(ສພຊ) – ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ໃນຕອນບ່າຍວັນທີ 3 ທັນວານີ້ ໂດຍການເປັນປະທານຂອງທ່ານ ປອ. ນາງ ສູນທອນ ໄຊຍະຈັກ, ທ່ານ ນາງ ອາລີ ວົງໜໍ່ບຸນທຳ ປະທານຄະນະບໍລິຫານງານສູນກາງສະຫະພັນແມ່ຍິງລາວ ໄດ້ສະເໜີຫຍໍ້ຄວາມຈຳເປັນຕໍ່ການປັບປຸງກົດໝາຍວ່າດ້ວຍສະຫະພັນແມ່ຍິງລາວ ເຊິ່ງທ່ານກ່າວວ່າ: ອີງໃສ່ການຂະຫຍາຍຕົວທາງດ້ານເສດຖະກິດ-ສັງຄົມໃນປັດຈຸບັນ ມັນຮຽກຮ້ອງຕ້ອງການໃຫ້ອົງການຈັດຕັ້ງລັດ-ອົງການຈັດຕັ້ງມະຫາຊົນ ເວົ້າລວມ, ເວົ້າສະເພາະການຈັດຕັ້ງສະຫະພັນແມ່ຍິງລາວ ຕ້ອງມີການຄຸ້ມຄອງ-ນຳພາການເຄື່ອນໄຫວວຽກງານຂອງຕົນດ້ວຍກົດໝາຍ; ສະນັ້ນ, ສູນກາງສະຫະພັນແມ່ຍິງລາວ ຈຶ່ງເຫັນວ່າມີຄວາມຈໍາເປັນທີ່ຈະຕ້ອງປັບປຸງກົດໝາຍວ່າດ້ວຍສະຫະພັນແມ່ຍິງລາວ ທັງເປັນການຈັດຕັ້ງປະຕິບັດນະໂຍບາຍການສ້າງລັດແຫ່ງກົດໝາຍຢູ່ ສປປລາວ.

ທ່ານ ນາງ ອາລີ ວົງໜໍ່ບຸນທຳ ກ່າວຕື່ມວ່າ: ກົດໝາຍວ່າດ້ວຍສະຫະພັນແມ່ຍິງລາວ ປະກາດໃຊ້ຢ່າງເປັນທາງການແຕ່ວັນທີ 20 ສິງຫາ 2013, ມາເຖິງປັດຈຸບັນ ອີງໃສ່ທ່າອຽງການພັດທະນາເສດຖະກິດ-ສັງຄົມນັບມື້ຂະຫຍາຍຕົວຢ່າງກວ້າງຂວາງ; ສະນັ້ນ, ອົງການສະຫະພັນແມ່ຍິງລາວແຕ່ລະຂັ້ນ ມີຄວາມຈໍາເປັນຈະຕ້ອງໄດ້ປັບປຸງພາລະບົດບາດ, ໜ້າທີ່ຂອງຕົນໃຫ້ສອດຄ່ອງກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່. ກົດໝາຍສະບັບນີ້ ມີເນື້ອໃນລັກສະນະກວມລວມ, ບໍ່ຮັດກຸມ ຖ້າທຽບໃສ່ກົດໝາຍວ່າດ້ວຍການສ້າງນິຕິກຳ ເຫັນວ່າໂຄງຮ່າງຂອງກົດໝາຍຄວນໄດ້ຮັບການປັບປຸງ; ສະນັ້ນ, ກົດໝາຍວ່າດ້ວຍສະຫະພັນແມ່ຍິງລາວ ຈຶ່ງມີຄວາມຈໍາເປັນຕ້ອງໄດ້ຮັບການປັບປຸງໃຫ້ແທດເໝາະກັບສະພາບການຕົວຈິງໃນແຕ່ລະໄລຍະ.