະຊຸມສະພາປະຊາຊົນແຂວງບໍ່ແກ້ວ ໄດ້ຈັດພິທີ ປາຖະກະຖາ ສະເຫຼີມສະຫຼອງວັນແມ່ຍິງສາກົນ ວັນທີ 8 ມີນາ 2024 ຄົບຮອບ 114 ປີ (8 ມີນາ 1910 – 8 ມີນາ 2024), ໂດຍການເປັນປະທານ ຂອງທ່ານ ນາງ ອໍາພອນ ບຸນຍາວົງ ຄະນະປະຈຳສະພາປະຊາຊົນແຂວງ ຄະນະບໍລິຫານງານສະຫະພັນແມ່ຍິງແຂວງ. ມີຜູ້ເຂົ້າຮ່ວມທັງໝົດ 15 ທ່ານ, ຍິງ 13 ທ່ານ, ໃນນີ້ມີ: ສະຫະພັນແມ່ຍິງສະພາປະຊາຊົນແຂວງ 13 ທ່ານ, ຮອງປະທານກຳມະບານຮາກຖານ ສະພາປະຊາຊົນແຂວງ 1 ທ່ານ, ເລຂາໜ່ວຍຊາວໜຸ່ມສະພາປະຊາຊົນແຂວງ 1 ທ່ານ.
ໃນພິທີ, ທ່ານ ນາງ ສຸກັນຍາ ຈັນສະແຫວງ ໄດ້ກ່າວຈຸດປະສົງ ແລະ ຜ່ານມະຕິຕົກລົງ ຂອງຄະນະໜ່ວຍພັກສະພາປະຊາຊົນແຂວງ ວ່າດ້ວຍການແຕ່ງຕັ້ງຄະນະຮັບຜິດຊອບ ໜ່ວຍສະຫະພັນແມ່ຍິງ ສະພາປະຊາຊົນແຂວງ.
ຫຼັງຈາກນັ້່ນ ທ່ານ ນາງ ອຳພອນ ບຸນຍາວົງ ປະທານກອງປະຊຸມ ໄດ້ປາຖະກະຖາມູນເຊື້ອ ວັນແມ່ຍິງສາກົນ ວັນທີ 8 ມີນາວ່າ: ວັນແມ່ຍິງສາກົນ ໄດ້ກໍາເນີດເກີດຂຶ້ນ ໃນທ່າມກາງສະພາບເສດຖະກິດຂອງພວກສັກດີນາ ແລະ ນາຍທຶນຂະຫຍາຍຕົວ ເມື່ອໂຮງຈັກ, ໂຮງງານອຸດສະຫະກໍາຂອງນາຍທຶນຂະຫຍາຍຕົວ ມັນໄດ້ສ້າງຄວາມຮັ່ງມີໃຫ້ແກ່ພວກນາຍທຶນ, ແຕ່ຊ້ຳພັດຍິ່ງເພີ່ມຄວາມທຸກຍາກລໍາບາກ ໃຫ້ແກ່ຊາວຜູ້ອອກແຮງງານ ໂດຍສະເພາະແມ່ນກຳມະກອນແມ່ຍິງ ຢູ່ພາຍໃຕ້ລະບອບສັກດີນາ ນາຍທຶນ, ແມ່ຍິງຖືກກົດຂີ່ຂູດຮີດຢ່າງໜັກໜ່ວງ, ເຮັດວຽກຫຼາຍຊົ່ວໂມງ ແຕ່ໄດ້ຮັບຄ່າຈ່າງແຮງງານດ້ວຍລາຄາຖືກ, ເຮັດວຽກບໍ່ມີການຮັບປະກັນ.
ມາໃນປີ 1910 ກອງປະຊຸມສາກົນກ່ຽວກັບບັນຫາແມ່ຍິງ ຄັ້ງທຳອິດ ໄດ້ຈັດຂຶ້ນ ຢູ່ໂກເປນຮາກ ນະຄອນລວງ ຂອງປະເທດເດນ ມາກ (Copenhagen Denmark), ມີຜູ້ແທນ 100 ກວ່າຄົນ ຈາກ 17 ປະເທດ ເຂົ້າຮ່ວມ, ກອງປະຊຸມດັ່ງກ່າວ ໄດ້ຮັບຮອງ ແລະ ຕົກລົງເອົາ ວັນທີ 8 ມີນາ ຂອງທຸກປີ ເປັນວັນແມ່ຍິງສາກົນ. ວັນທີ 8 ມີນາ ແມ່ນເຫດການ-ການເມືອງ ທີ່ສຳຄັນ, ເປັນຂີດໝາຍ ແຫ່ງໄຊຊະນະອັນພື້ນຖານຂອງຂະບວນການແມ່ຍິງສາກົນ ໃນການຕໍ່ສູ້ທວງເອົາສິດຜົນປະໂຫຍດອັນເປັນທຳ ໃຫ້ແກ່ ແມ່ຍິງຊາວຜູ້ອອກແຮງງານໃນທົ່ວໂລກ, ເປັນວັນລະນຶກເຖິງການຕໍ່ສູ້ຂອງແມ່ຍິງ ເພື່ອປົດປ່ອຍຕົນເອງ ແລະ ຫວງໃຫ້ມີສິດ ສະເໝີພາບ ປະຊາທິປະໄຕ ຄືກັນກັບຜູ້ຊາຍ, ທວງໃຫ້ພວກນາຍທຶນແກ້ໄຂຊີວິດການເປັນຢູ່ພາຍໃຕ້ຄຳຂວັນ: “ ຜູ້ໜຶ່ງເຮັດວຽກມື້ລະ 8 ຊົ່ວໂມງ, ແມ່ຍິງ ແລະ ຜູ້ຊາຍ ເຮັດວຽກຄືກັນ ຕ້ອງໄດ້ຮັບເງິນເດືອນເທົ່າກັນ, ຕ້ອງມີລະບອບປ້ອງ ກັນສຸຂະພາບຂອງແມ່ຍິງ ແລະ ເດັກນ້ອຍ, ຕ້ານສົງຄາມຮຸກຮານ, ປົກປັກຮັກສາສັນຕິພາບຂອງໂລກ “.
ໃນໂອກາດດັ່ງກ່າວ ທ່ານປະທານ ໄດ້ຊີ້ນໍາເອື້ອຍນ້ອງສະຫະພັນແມ່ຍິງ ສະພາປະຊາຊົນແຂວງ ເພີ່ມທະວີຄວາມຮັບຜິດຊອບຂອງຄະນະ ແລະ ສະມາຊິກສະຫະພັນແມ່ຍິງ ຈົ່ງພ້ອມກັນປະຕິບັດຄໍາຂວັນວັນແມ່ຍິງສາກົນ ປີ 2024 “ລົງທຶນເລັ່ງໃສ່ການພັດທະນາຄວາມກ້າວໜ້າຂອງແມ່ຍິງ” ຂອງສູນກາງສະຫະພັນແມ່ຍິງລາວວາງອອກ ດ້ວຍຄວາມຮັບຜິດຊອບສູງ ແລະ ການປົກປ້ອງສິດຜົນປະໂຫຍດຂອງແມ່ຍິງ, ການສົ່ງເສີມຄວາມກ້າວໜ້າຂອງແມ່ຍິງ ແລະ ຄວາມສະເໝີພາບລະຫວ່າງຍິງ-ຊາຍ, ຊຶ່ງໄດ້ກຳນົດແຈ້ງຢູ່ໃນລັດຖະທຳມະນູນ ແລະ ກົດໝາຍຕ່າງໆ. ພ້ອມກັນສະເຫຼີມສະຫຼອງວັນແມ່ຍິງສາກົນ ຄົບຮອບ 114 ປີ, ເອົາໃຈໃສ່ໃນການເຮັດວຽກເປັນໝູ່ຄະນະ, ມີຄວາມສາມັກຄີພາຍໃນ ແລະ ຮັກສາມູນເຊື້ອຮີດຄອງປະເພນີອັນດີງາມຂອງຊາດ.