ໃນວັນທີ 14 ສິງຫາ 2024, ທ່ານ ອານຸພາບ ຕະນາລົມ, ປະທານ ຄະນະສະມາຊິກສະພາແຫ່ງຊາດແຫ່ງຊາດ ປະຈຳເຂດເລືອກຕັ້ງທີ 1 ນວ, ປະທານ ສະພາປະຊາຊົນ ນະຄອນຫຼວງວຽງຈັນ ພ້ອມດ້ວຍຄະນະ ໄດ້ລົງພົບປະພະນັກງານອ້ອມຂ້າງເມືອງ ແລະ ນາຍບ້ານທົ່ວເມືອງສັງທອງ ເພື່ອເຜີຍແຜ່ຜົນສຳເລັດກອງປະຊຸມສະໄໝສາມັນ ເທ່ືອທີ 7 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນ ນວ ຊຸດທີ II ຢູ່ທີ່ຫ້ອງວ່າການປົກຄອງ ເມືອງສັງທອງ, ໃຫ້ການຕ້ອນຮັບຄະນະໂດຍ ທ່ານ ພົງສະຫວັນ ສີລິພັນ, ເຈົ້າເມືອງສັງທອງ, ບັນດາທ່ານ ຮອງເຈົ້າເມືອງ ພ້ອມດ້ວຍຄະນະນຳຂອງເມືອງ ຈຳນວນໜຶ່ງ. ໃນໂອກາດນີ້, ໄດ້ຮັບຟັງສະພາບການລາຍງານເສດຖະກິດ-ສັງຄົມ ຂອງເມືອງໂດຍຫຍໍ້ຂອງເມືອງສັງທອງ ເປັນຕົ້ນ: ການຈັດຕັ້ງປະຕິບັດການເກັບລາຍຮັບເຂົ້າງົບປະມານ, ວຽກງານປ້ອງກັນຊາດ-ປ້ອງກັນຄວາມສະຫງົບ, ວຽກພັດທະນາຊົນນະບົດ ແລະ ແກ້ໄຂຄວາມທຸກຍາກ ເຊິ່ງທົ່ວເມືອງສັງທອງ ມີບ້ານພົ້ນທຸກ 35 ບ້ານ ກວມເອົາຮ້ອຍສ່ວນຮ້ອຍ, ມີຄອບຄົວພົ້ນທຸກ 6,287 ຄອບຄົວ, ຍັງບໍ່ພົ້ນທຸກ 360 ຄອບຄົວ, ໄດ້ສຸມໃສ່ວຽກງານສ້າງບ້ານໃຫຍ່ກາຍເປັນຕົວເມືອງນ້ອຍໃນຊົນນະບົດໃນ 02 ບ້ານຈຸດສຸມ ໂດຍສະເພາະຈຸດສຸມບ້ານໃຫຍ່ນາຈະເລີນ ໃຫ້ສາມາດປະກາດເປັນຕົວເມືອງນ້ອຍໃນທ້າຍປີ 2024.
ພາຍຫຼັງໄດ້ຮັບຟັງການລາຍງານຂອງທ່ານເຈົ້າເມືອງ, ທ່ານ ອານຸພາບ ຕຸນາລົມ ກໍໄດ້ໃຫ້ກຽດເຜີຍແຜ່ຜົນສຳເລັດກອງປະຊຸມສະໄໝສາມັນ ເທ່ືອທີ 7 ຂອງສະພາແຫ່ງຊາດ ຊຸດທີ IX ເຊິ່ງໄດ້ຍົກໃຫ້ເຫັນບັນດາວຽກງານຕ່າງໆ ທີ່ກອງປະຊຸມໄດ້ພິຈາລະນາ ເຊັ່ນ: ຂົງເຂດວຽກງານຂອງລັດຖະບານ ເປັນຕົ້ນ: ບົດລາຍງານໂດຍສັງເຂບຂອງ ທ່ານນາຍົກລັດຖະມົນຕີ ກ່ຽວກັບສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ແຜນເງິນຕາ ຕິດພັນກັບການຈັດຕັ້ງປະຕິບັດ 02 ວາລະແຫ່ງຊາດ ໄລຍະ 06 ເດືອນຕົ້ນປີ ແລະ ທິດທາງແຜນການ 06 ເດືອນທ້າຍປີ 2024, ບົດລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ 06 ເດືອນຕົ້ນປີ ແລະ ທິດທາງແຜນການ 06 ເດືອນທ້າຍປີ 2024, ບົດລາຍງານການຈັດຕັ້ງປະຕິບັດໂຄງການລົງທຶນແຮ່ທາດໃນໄລຍະຜ່ານມາ ແລະ ແຜນຈັດຕັ້ງປະຕິບັດວຽກງານໃນຕໍ່ໜ້າ ຕິດພັນກັບການຈັດຕັ້ງປະຕິບັດມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງວິໃສທັດຮອດປີ 2040 ແລະ ຍຸດທະສາດພັດທະນາ ຮອດປີ 2030, ພິຈາລະນາຂົງເຂດວຽກງານການກວດສອບ, ວຽກງານສະພາແຫ່ງຊາດ, ການສ້າງ ແລະ ປັບປຸງກົດໝາຍ ແລະ ວຽກງານການປັບປຸງບຸກຄະລາກອນ. ນອກຈາກນີ້, ບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ ນວ ກໍໄດ້ພັດປ່ຽນກັນເຜີຍແຜ່ຜົນສຳເລັດກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນ ນວ.
ໃນການລົງພົບປະ ແລະ ເຜີຍແຜ່ຜົນສຳເລັດກອງປະຊຸມຄັ້ງນີ້, ຍັງໄດ້ຮັບຟັງຄຳສະເໜີກ່ຽວກັບບັນຫາຕ່າງໆ ທີ່ຢາກໃຫ້ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ ນວ ຊ່ວຍພິຈາລະນາ ແລະ ແກ້ໄຂ ເຊິ່ງບັນຫາທີ່ທາງເມືອງສັງທອງ ໄດ້ສະເໜີມີຄື: ການຂຸດຄົ້ນແຮ່ຊາຍສາຍນໍ້າສັງທີ່ເປັນການອະນຸຍາດຂອງແຂວງວຽງຈັນ ເຮັດໃຫ້ນໍ້າຂຸ່ນ ສົ່ງຜົນກະທົບຕໍ່ສິ່ງແວດລ້ອມ ແລະ ການດຳລົງຊີວິດຂອງປະຊາຊົນທີ່ອາໃສຢູ່ຕອນລຸ່ມຂອງສາຍນໍ້າສັງ. ນອກນີ້ ຍັງໄດ້ສະເໜີຂໍຍົກເວັ້ນພາສີການປູກເຂົ້າ, ການຄວບຕຳແໜ່ງນາຍບ້ານ ແລະ ເລຂາພັກບ້ານ ເຮັດໃຫ້ເພີ່ມວຽກຫຼາຍ ແຕ່ເງິນອຸດໜູນພັດໜ້ອຍ, ສະເໜີໃຫ້ຄົ້ນຄວ້າພິຈາລະນາການຂຸດຄົ້ນບໍ່ແຮ່, ຫີນຊາຍ ແລະ ການບັນທຸກຂົນສົ່ງໃນລະດູຝົນ ສົ່ງຜົນກະທົບໃຫ້ເສັ້ນທາງເປ່ເພ ເຊິ່ງສະເໜີໃຫ້ມີການກວດກາແກ້ໄຂ.
