(ສພຊ) – ວັນທີ 17 ທັນວາຜ່ານມາ ທີ່ສະພາແຫ່ງຊາດ (ສພຊ) ໄດ້ມີພິທີປາຖະກະຖາວັນຊາດທີ 2 ທັນວາ ຄົບຮອບ 49 ປີ ແລະ ວັນເກີດປະທານ ໄກສອນ ພົມວິຫານ ຄົບຮອບ 104 ປີ ໂດຍການເປັນປະທານຂອງສະຫາຍ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງເລຂາຄະນະບໍລິຫານງານພັກສະພາແຫ່ງຊາດ; ມີຄະນະບໍລິຫານງານພັກ, ຄະນະພັກຮາກຖານ, ຄະນະໜ່ວຍພັກຮາກຖານ, ຄະນະໜ່ວຍພັກ, ສະມາຊິກພັກ ແລະ ພະນັກງານ-ລັດຖະກອນພາຍໃນ ສພຊ ເຂົ້າຮ່ວມຢ່າງພ້ອມພຽງ.
ທັງນີ້, ກໍເພື່ອທົບທວນຄືນມູນເຊື້ອພາລະກິດປົດປ່ອຍຊາດໃນເມື່ອກ່ອນ ກໍຄືຜົນສຳເລັດໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ພາຍໃຕ້ການຊີ້ນຳ-ນໍາພາຂອງພັກ, ຖືເອົາການສະເຫຼີມສະຫຼອງວັນຊາດທີ 2 ທັນວາ ເປັນການໂຄສະນາປຸກລະດົມນໍ້າໃຈຮັກຊາດ, ເປັນເຈົ້າຕົນເອງ, ສ້າງຄວາມເຂັ້ມແຂງດ້ວຍຕົນເອງ, ເສີມຂະຫຍາຍຄວາມສາມັກຄີ ແລະ ຍູ້ແຮງບົດບາດການນຳພາຂອງພັກ; ເພື່ອລະນຶກເຖິງຄຸນງາມຄວາມດີ, ຜົນງານອັນຍິ່ງໃຫຍ່ຂອງປະທານ ໄກສອນ ພົມວິຫານ ຜູ້ນຳທີ່ເຄົາລົບຮັກຂອງປະຊາຊົນລາວບັນດາເຜົ່າ ທີ່ມີຕໍ່ປະເທດຊາດ ແລະ ຮ່ຳຮຽນເອົາແບບຢ່າງອັນດີງາມ ເພື່ອເຝິກຝົນຫຼໍ່ຫຼອມຕົນເອງໃຫ້ກາຍເປັນສະມາຊິກພັກທີ່ດີ ເພື່ອສືບທອດພາລະກິດຂອງພັກ.
ໃນພິທີ, ສະຫາຍ ຄຳໃບ ດຳລັດ ກຳມະການສູນກາງພັກ, ປະທານຄະນະກວດກາພັກສະພາແຫ່ງຊາດ ໄດ້ຫວນຄືນມູນເຊື້ອຂະບວນປະຕິວັດ ແລະ ຄວາມໝາຍສໍາຄັນຂອງວັນຊາດທີ 2 ທັນວາ ອັນເປັນມູນເຊື້ອ ແລະ ໄຊຊະນະອັນຍິ່ງໃຫຍ່ໃນປະຫວັດສາດແຫ່ງການຕໍ່ສູ້ຂອງຊາດ ແມ່ນວັນທີ່ປະຊາຊົນລາວບັນດາເຜົ່າໄດ້ມີອິດສະລະພາບ ແລະ ເປັນເຈົ້າຂອງປະເທດຊາດຢ່າງແທ້ຈິງ ທັງເປັນວັນແຫ່ງການກ້າວສູ່ຍຸກສະໄໝໃໝ່ແຫ່ງການສ້າງປະເທດລາວ ສັນຕິພາບ, ເອກະລາດ, ປະຊາທິປະໄຕ, ເອກະພາບ, ວັດທະນະຖາວອນ; ພ້ອມນັ້ນ, ຍັງຍົກໃຫ້ເຫັນເຖິງບັນດາເຫດການ ແລະ ໄຊຊະນະອັນຍິ່ງໃຫຍ່ຂອງກອງທັບ ແລະ ປະຊາຊົນລາວ ໃນຂະບວນການຕໍ່ສູ້ກູ້ຊາດ, ຜົນສໍາເລັດຂອງການປະຕິບັດ 2 ໜ້າທີ່ຍຸດທະສາດ ແຕ່ອະດີດຈົນເຖິງປັດຈຸບັນ ທັງເນັ້ນໜັ້ກໃຫ້ສືບຕໍ່ເສີມຂະຫຍາຍມູນເຊື້ອວັນຊາດທີ 2 ທັນວາ ເຂົ້າໃນການພັດທະນາປະເທດຊາດ. ຈາກນັ້ນ, ສະຫາຍ ປອ. ນາງ ສູນທອນ ໄຊຍະຈັກ ໄດ້ເຜີຍແຜ່ຊີວິດ ແລະ ການເຄື່ອນໄຫວປະຕິວັດຂອງປະທານ ໄກສອນ ພົມວິຫານ ໂດຍຍົກໃຫ້ເຫັນເຖິງຜົນງານອັນໃຫຍ່ຫຼວງ ແລະ ແບບຢ່າງອັນດີເລີດຂອງປະທານ ໄກສອນ ພົມວິຫານ; ພ້ອມນັ້ນ, ຍັງເນັ້ນໜັກໃຫ້ຕັ້ງໜ້າຮໍ່າຮຽນເອົາແບບຢ່າງອັນດີເລີດຂອງປະທານ ໄກສອນ ພົມວິຫານ ເພື່ອສືບທອດພາລະກິດຂອງພັກໃນໄລຍະໃໝ່ ໃຫ້ໄປເຖິງຈຸດໝາຍປາຍທາງໃນເງື່ອນໄຂທີ່ສະພາບສາກົນທີ່ມີທັງກາລະໂອກາດ ແລະ ສິ່ງທ້າທາຍທົດສອບ, ສົມທົບກັບສະພາບພາຍໃນກໍມີຄວາມຫຍຸ້ງຍາກບໍ່ໜ້ອຍ ແລະ ເພື່ອເຮັດຫຼ້ອນພາລະກໍາປະຫວັດສາດທີ່ມອບໝາຍໃຫ້ນັ້ນ, ສະມາຊິກພັກ, ພະນັກງານ, ທະຫານ, ຕໍາຫຼວດ ແລະ ປະຊາຊົນບັນດາເຜົ່າທົ່ວປະເທດ ຕ້ອງໄດ້ເພີ່ມທະວີຄວາມສາມັກຄີເປັນຈິດໜຶ່ງໃຈດຽວ ພ້ອມກັນບຸກບືນສູ້ຊົນເຮັດໜ້າທີ່ວຽກງານທີ່ໄດ້ຮັບມອບໝາຍໃຫ້ສໍາເລັດ, ໂດຍສະເພາະແມ່ນການຈັດຕັ້ງປະຕິບັດຄາດໝາຍສູ້ຊົນທີ່ກອງປະຊຸມໃຫຍ່ຂອງພັກກາງສະໄໝທີ XI ຂອງແຕ່ລະຂັ້ນວາງອອກ ໃນໄລຍະທ້າຍສະໄໝໃຫ້ສໍາເລັດ, ສຸມໃສ່ປະຕິບັດ 2 ວາລະແຫ່ງຊາດ ແລະ ພ້ອມກັນເປັນເຈົ້າການແກ້ໄຂວິກິດການເສດຖະກິດທີ່ປະເທດເຮົາພວມປະເຊີນຢູ່ ໃຫ້ເຂົ້າສູ່ສະພາບປົກກະຕິໂດຍໄວ ແລະ ເອົາໃຈໃສ່ແກ້ໄຂຄວາມທຸກຍາກຂອງປະຊາຊົນ ໃຫ້ນັບມື້ນັບມີຊີວິດການເປັນຢູ່ດີຂຶ້ນ.
ຫຼັງຈາກນັ້ນ, ໄດ້ມີການສະຫຼຸບຖອດຖອນບົດຮຽນການຮັບໃຊ້ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ເຊິ່ງທ່ານ ນາງ ອຳໄພວອນ ລ້ອມບຸນແພງ ກຳມະການສຳຮອງສູນກາງພັກ, ເລຂາທິການສະພາແຫ່ງຊາດ ໄດ້ຜ່ານຮ່າງບົດສະຫຼຸບຕີລາຄາຜົນສຳເລັດການກະກຽມ ແລະ ດຳເນີນກອງປະຊຸມສະໄໝສາມັນເທື່ອທີ 8 ໂດຍຍົກໃຫ້ເຫັນດ້ານດີ, ຂໍ້ຄົງຄ້າງ, ສາເຫດທີ່ພາໃຫ້ມີດ້ານດີ ແລະ ຂໍ້ຄົງຄ້າງ, ບົດຮຽນທີ່ຖອດຖອນໄດ້, ແຜນວຽກຈຸດສຸມພາຍຫຼັງສຳເລັດກອງປະຊຸມ, ແລະ ຄາດຄະເນແຜນການກອງປະຊຸມສະໄໝສາມັນເທື່ອທີ 9 ຂອງ ສພຊ ຊຸດທີ IX; ຈາກນັ້ນ, ບັນດາທ່ານໃນກອງເລຂານຸການກອງປະຊຸມສະໄໝສາມັນເທື່ອທີ 8 ກໍໄດ້ປະກອບຄຳຄິດຄຳເຫັນຕໍ່ບົດສະຫຼຸບດັ່ງກ່າວ ແລະ ລາຍງານໂດຍຫຍໍ້ຂົງເຂດວຽກງານຂອງຕົນ.
ຕອນບ່າຍຂອງວັນດຽວກັນ, ທ່ານ ປອ. ນາງ ສູນທອນ ໄຊຍະຈັກ ຍັງໄດ້ເປັນປະທານກອງປະຊຸມກະກຽມການດຳເນີນຊຳລະສະສາງລົດຂອງລັດຂອງສະພາແຫ່ງຊາດ ເຊິ່ງທ່ານໄດ້ເຜີຍແຜ່ດຳລັດວ່າດ້ວຍລົດຂອງລັດ ສະບັບເລກທີ 599/ລບ, ລົງວັນທີ 29 ກັນຍາ 2021; ທ່ານ ນາງ ອຳໄພວອນ ລ້ອມບຸນແພງ ໄດ້ເຜີຍແຜ່ແຈ້ງການຂອງກະຊວງການເງິນ ສະບັບເລກທີ 0589/ກງ, ລົງວັນທີ 15 ກຸມພາ 2024 ກ່ຽວກັບການຈັດຕັ້ງປະຕິບັດຂໍ້ຕົກລົງວ່າດ້ວຍການສະສາງລົດຂອງລັດ, ຄຳແນະນຳກ່ຽວກັບການຄຸ້ມຄອງ ແລະ ນຳໃຊ້ລົດບໍລິຫານຂອງລັດ ສະບັບເລກທີ 0393/ກງ ແລະ ຂໍ້ຕົກລົງຂອງນາຍົກລັດຖະມົນຕີ ວ່າດ້ວຍການສະສາງລົດຂອງລັດ ສະບັບເລກທີ 169/ນຍ, ລົງວັນທີ 28 ທັນວາ 2023. ການເຜີຍແຜ່ເອກະສານວ່າດ້ວຍກາານຄຸ້ມຄອງ, ນຳໃຊ້ ແລະ ສະສາງລົດຂອງລັດຄັ້ງນີ້ ມີພະນັກງານບຳນານຂອງ ສພຊ ເຂົ້າຮ່ວມນຳ.
(ນາງ ອາລິນ ສຸພິມມະປະດິດ)