ຕອນເຊົ້າຂອງວັນທີ 4 ມີຖຸນາ 2024 ທີ່ສະພາປະຊາຊົນແຂວງສາລະວັນ ຈັດພິທີປາຖະກະຖາວັນສໍາຄັນ ແລະ ເຜີຍແຜ່ເຊື່ອມຊຶມເອກະສານຕ່າງໆ ເພື່ອສຶກສາອົບຮົມວຽກງານການເມືອງ-ແນວຄິດ ໃຫ້ແກ່ສະມາຊິກພັກ, ພະນັກງານຫຼັກແຫຼ່ງຂອງຕົນ; ໂດຍການເປັນປະທານ ແລະ ບັນລະຍາຍເຜີຍແຜ່ຂອງທ່ານ ນາງ ສູນໄຖ ໄຊຍະແສງ ກໍາມະການພັກແຂວງ ຮອງປະທານສະພາປະຊາຊົນແຂວງ; ເຂົ້າຮ່ວມມີຄະນະພັກຮາກຖານ, ຄະນະໜ່ວຍພັກ, ສະມາຊິກພັກ, ບັນດາທ່ານຄະນະປະຈໍາສະພາປະຊາຊົນແຂວງ, ປະທານ-ຮອງປະທານຄະນະກໍາມະການ, ຄະນະເລຂາທິການ ຕະຫຼອດຮອດພະນັກງານ ພາຍໃນສະພາປະຊາຊົນແຂວງ ເຂົ້າຮ່ວມຮັບຟັງໃນຄັ້ງນີ້;

ຜູ້ເຂົ້າຮ່ວມໄດ້ຮັບຟັງປາຖະກະຖາ ວັນສ້າງຕັ້ງກໍາມະກອນສາກົນ ຄົບຮອບ 138 ປີ (1/5/1886-1/5/2024); ວັນຜ່າວົງປິດລ້ອມຂອງກອງພັນທີ 2 ວິລະຊົນທົ່ງໄຫຫີນຊຽງຂວາງ ຄົບຮອບ 65 ປີ (18/5/1959-18/5/2024); ວັນວິລະກໍາໂຕນຄຸກຢ່າງມະຫັດສະຈັນຂອງຜູ້ນໍາພັກ ແລະ ແນວລາວຮັກຊາດ ຄົບຮອບ 64 ປີ (24/5/1960-24/5/2024); ວັນເກີດທ່ານກາກ-ມາກ ຄົບຮອບ 206 ປີ (5/5/1818-5/5/2024); ວັນໄຊຊະນະຂອງສະຫະພາບ ໂຊຫວຽດ ເໜືອຟາສຊິດເຢຍລະມັນ ໃນສົ່ງຄາມໂລກຄັ້ງທີ II ຄົບຮອບ 79 ປີ (9/5/1945-9/5/2024); ວັນໄຊຊະນະບັ້ນຮົບດຽນບຽນຟູ ຄົບຮອບ 70 ປີ (7/5/1954-7/5/2024); ວັນເກີດປະທານໂຮ່ຈິມິນ ຄົບຮອບ 134 ປີ (19/5/1890-19/5/2024); ຮັບຟັງການເຜີຍແຜ່ເຊືອມຊຶມເອກະສານ ມະຕິ ກອງປະຊຸມຄົບຄະນະບໍລິຫານງານພັກແຂວງສາລະວັນ ເປີດກວ້າງ ຄັ້ງທີ 14 ສະໄໝທີ IX ແລະ ຜົນສໍາເລັດຂອງກອງປະຊຸມວຽກງານກວດກາທົ່ວປະເທດ ປະຈໍາປີ 2023; ເຊິ່ງຄະນະນໍາສະພາໄດ້ຜັດປ່ຽນກັນບັນລະຍາຍ;

ທັງນີ້, ເພື່ອເຮັດໃຫ້ສະມາຊິກພັກ, ພະນັກງານຫຼັກແຫຼ່ງ ໄດ້ຮັບຮູ້ ແລະ ເຂົ້າໃຈຢ່າງເລິກເຊິງ ກ່ຽວກັບ ວັນທີ່ມີຄວາມໝາຍ ແລະ ຄວາມສໍາຄັນທາງປະຫວັດສາດຂອງຂະບວນການຕໍ່ສູ້ຂອງຊົນຊັ້ນກໍາມະກອນໃນທົ່ວໂລກ; ຮັບຮູ້ເຂົ້າໃຈ ປັດໃຈພື້ນຖານທີ່ເຮັດໃຫ້ການຜ່າວົງປິດລ້ອມຢ່າງມີໄຊຊະນະຢ່າງຍິ່ງໃຫຍ່ຂອງກອງພັນທີ 2 ວິລະຊົນທົ່ງໄຫຫີນຊຽງຂວາງ; ຮັບຮູ້ເຖິງເຫດການວິລະກໍາຂອງຜູ້ນໍາຂອງພັກ ແລະ ແນວລາວຮັກຊາດ ໃນການໂຕນຄຸກຄຸ້ມຂັງທີ່ໜ້າມະຫັດສະຈັນ; ຮັບຮູ້ເຖິງຂໍ້ມູນປະຫວັດແຕ່ລະໄລຍະຂອງບຸກຄົນສໍາຄັນ ທ່ານ ກາກມາກ ນັກເສດຖະສາດ, ປັດຊະຍາ, ນັກປະຕິວັດຜູ້ຍິງໃຫຍ່ຂອງຊົນຊັ້ນກໍາມະຊີບ ແລະ ຜູ້ນໍາປະຕິວັດ ປະທານໂຮ່ຈິມິນ; ຮັບຮູ້ເຖິງເຫດການທາງປະຫວັດສາດໃນໄລຍະສົງຄາມໂລກຄັ້ງທີ II ສະຕະວັດທີ 20 ການຕໍ່ສູ້ຂອງສະຫະພາບໂຊວຽດທີ່ໄດ້ຮັບໄຊຊະນະອັນຍິ່ງໃຫຍ່ເໜືອຟາສຊິດເຢຍລະມັນ; ຮັບຮູ້ເຖິງເຫດການໄລຍະການຕໍ່ສູ້ຈົນເຖິງວັນໄຊຊະນະອັນຍິ່ງໃຫຍ່ບັ້ນຮົບດຽນບຽນຟູ ການຕໍ່ສູ້ຢ່າງພິລາດອາດຫານ ຮ່ວມສໍາພັນສູ້ຮົບຂອງ 3 ຊາດອິນດູຈີນ ຄື ຫວຽດນາມ, ລາວ ແລະ ກໍາປູເຈຍ ຕໍ່ການຮຸກຮານຂອງພວກສັດຕູ; ກໍາແໜ້ນຕໍ່ເນື້ອໃນຜົນສໍາເລັດຂອງກອງປະຊຸມວຽກງານກວດກາທົ່ວປະເທດ ປະຈໍາປີ 2023 ແລະ ເນື້ອໃນມະຕິຂອງກອງປະຊຸມຄົບຄະນະບໍລິຫານງານພັກແຂວງສາລະວັນ ເປີດກວ້າງ ຄັ້ງທີ 14 ສະໄໝທີ IX ເພື່ອຈັດຕັ້ງຜັນຂະຫຍາຍເຂົ້າສູ່ວຽກງານໃຫ້ເກີດຜົນເປັນຈິງ;

ພາບ-ຂ່າວ: ດີລໍາພົນ ພົມມະຈັນ