ໂດຍປະຕິບັດຕາມແຜນການເຄື່ອນໄຫວ ຕິດຕາມກວດກາວຽກງານຂົງເຂດປ້ອງກັນຊາດ-ປ້ອງກັນຄວາມສະຫງົບ ຂອງສະພາປະຊາຊົນແຂວງ, ເນື່ອງໃນໂອກາດທີ່ໄດ້ລົງເຄື່ອນໄຫວ ທີ່ເມືອງໄຊພູທອງ, ເມືອງສອງຄອນ ແລະ ນະຄອນໄກສອນພົມວິຫານ ໃນລະຫວ່າງວັນທີ 20-24 ພຶດສະພາ 2024 ທີ່ຜ່ານມານີ້; ທ່ານ ກົງແກ້ວ ມີວໍລະຈັກ ຮອງເລຂາພັກແຂວງ, ປະທານສະພາປະຊາຊົນແຂວງ ແລະ ທ່ານ ນາງພູທອນ ແກ້ວພູວົງ ຮອງປະທານສະພາປະຊາຊົນແຂວງ, ທ່ານເລຂາທິການສະພາປະຊາຊົນແຂວງ, ທ່ານຮອງປະທານຄະນະກໍາມະການຍຸຕິທໍາ ແລະ ປກຊ-ປກສ ແລະ ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງ-ນະຄອນ ພ້ອມຄະນະ ໄດ້ລົງເຄື່ອນໄຫວພົບປະຢ້ຽມຢາມ ກອງຮ້ອຍທະຫານຊາຍແດນ 324,325,326 ແລະ 327 ໂດຍໃຫ້ການຕ້ອນຮັບຈາກຄະນະພັກ-ຄະນະບັນຊາ, ບັນດານາຍທະຫານ ໃນ 04 ກົມກອງ ດ້ວຍຄວາມອົບອຸ່ນ ແລະ ເປັນກັນເອງ.

     ໃນໂອກາດທີ່ໄດ້ລົງພົບປະຢ້ຽມຢາມຄັ້ງນີ້ທາງຄະນະກໍ່ໄດ້ຮັບຟັງການລາຍງານສະພາບການປະຕິບັດໜ້າທີ່ຜ່ານມາໂດຍຫຍໍ້ ເຊິ່ງໄດ້ຍົກໃຫ້ເຫັນຂໍ້ສະດວກ, ຫຍຸ້ງຍາກ ແລະ ສະພາບການທີ່ເກີດຂຶ້ນໃນປະຈຸບັນ, ພາຍຫຼັງທີ່ໄດ້ຮັບຟັງການລາຍງານແລ້ວ ທ່ານປະທານກອງປະຊຸມກໍ່ໄດ້ຍ້ອງຍໍຊົມເຊີຍຕໍ່ກັບຜົນງານທີ່ແຕ່ລະກອງຮ້ອຍທະຫານຊາຍແດນຍາດມາໄດ້, ພ້ອມທັງໄດ້ແລກປ່ຽນຄໍາຄິິດຄໍາເຫັນບາງບັນຫາທີ່ເປັນປະກົດຫຍໍ້ທໍ້ເກີດຂຶ້ນໃນສັງຄົມໂດຍສະເພາະ ການລັກລອບເຂົ້າ-ອອກປະເທດທີ່ຜິດກົດໝາຍຂອງພໍ່ແມ່ປະຊາຊົນ ໃນເຂດຄຸ້ມຄອງຂອງແຕ່ລະພາກສ່ວນແມ່ນມີມູນຄວາມຈິງຄືແນວໃດ, ການດູດແຮ່ຊາຍຕາມລໍາແມ່ນນໍ້າຂອງແຕ່ລະບໍລິສັດແມ່ນປະຕິບັດຄືແນວໃດ, ການຄຸ້ມຄອງປະເພດເຮືອຂອງພໍ່ແມ່ປະຊາຊົນຕາມລໍາແມ່ນໍ້າຂອງ ສາມາດເກັບກໍາສະຖິຕິການນໍາໃຊ້ໄດ້ແລ້ວບໍ ແລະ ວຽກງານອື່ນທີ່ອອກໃນຊື່ອອນລາຍທີ່ປະຊາຊົນໃຫ້ຄວາມສົນໃຈ; ຕໍ່ຈາກນັ້ນກໍ່ໄດ້ຮັບຟັງການຊີ້ແຈງຈາກບັນດາກອງຮ້ອຍຕໍ່ກັບຄໍາແຈະຈິ້ມທີ່ປະທານໄດ້ມີຄໍາເຫັນໄປນັ້ນ ຢ່າງລະອຽດ ແລະ ຕໍ່ກັບຄໍາສະເໜີຂອງແຕ່ລະກ້ອງຮ້ອຍທີ່ສະເໜີນັ້ນ ຈະໄດ້ປະສານສົມທົບກັບພາກສ່ວນທີ່ກ່ຽວຂ້ອງ ເພື່ອຄົ້ນຄວ້າພິຈາລະນາແກ້ໄຂໃນຕໍ່ໜ້າ.