(ສພຊ) – ກອງປະຊຸມປະເມີນການຈັດຕັ້ງປະຕິບັດປຶ້ມຄູ່ມືການພົບປະປະຊາ ຊົນຂອງສະມາຊິກສະພາແຫ່ງຊາດ (ສສຊ) ແລະ ສະມາຊິກສະພາປະຊາຊົນຂັ້ນແຂວງ ໂດຍການເປັນປະທານຂອງທ່ານ ສຸບັນ ສະວະບຸດ ປະທານກຳມາທິການວຽກງານສະ ມາຊິກສະພາແຫ່ງຊາດ (ກວສຊ); ມີບັນດາທ່ານຮອງປະທານກຳມາທິການດັ່ງກ່າວ, ປະທານ-ຮອງປະທານ, ຄະນະເລຂາທິການ ແລະ ພະນັກງານຂະແໜງຊ່ວຍວຽກ ສສຊ ຈາກສະພາປະຊາຊົນແຂວງ (ສພຂ) 9 ແຂວງຄື: ຜົ້ງສາລີ, ຫຼວງນ້ຳທາ, ອຸດົມໄຊ, ບໍ່ແກ້ວ, ຫຼວງພະບາງ, ໄຊຍະບູລີ, ຫົວພັນ, ຊຽງຂວາງ ແລະ ວຽງຈັນ ພ້ອມດ້ວຍພາກສ່ວນທີ່ກ່ຽວຂ້ອງ ເຂົ້າຮ່ວມຢ່າງພ້ອມພຽງ.

ທ່ານ ສຸບັນ ສະວະບຸດ ໃຫ້ຮູ້ວ່າ: ຈຸດປະສົງຂອງກອງປະຊຸມຄັ້ງນີ້ ເພື່ອປະເມີນຄືນຜົນການທົດລອງນໍາໃຊ້ປຶ້ມຄູ່ມືການພົບປະປະຊາຊົນໃນໄລຍະຜ່ານມາ ໃຫ້ເຫັນດ້ານດີ, ຂໍ້ຄົງຄ້າງ ແລະ ທິດທາງປັບ ປຸງແກ້ໄຂ; ເພື່ອແລກປ່ຽນຄໍາເຫັນຂອງບັນດາທ່ານຜູ້ແທນທົ່ວປະເທດ ແລະ ປັບປຸງຄືນເນື້ອໃນປຶ້ມຄູ່ມືດັ່ງ ກ່າວໃຫ້ສົມບູນ, ສອດ ຄ່ອງກັບສະພາບຕົວຈິງ ແລະ ສາມາດນໍາໃຊ້ໄດ້ຍາວນານ.

ຜູ້ເຂົ້າຮ່ວມໄດ້ຮັບຟັງການສະເໜີບົດປະເມີນການຈັດຕັ້ງປະຕິບັດມະຕິຂອງຄະນະປະຈຳສະພາແຫ່ງຊາດ (ຄປຈສພຊ) ແລະ ປຶ້ມຄູ່ມືການລົງພົບປະປະຊາຊົນ ຈາກ ກວສຊ, ສັງລວມການພົບປະປະ ຊາຊົນ ໂດຍລົງເລິກການພົບປະປົກກະຕິ ແລະ ພົບປະສະເພາະ ຈາກ ສພຂ ຫຼວງນ້ຳທາ, ການກະກຽມໃຫ້ແກ່ການພົບປະ ຕາມມະຕິຂອງ ຄປຈສພຊ ຈາກ ສພຂ ອຸດົມໄຊ, ການດໍາເນີນການພົບປະ ຕາມມະຕິຂອງ ຄປຈສພຊ ຈາກ ສພຂ ຫຼວງພະບາງ, ການຈັດຕັ້ງປະຕິບັດຜົນການພົບປະ ຕາມມະຕິຂອງ ຄປຈສພຊ ຈາກ ສພຂ ວຽງຈັນ; ຈາກນັ້ນ, ກໍໄດ້ຄົ້ນຄວ້າ, ສົນທະນາແລກປ່ຽນຄຳຄິດເຫັນຢ່າງມີຈຸດສຸມ ແລະ ຖືກປະເດັນ, ມີລັກສະນະຫຼັກ ການ ເພື່ອເຮັດໃຫ້ເນື້ອໃນມີຄວາມຊັດເຈນ ແລະ ສາມາດນຳໄປຈັດຕັ້ງປະຕິບັດໄດ້.

ກອງປະຊຸມຄັ້ງນີ້ ດຳເນີນລະຫວ່າງວັນທີ 31 ຕຸລາ – 2 ພະຈິກ 2024 ໂດຍໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກອົງການເຮວວີຕັສ (Helvetas) ໂດຍຜ່ານກອງເລຂາຄຸ້ມຄອງແຫຼ່ງທຶນຊ່ວຍເຫຼືອລ້າໃຫ້ແກ່ສະພາແຫ່ງ ຊາດ ສົມທົບກັບງົບປະມານຂອງຄະນະເລຂາທິການສະພາແຫ່ງຊາດ.

(ນາງ ອາລິນ ສຸພິມມະປະດິດ)