(ສພຊ) – ກອງປະຊຸມປະເມີນຜົນການຈັດຕັ້ງປະຕິບັດລັດຖະທຳມະນູນ ສະບັບປີ 2015 ຢູ່ເເຂວງຫົວພັນ ໄດ້ຈັດຂຶ້ນໃນວັນທີ 29 ກໍລະກົດນີ້ ທີ່ຫ້ອງປະຊຸມພະແນກແຜນການ ແລະ ການລົງທຶນ ໂດຍການເປັນປະທານຮ່ວມຂອງທ່ານ ນາງ ອໍາໄພວອນ ລ້ອມບຸນແພງ ກຳມະການສໍາຮອງສູນກາງພັກ, ເລຂາທິການສະພາແຫ່ງຊາດ, ກຳມະການຄະນະກຳມະການລະດັບຊາດປັບປຸງລັດຖະທຳມະນູນ (ຄລຊ) ແລະ ທ່ານ ຄໍາແພງ ວິລະພັນ ປະທານກໍາມາທິການກົດໝາຍ, ກຳ ມະການ ຄລຊ; ມີຮອງເຈົ້າແຂວງ, ປະທານສະພາປະຊາຊົນແຂວງ, ຄະນະຮັບຜິດຊອບປັບປຸງລັດຖະທຳມະນູນຈາກສະ ພາແຫ່ງຊາດ, ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 8, ສະມາຊິກສະພາປະຊາຊົນແຂວງປະຈໍາເຂດເລືອກຕັ້ງເມືອງ, ອົງການໄອຍະການປະຊາຊົນແຂວງ, ສານປະຊາຊົນແຂວງ, ເຈົ້າເມືອງ/ຮອງເຈົ້າເມືອງ, ຫົວໜ້າ/ຮອງຫົວໜ້າພະແນກການ-ອົງການທຽບເທົ່າພະແນກການ, ອະດີດການນຳຂອງແຂວງ ຕະຫຼອດຮອດແຂກຖືກເຊີນ ເຂົ້າຮ່ວມ 120 ທ່ານ ຍິງ 27 ທ່ານ.

ຈຸດປະສົງກໍເພື່ອຕີລາຄາການໂຄສະນາເຜີຍແຜ່ ແລະ ເຊື່ອມຊຶມລັດຖະທຳມະນູນ ຕິດພັນກັບການສ້າງສະຕິເຄົາລົບ ແລະ ປະຕິບັດລັດຖະທຳມະນູນຢູ່ທົ່ວແຂວງຫົວພັນ; ການຜັນຂະຫຍາຍລັດຖະທຳມະນູນເປັນກົດໝາຍ ແລະ ນິຕິກຳໃຕ້ກົດໝາຍ; ຕີລາຄາການຈັດຕັ້ງປະຕິບັດລັດຖະທຳມະນູນ ໃຫ້ເຫັນໄດ້ຜົນສໍາເລັດ, ດ້ານດີ, ດ້ານອ່ອນ ແລະ ສາເຫດທີ່ພາໃຫ້ມີດ້ານດີ, ດ້ານອ່ອນ, ບົດຮຽນຢູ່ແຂວງຫົວພັນ.

ທ່ານ ນາງ ອໍາໄພວອນ ລ້ອມບຸນແພງ ໄດ້ມີຄຳເຫັນວ່າ: ເພື່ອເຮັດໃຫ້ການປະເມີນຜົນການຈັດຕັ້ງປະຕິບັດລັດ ຖະທຳມະນູນຢູ່ແຂວງຫົວພັນ ໄດ້ຮັບໝາກຮັບຜົນ ແລະ ແທດເໝາະກັບສະພາບການຕົວຈິງຂອງທ້ອງຖິ່ນ, ສະເໜີໃຫ້ບັນດາທ່ານຈົ່ງລົງເລິກຕີລາຄາການຈັດຕັ້ງປະຕິບັດລັດຖະທຳມະນູນ ໂດຍຕິດພັນກັບການປະຕິບັດກົດໝາຍ ແລະ ນິຕິກຳໃຕ້ກົດໝາຍ ຂອງບັນດາຂະແໜງການ, ອົງການຂັ້ນແຂວງ, ຂັ້ນເມືອງ ແລະ ຂັ້ນຮາກຖານ ເປັນຕົ້ນການສ້າງຄວາມຮັບຮູ້, ເຂົ້າໃຈ ທີ່ຖືກຕ້ອງຕໍ່ລັດຖະທໍາມະນູນ ແລະ ກົດໝາຍ, ການສ້າງສະຕິເຄົາລົບ ແລະ ປະຕິບັດລັດຖະທໍາມະນູນ ແລະ ກົດໝາຍ ໃນຖັນແຖວພະນັກງານ-ລັດຖະກອນ, ສະມາຊິກພັກ, ນັກຮຽນຮູ້ປັນຍາຊົນ, ນັກທຸລະກິດ ແລະ ປະ ຊາຊົນບັນດາເຜົ່າຢູ່ແຂວງຫົວພັນ. ພ້ອມກັນນີ້, ກໍໃຫ້ສະເໜີຄໍາຄິດຄໍາເຫັນຕໍ່ການປັບປຸງລັດຖະທໍາມະນູນ ໂດຍສະເພາະການປັບປຸງເນື້ອໃນໝວດວ່າດ້ວຍສະພາປະຊາຊົນຂັ້ນແຂວງ, ອົງການປົກຄອງຂັ້ນແຂວງ, ຂັ້ນເມືອງ, ຂັ້ນຕາແສງ ແລະ ຂັ້ນບ້ານ; ການປະຕິບັດສິດ ແລະ ພັນທະຂອງພົນລະເມືອງລາວ, ຊາວຕ່າງດ້າວ ແລະ ຄົນບໍ່ມີສັນຊາດຢູ່ແຂວງຫົວພັນ.

ຜູ້ເຂົ້າຮ່ວມໄດ້ຮັບຟັງການສະເໜີບົດປະເມີນການຈັດຕັ້ງປະຕິບັດລັດຖະທຳມະນູນ ສະບັບປີ 2015 ຈາກທ່ານ ຄໍາແພງ ວິລະພັນ ຄະນະອະນຸກຳມະການເນື້ອໃນຂອງ ຄລຊ; ບົດສັງລວມຫຍໍ້ການປະເມີນລັດຖະທໍາມະນູນ ສະບັບປີ 2015 ທົ່ວແຂວງ ຈາກຕາງໜ້າຂົງເຂດສະພາປະຊາຊົນແຂວງ, ສານປະຊາຊົນແຂວງ, ອົງການໄອຍະການປະຊາຊົນແຂວງ, ອົງການກວດກາລັດແຂວງ; ບົດລາຍງານການຄົ້ນຄວ້າຈາກຂົງເຂດອົງການປົກຄອງແຂວງ ແລະ ການຈັດຕັ້ງພັກ, ແນວລາວສ້າງຊາດ, ສະຫະພັນນັກຮົບເກົ່າ ແລະ ອົງການຈັດຕັ້ງມະຫາຊົນ; ຂົງເຂດປ້ອງກັນຊາດ-ປ້ອງກັນຄວາມສະ ຫງົບ ແລະ ບັນດາຂົງເຂດອົງການປົກຄອງເມືອງພາຍໃນແຂວງຫົວພັນ.

ຈາກນັ້ນ, ຕົວແທນຈາກພາກສ່ວນຕ່າງໆ ແລະ ບັນດາທ່ານທີ່ເຂົ້າຮ່ວມກອງປະຊຸມ ໄດ້ປະກອບຄຳເຫັນຢ່າງກົງໄປກົງມາ ລວມທັງຂໍ້ສະເໜີຕ່າງໆຕໍ່ກັບການປັບປຸງເນື້ອໃນລັດຖະທຳມະນູນ.

(ພາບ-ຂ່າວ: ນາງ ກົງໃຈ ແສງອໍາພັນ)