(ສພຊ) – ຕອນເຊົ້າວັນທີ 03 ທັນວາຜ່ານມາ, ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ໂດຍການເປັນປະທານຂອງທ່ານ ສຈ. ປອ. ຈະເລີນ ເຍຍປາວເຮີ ຮອງປະທານສະພາແຫ່ງຊາດ, ທ່ານ ປອ. ນາງ ວຽງທອງ ສີພັນດອນ ປະທານສານປະຊາຊົນສູງສຸດ ໄດ້ສະເໜີປັບປຸງກົດໝາຍວ່າດ້ວຍການດຳເນີນຄະດີແພ່ງ ເພື່ອໃຫ້ສອດຄ່ອງກັບລັດຖະທຳມະນູນ, ກົດໝາຍທີ່ກ່ຽວຂ້ອງ ແລະ ຄວາມຮຽກຮ້ອງຕ້ອງການໃນໜ້າທີ່ການເມືອງ ກໍຄືການດຳເນີນຄະດີແພ່ງໃນໄລຍະໃໝ່ ທັງເຮັດໃຫ້ກົດໝາຍສະບັບປັບປຸງດັ່ງກ່າວ ສາມາດຈັດຕັ້ງປະຕິບັດໄດ້ງ່າຍ ແລະ ສອດຄ່ອງກັບສະພາບຄວາມເປັນຈິງຂອງປະເທດເຮົາ ແນໃສ່ການດຳເນີນຄະດີແພ່ງມີຄວາມວ່ອງໄວ, ໂປ່ງໃສ, ຖືກຕ້ອງ, ມີຄວາມເຊື່ອໝັ້ນ ເຊື່ອຖື ແລະ ເຂົ້າເຖິງຂະບວນຍຸຕິທໍາໄດ້ຫຼາຍຂຶ້ນ, ການດຳເນີນຄະດີມີຄຸນນະພາບ ແລະ ມີຜົນສັກສິດໃນການຈັດຕັ້ງປະຕິບັດ ແລະ ເພື່ອເຮັດໃຫ້ການຄຸ້ມຄອງ, ຕິດຕາມກວດກາສານປະຊາຊົນ ແລະ ຜູ້ພິພາກສາ ໃຫ້ແທດເໝາະກັບສະພາບຄວາມເປັນຈິງ. ເນື່ອງຈາກໄດ້ມີມະຕິສະບັບເລກທີ 037/ກມສພ, ລົງວັນທີ 18 ມິຖຸນາ 2018 ວ່າດ້ວຍການຍົກສູງປະສິດທິພາບການຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍ ແລະ ມະຕິສະບັບເລກທີ 112/ກມສພ, ລົງວັນທີ 02 ມິຖຸນາ 2020 ວ່າດ້ວຍການຍົກສູງຄຸນນະພາບການດຳເນີນຄະດີຕາມຂະບວນການຍຸຕິທຳ. ສະນັ້ນ, ຈຶ່ງມີຄວາມຈຳເປັນຕ້ອງໄດ້ປັບປຸງກົດໝາຍວ່າດ້ວຍການດໍາເນີນຄະດີແພ່ງ ເພື່ອເປັນເຄື່ອງມື ແລະ ເປັນບ່ອນອີງໃນການເຄື່ອນໄຫວປະຕິບັດໜ້າທີ່ວຽກງານ, ການພິຈາລະນາຕັດສິນ ແລະ ພິພາກສາຄະດີຂອງສານ ໃຫ້ມີຄວາມຖືກຕ້ອງ, ວ່ອງໄວ, ຍຸຕິທຳ, ມີຄວາມເຊື່ອໝັ້ນຈາກປະຊາຊົນ ແລະ ກາຍເປັນເຄື່ອງມືຜະເດັດການສັກສິດເດັດຂາດຂອງພັກ; ເພື່ອລວບລວມເອົາບົດຮຽນອື່ນໃນກົດໝາຍທີ່ກ່ຽວຂ້ອງ, ລະບຽບການ, ນິຕິກຳອື່ນ ແລະ ບົດຮຽນຂອງຕ່າງປະເທດ ທີ່ພົວພັນກັບວຽກງານການແກ້ໄຂບັນຫາທາງແພ່ງ ນຳມາປັບປຸງເຂົ້າໃສ່ກົດໝາຍສະບັບນີ້ ສາມາດຈັດຕັ້ງປະຕິບັດໄດ້ງ່າຍ ແລະ ສອດຄ່ອງກັບສະພາບຄວາມເປັນຈິງຂອງປະເທດເຮົາ, ແກ້ບັນຫາຄະດີຫຼົບໄປຫຼົບມາ, ມີຄວາມຊັກຊ້າ, ແກ່ຍາວເວລາ, ຮັບປະກັນຄວາມເປັນເອກະພາບ ແລະ ມີຜົນສັກສິດໃນການຈັດຕັ້ງປະຕິບັດ.

ທ່ານ ປອ. ນາງ ວຽງທອງ ສີພັນດອນ ກ່າວຕື່ມວ່າ: ຄາດຄະເນຜົນໄດ້ຮັບຈາກການປັບປຸງກົດໝາຍວ່າດ້ວຍການດໍາເນີນຄະດີແພ່ງ ຈະສ້າງຄວາມເຊື່ອໝັ້ນຂອງສັງຄົມ ກໍຄືຄູ່ຄວາມ, ບຸກຄົນທີສາມ ຕໍ່ສານປະຊາຊົນ ໃນການພິຈາລະນາຕັດສິນ ຫຼື ພິພາກສາຄະດີແພ່ງ ແລະ ບັນດາປາກົດການຫຍໍ້ທໍ້ຕ່າງໆ; ເຮັດໃຫ້ບຸກຄົນ ແລະ ການຈັດຕັ້ງ ຮູ້ໄດ້ເຖິງພາລະບົດບາດ, ສິດ ແລະ ໜ້າທີ່ ການເຄື່ອນໄຫວວຽກງານຂອງສານປະຊາຊົນ ກ່ຽວກັບການດຳເນີນຄະດີແພ່ງ ກໍຄືພິຈາລະ ນາແກ້ໄຂຂໍ້ຂັດແຍ່ງທາງແພ່ງ; ເຮັດໃຫ້ປະຊາຊົນເຂົ້າເຖິງຂະບວນການຍຸຕິທຳ, ສັງຄົມມີຄວາມສະຫງົບສຸກ, ມີຄວາມເປັນລະບຽບຮຽບຮ້ອຍ ແລະ ປະກອບສ່ວນເຂົ້າໃນການສ້າງລັດທີ່ປົກຄອງດ້ວຍກົດໝາຍຢູ່ ສປປລາວ; ແກ້ໄຂບັນຫາການດໍາເນີນຄະດີມີຄວາມຊັກຊ້າແກ່ຍາວ, ຄະດີຫຼົບໄປຫຼົບມາບໍ່ມີມື້ສິ້ນສຸດ ແລະ ຮັບປະກັນການດຳເນີນຄະດີແພ່ງ ມີຄວາມວ່ອງໄວ, ຖືກຕ້ອງ ແລະ ຄວາມຍຸຕິທຳໃນສັງຄົມ.