(ສພຊ) – ຕອນບ່າຍວັນທີ 28 ພະຈິກນີ້, ທີ່ສະພາແຫ່ງຊາດ ໄດ້ຈັດພິທີປາຖະກະຖາວັນສະຖາປະນາ ສປປລາວ ຄົບຮອບ 50 ປີ, ວັນເກີດປະທານ ໄກສອນ ພົມວິຫານ ຄົບຮອບ 105 ປີ ແລະ ປະດັບຫຼຽນກາລະນຶກ 50 ປີ ວັນສະຖາປະນາ ສປປລາວ ໂດຍການເລົ່າຄືນມູນເຊື້ອ 2 ວັນສຳຄັນດັ່ງກ່າວຂອງທ່ານ ສຈ. ປອ. ຈະເລີນ ເຍຍປາວເຮີ ຮອງປະທານສະພາແຫ່ງຊາດ; ມີບັນດາການນໍາຂັ້ນສູງ ແລະ ອະດີດການນໍາຂັ້ນສູງ ພ້ອມດ້ວຍພະນັກງານ-ລັດຖະກອນ ແລະ ພະນັກງານບຳນານ ຂອງສະພາແຫ່ງຊາດ ເຂົ້າຮ່ວມຢ່າງພ້ອມພຽງ.
ໃນພິທີ, ທ່ານຮອງປະທານສະພາແຫ່ງຊາດ ໄດ້ຫວນຄືນໃຫ້ເຫັນເຖິງພາລະກິດການປະຕິວັດຂອງພັກປະຊາຊົນປະຕິວັດລາວ ທີ່ສາມາດຍາດໄດ້ໄຊຊະນະຢ່າງສົມບູນໃນການປະຕິວັດຊາດປະຊາທິປະໄຕຢູ່ປະເທດເຮົາ ແລະ ຜົນງານການປົກປັກຮັກສາ ແລະ ສ້າງສາປະເທດຊາດ ຕະຫຼອດໄລຍະ 50 ປີຜ່ານມາ; ພ້ອມນັ້ນ, ກໍໄດ້ຫວນຄືນມູນເຊື້ອພາລະກິດການປົດປ່ອຍຊາດ, ຜົນງານ-ຄຸນງາມຄວາມດີຂອງປະທານ ໄກສອນ ພົມວິຫານ ແລະ ການເສີມຂະຫຍາຍມູນເຊື້ອວັນທີ 2 ທັນວາ ໃນການປົກປັກຮັກສາ ແລະ ສ້າງສາປະເທດຊາດ. ທ່ານຍັງຮຽກຮ້ອງໃຫ້ຕັ້ງໜ້າຮ່ຳຮຽນແບບຢ່າງຄຸນສົມບັດຂອງປະທານ ໄກສອນ ພົມວິຫານ ໂດຍສະເພາະແບບແຜນວິທີເຮັດວຽກຢ່າງມີຫຼັກການ, ມີແບບແຜນໃນການຊີ້ນໍາ-ນໍາພາ, ຢຶດໝັ້ນຫຼັກການຂອງພັກ; ການເຮັດວຽກມີການວາງແຜນ, ມີແຜນງານ, ໂຄງການລະອຽດ, ມີການຄາດຄະເນລ່ວງໜ້າ; ການເຮັດວຽກມີລະບົບການແບ່ງງານ, ແບ່ງຄວາມຮັບຜິດຊອບ, ມີກົນໄກການປະສານສົມທົບກັບພາກສ່ວນຕ່າງໆຢ່າງແໜ້ນແຟ້ນ, ມີການສະຫຼຸບສ່ອງແສງ, ລາຍງານຢ່າງເປັນລະບົບ ແລະ ມີການຕິດຕາມກວດກາຢ່າງຮອບຄອບ ແລະ ຕໍ່ເນື່ອງ ແນໃສ່ສ້າງໃຫ້ພັກມີຄວາມປອດໃສ, ສ້າງໃຫ້ລັດມີຄວາມເຂັ້ມແຂງ, ສ້າງໄດ້ຄວາມເຊື່ອໝັ້ນຈາກປະຊາຊົນ; ແບບແຜນວິທີເຮັດວຽກທີ່ຮັບປະກັນລັກສະນະວິທະຍາສາດ ສະແດງອອກຕາມຄວາມຈິງພາວະວິໄສ, ການເຮັດວຽກຕ້ອງໄດ້ເຄົາລົບຫຼັກການ, ຫຼັກເກນ, ກົດເກນ ແລະ ທິດສະດີຂອງນັກມາກຊິດ, ນັກວິທະຍາສາດທີ່ກ້າວໜ້າ ເພື່ອໜູນໃຊ້ເຂົ້າໃນການພັດທະນາປະເທດຊາດໃຫ້ສອດຄ່ອງກັບຍຸກສະໄໝ; ຄຸນສົມບັດສິນທຳປະຕິວັດ, ເຝິກຝົນຫຼໍ່ຫຼອມນໍ້າໃຈຮັກຊາດ, ນໍ້າໃຈເສຍສະຫຼະອັນສູງສົ່ງ, ຈິດໃຈປະຕິວັດສຸດກົກສຸດປາຍ, ມານະຈິດປະຕິວັດອັນເດັດດ່ຽວໜຽວແໜ້ນ; ທັດສະນະມະຫາຊົນ, ເຄົາລົບນັບຖືປະຊາຊົນ; ຍົກສູງສະຕິຮັກຊາດ ເອກະລາດເປັນເຈົ້າຕົນເອງ, ສ້າງຄວາມເຂັ້ມແຂງດ້ວຍຕົນເອງ; ນໍ້າໃຈປະຢັດມັດທະຍັດ, ຄວາມດຸໝັ່ນໃນການອອກແຮງງານ, ຄວາມດຸໝັ່ນຂະຫຍັນພຽນ, ການຊອກຮູ້ຮໍ່າຮຽນຢ່າງບໍ່ຢຸດຢັ້ງ ແລະ ຖືເອົາແບບຢ່າງຄວາມສາມັກຄີເປັນບັນຫາໃຈກາງໃນການພັດທະນາອົງການ ແລະ ປະເທດຊາດ ດ້ວຍການເພີ່ມທະວີຄວາມສາມັກຄີພາຍໃນ ແລະ ຕ່າງປະເທດ ໃຫ້ແໜ້ນແຟ້ນ ເພື່ອສ້າງໄດ້ກໍາລັງທີ່ເຂັ້ມແຂງຮັບໃຊ້ແກ່ການປົກປັກຮັກສາ ແລະ ສ້າງສາປະເທດຊາດຂອງເຮົາໃນປັດຈຸບັນ ແລະ ອະນາຄົດ. 
ຈາກນັ້ນ, ໄດ້ຜ່ານລັດຖະດຳລັດ ສະບັບເລກທີ 303/ປປທ, ລົງວັນທີ 20 ພະຈິກ 2025 ວ່າດ້ວຍການປະດັບຫຼຽນກາລະນຶກ 50 ປີ ວັນສະຖາປະນາ ສປປລາວ ໃຫ້ແກ່ບັນດາການນໍາຂັ້ນສູງ, ອະດີດການນໍາຂັ້ນສູງ, ພະນັກງານ-ລັດຖະກອນ ແລະ ພະນັກງານບຳນານ ຂອງສະພາແຫ່ງຊາດ ຈຳນວນ 205 ທ່ານ, ຍິງ 65 ທ່ານ; ແລະ ມີການປະດັບຫຼຽນໂດຍທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ, ທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ, ທ່ານ ສຈ. ປອ. ຈະເລີນ ເຍຍປາວເຮີ ແລະ ທ່ານ ນາງ ອຳໄພວອນ ລ້ອມບຸນແພງ ເລຂາທິການສະພາແຫ່ງຊາດ ຕາມລຳດັບ.
(ນາງ ອາລິນ ສຸພິມມະປະດິດ)