(ສພຊ) ຕອນບ່າຍວັນສຸກທີ 18 ມັງກອນ ຜ່ານມາ ທີ່ສະພາແຫ່ງຊາດ, ສະຫາຍ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກປະຊາຊົນປະຕິວັດລາວ, ປະທານສະພາແຫ່ງຊາດ ໄດ້ຕ້ອນຮັບການຢ້ຽມຂໍ່ານັບຂອງສະຫາຍ ໄປ ມາ ສີ ຫລິນ ກໍາມະການສູນກາງພັກຄອມມູນິດຈີນ, ຮອງປະທານສະພາຜູ້ແທນປະຊາຊົນທົ່ວປະເທດຈີນ ພ້ອມດ້ວຍຄະນະ ເນື່ອງໃນໂອກາດຢ້ຽມຢາມສັນຖະວະໄມຕີຢູ່ ສປປລາວ ຢ່າງເປັນທາງການ ລະຫວ່າງວັນທີ 17-20 ມັງກອນ 2019.

ໂອກາດດັ່ງກ່າວ, ສະຫາຍ ນາງ ປານີ ຢາທໍ່ຕູ້ ໄດ້ສະແດງຄວາມຍິນດີຕ້ອນຮັບ  ສະຫາຍ ໄປ ມາ ສີ ຫລິນ ດ້ວຍຄວາມຈິງໃຈ ພ້ອມທັງຕີລາຄາສູງຕໍ່ການເດີນທາງມາຢ້ຽມຢາມ ແລະ ເຮັດວຽກຢູ່ ສປປລາວ ໃນຄັ້ງນີ້ ເຊິ່ງເປັນການນໍາເອົາໄມຕີຈິດມິດຕະພາບ, ຄວາມສາມັກຄີມາຍັງ ສປປລາວ ທັງເປັນການປະກອບສ່ວນອັນສໍາຄັນເຂົ້າໃນການເສີມສ້າງສາຍພົວພັນມິີດຕະພາບທີ່ເປັນມູນເຊື້ອ ແລະ ການຮ່ວມມືແບບຄູ່ຮ່ວມມືຍຸດທະສາດຮອບດ້ານ ໝັ້ນຄົງ ຍາວນານ ຕາມທິດ 4 ດີ ກໍ່ຄືການກໍ່ສ້າງເປັນຄູ່ຮ່ວມສະຕາກໍາສັງຄົມນິຍົມອັນດຽວກັນລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ, ເປັນການເປີດສາກປີທ່ອງທ່ຽວ ລາວ-ຈີນ ປີ 2019.  ນອກຈາກນັ້ນ, ສະຫາຍປະທານ ສພຊ ຍັງໄດ້ກ່າວຊົມເຊີຍຕໍ່ຜົນສໍາເລັດອັນສະຫງ່າງາມ ຂອງການຈັດຕັ້ງປະຕິບັດກອງປະຊຸມໃຫຍ່ຄັ້ງທີ 19 ຂອງພັກຄອມມູນິດຈີນ ທີ່ມີ ສະຫາຍ ສີ ຈິນຜິງ ເລຂາທິການໃຫຍ່ຄະນະບໍລິຫານສູນກາງພັກກອມມູນິດຈີນເປັນແກນກາງ ແລະ ນຳໜ້າໃນການນໍາພາ; ສະຫາຍຍັງໄດ້ຕີລາຄາສູງຕໍ່ຜົນການພົບປະລະຫວ່າງສອງສະຫາຍຮອງປະທານສະພາແຫ່ງຊາດ ລາວ-ຈີນ ກ່ອນໜ້ານີ້. ພ້ອມນັ້ນ ສະຫາຍປະທານສະພາແຫ່ງຊາດຍັງໄດ້ສະເໜີ ໃຫ້ສະຫາຍຮອງປະທານສະພາ ຈົ່ງສືບຕໍ່ຮ່ວມມືຊ່ວຍເຫລືອ ໃຫ້ຫລາຍຂຶ້ນກວ່າເກົ່າເປັນຕົ້ນແມ່ນ ສະເໜີໃຫ້ມີການເພີ່ມພົບປະແລກປ່ຽນຄະນະຜູ້ແທນໄປມາຢ້ຽມຢາມເຊິ່ງກັນ ແລະ ກັນ ແລະ ທຸກຄັ້ງທີ່ຄະນະຜູ້ແທນສະພາປະຊາຊົນທົ່ວປະເທດຈີນ ເດີນທາງມາຢ້ຽມຢາມ ສປປລາວ ກໍ່ໃຫ້ນໍາຊ່ຽວຊານມາປະຖະກະຖາ, ສໍາມະນາກ່ຽວກັບຫົວຂໍ້ໃດໜຶ່ງຕາມທີ່ສະພາແຫ່ງຊາດລາວໃຫ້ຄວາມສົນໃຈ.

ໃນການຢ້ຽມຂໍ່ານັບ, ສະຫາຍ ໄປ ມາ ສີ ຫລິນ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ຈາກທ່ານປະທານສະພາແຫ່ງຊາດ ພ້ອມທັງລາຍງານຜົນການພົບປະກັບສະຫາຍຮອງປະທານສະພາແຫ່ງຊາດລາວໃຫ້ຮັບຊາບໂດຍສັງເຂບ ເຊິ່ງການມາຢ້ຽມຢາມລາວໃນຄັ້ງນີ້້້້ເປັນຄັ້ງທໍາອິດ ແຕ່ກໍ່ຮູ້ສຶກພາກພູມໃຈຫລາຍ; ປະເທດລາວສວຍງາມ, ປະຊາຊົນລາວເປັນຄົນມີນໍ້າໃຈ; ພ້ອມທັງກ່າວວ່າ ຍິນດີນໍາເອົາຂໍ້ສະເໜີຕ່າງໆໄປພິຈາລະນາ ແລະ ຕອບສະໜອງຕາມຄວາມຮຽກຮ້ອງຕ້ອງການ, ຈະສືບຕໍ່ເສີມຂະຫຍາຍສາຍພົວພັນມິດຕະພາບອັນດີງາມລະຫວ່າງສອງປະເທດ ແລະ ຈະເປັນອີກແຮງໜຶ່ງທີ່ຈະກະຕຸກຊຸກຍູ້ສາຍພົວພັນຂອງສອງສະພາແຫ່ງຊາດ ລາວ-ຈີນ ໃຫ້ເຂົ້າສູ່ລວງເລິກ.

(ສອນສັກ ວັນວິໄຊ)