(ສພຊ) – ເພື່ອສະຫຼຸບຕີລາຄາການປະຕິບັດລັດຖະທຳມະນູນໃນໄລຍະ 9 ປີຜ່ານມາຢູ່ແຂວງຈຳປາສັກ ໃຫ້ເຫັນໄດ້ຂໍ້ສະດວກ, ຂໍ້ຫຍຸ້ງຍາກ, ຜົນສຳເລັດ, ບັນຫາຄົງຄ້າງ ພ້ອມທັງສາເຫດ, ບົດບັນຍັດທີ່ສອດຄ່ອງ ຫຼື ບໍ່ສອດຄ່ອງ, ບົດຮຽນ ແລະ ບັນຫາທີ່ຕັ້ງຂຶ້ນ ທັງເປັນຂໍ້ມູນໃຫ້ແກ່ການຄົ້ນຄວ້າ, ປັບປຸງເນື້ອໃນຂອງລັດຖະທຳມະນູນ ໃຫ້ຖືກຕ້ອງ, ຄົບຖ້ວນ, ສອດຄ່ອງ, ຮັດກຸມ ແລະ ສາມາດຈັດຕັ້ງປະຕິບັດໃຫ້ປາກົດຜົນເປັນຈິງໄດ້. ວັນທີ 24 ກໍລະກົດ 2024 ທີ່ຫ້ອງປະຊຸມສະໂມສອນຫຼັກ 4 ແຂວງຈຳປາສັກ ຈຶ່ງໄດ້ຈັດກອງປະຊຸມປະເມີນຜົນການປະຕິບັດລັດຖະທຳມະນູນ ສະບັບປີ 2015 ໂດຍການເປັນປະທານຂອງທ່ານ ສົມມາດ ພົລເສນາ ກຳມະການສູນກາງພັກ, ຮອງປະທານສະພາແຫ່ງຊາດ; ມີທ່ານ ອາລຸນໄຊ ສູນນະລາດ ເຈົ້າແຂວງໆຈຳປາສັກ, ປະທານສະພາປະຊາຊົນແຂວງ, ບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ, ການນຳຂອງແຂວງ, ອົງການ, ຂະແໜງການ ແລະ ບັນດາທ່ານເຈົ້າເມືອງ, ຮອງເຈົ້າເມືອງທົ່ວແຂວງຈຳປາສັກ ແລະ ແຂກຖືກເຊີນ ເຂົ້າຮ່ວມຫຼາຍກວ່າ 150 ທ່ານ.

ທ່ານ ສົມມາດ ພົລເສນາ ໄດ້ກ່າວວ່າ: ເພື່ອເຮັດໃຫ້ການປະເມີນຜົນການປະຕິບັດລັດຖະທຳມະນູນຢູ່ແຂວງຈຳ ປາສັກ ໄດ້ຮັບໝາກຮັບຜົນ ແລະ ແທດເໝາະກັບສະພາບການຕົວຈິງຂອງແຂວງ, ຂໍໃຫ້ຜູ້ເຂົ້າຮ່ວມຈົ່ງລົງເລິກຕີລາຄາການປະຕິບັດລັດຖະທຳມະນູນ ຕິດພັນກັບການປະຕິບັດກົດໝາຍ ແລະ ນິຕິກຳໃຕ້ກົດໝາຍ ຂອງບັນດາອົງການ, ຂະແໜງການຂັ້ນແຂວງ, ຂັ້ນເມືອງ ແລະ ຂັ້ນຮາກຖານ ເປັນຕົ້ນການສ້າງຄວາມຮັບຮູ້, ເຂົ້າໃຈທີ່ຖືກຕ້ອງຕໍ່ລັດຖະທໍາມະນູນ ແລະ ກົດໝາຍ ຕິດພັນກັບການສ້າງສະຕິເຄົາລົບ ແລະ ປະຕິບັດລັດຖະທໍາມະນູນ ແລະ ກົດໝາຍ ໃນຖັນແຖວພະນັກ ງານ-ລັດຖະກອນ, ສະມາຊິກພັກ, ນັກຮຽນຮູ້ປັນຍາຊົນ, ນັກທຸລະກິດ ແລະ ປະຊາຊົນບັນດາເຜົ່າ. ພ້ອມກັນນີ້, ກໍໃຫ້ມີຄໍາຄິດຄໍາເຫັນຕໍ່ການປັບປຸງເນື້ອໃນຂອງລັດຖະທໍາມະນູນ ໂດຍສະເພາະໝວດວ່າດ້ວຍສະພາປະຊາຊົນຂັ້ນແຂວງ, ໝວດວ່າດ້ວຍອົງການປົກຄອງທ້ອງຖິ່ນ; ການປະຕິບັດສິດ ແລະ ພັນທະຂອງພົນລະເມືອງລາວ.

ໃນກອງປະຊຸມ, ໄດ້ຮັບຟັງການສະເໜີບົດປະເມີນການປະຕິບັດລັດຖະທຳມະນູນ ສະບັບປີ 2015 ຈາກທ່ານ ອຳໄພ ຈິດມານົນ ຮອງປະທານກຳມາທິການກົດໝາຍ ເຊິ່ງທ່ານໃຫ້ຮູ້ວ່າ: ການປັບປຸງລັດຖະທຳມະນູນຄັ້ງນີ້ ຈະສຸມໃສ່ຄົ້ນຄວ້າ, ປັບປຸງເນື້ອໃນໃຫຍ່ທີ່ສຳຄັນຈຳນວນໜຶ່ງ ຫາກບໍ່ແມ່ນປັບປຸງໝົດສະບັບ ເຊັ່ນ: 1) ການກໍານົດບົດບາດນໍາພາຂອງພັກ; 2) ຈຸດໝາຍສັງຄົມນິຍົມ; 3) ການສ້າງເສດຖະກິດເອກະລາດເປັນເຈົ້າຕົນເອງ; 4) ການກຳນົດທີ່ຕັ້ງ, ພາລະບົດບາດ, ສິດ ແລະ ໜ້າທີ່ ຂອງບັນດາອົງການອຳນາດແຫ່ງລັດຂັ້ນສູນກາງ; 5) ການກໍານົດການແບ່ງຂັ້ນການປົກຄອງທ້ອງຖິ່ນ ເປັນຕົ້ນຂັ້ນຕາແສງ ລວມທັງການກໍານົດທີ່ຕັ້ງ, ພາລະບົດບາດ, ສິດ ແລະ ໜ້າທີ່, ສາຍພົວພັນສາຍຕັ້ງ ແລະ ສາຍຂວາງ ຂອງອົງການປົກຄອງທ້ອງຖິ່ນແຕ່ລະຂັ້ນ; 6) ການແບ່ງຂັ້ນຄຸ້ມຄອງລະຫວ່າງສູນກາງ ກັບ ແຂວງ-ນະຄອນຫຼວງ, ລະຫວ່າງແຂວງ-ນະຄອນຫຼວງ ກັບ ຂັ້ນເມືອງ-ນະຄອນ, ຂັ້ນຕາແສງ ແລະ ຂັ້ນບ້ານ. ນອກຈາກເນື້ອໃນໃຫຍ່ດັ່ງ ກ່າວນີ້ ອາດຈະຄົ້ນຄວ້າ, ປັບປຸງບາງເນື້ອໃນຍ່ອຍທີ່ເຫັນວ່າມີຄວາມສຳຄັນ ແລະ ຈຳເປັນ.

ຈາກນັ້ນ, ໄດ້ມີການປະກອບຄຳເຫັນລວມທັງຂໍ້ສະເໜີຕ່າງໆຈາກຕາງໜ້າຂົງເຂດອົງການຈັດຕັ້ງພັກ, ແນວລາວສ້າງຊາດ, ສະຫະພັນນັກຮົບເກົ່າ ແລະ ອົງການຈັດຕັ້ງມະຫາຊົນ; ຂົງເຂດສະພາປະຊາຊົນແຂວງ, ອົງການໄອຍະການປະຊາຊົນແຂວງ, ສານປະຊາຊົນແຂວງ, ອົງການກວດສອບປະຈຳພາກໃຕ້; ຂົງເຂດອົງການປົກຄອງແຂວງ; ກຸ່ມເສດ ຖະກິດ, ຜູ້ປະກອບການ, ວິສາຫະກິດ ແລະ ບັນດາອົງການປົກຄອງນະຄອນ-ເມືອງພາຍໃນແຂວງຈຳປາສັກ.

(ພາບ ແລະ ຂ່າວ: ນາງ ກຸກກິກ ບຸດດາໄຊ)