(ສພຊ) ຕອນບ່າຍວັນທີ 30 ສິງຫາຜ່ານມາ, ທີ່ສະພາແຫ່ງຊາດ, ສະຫາຍ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ (ສພຊ) ໄດ້ຕ້ອນຮັບການເຂົ້າຢ້ຽມຂໍ່ານັບຂອງສະຫາຍ ລູເບັນ ເລມີໂກຍ ເຟີໂລ ປະທານສານປະຊາຊົນສູງສຸດ ແຫ່ງສາທາລະນະລັດກູບາ ພ້ອມດ້ວຍຄະນະ ເນື່ອງໃນໂອກາດຢ້ຽມຢາມ ແລະ ເຮັດວຽກຢູ່ ສປປລາວ ຢ່າງເປັນທາງການ ລະຫວ່າງວັນທີ 29 ສິງຫາ-1 ກັນຍາ 2019.

ໂອກາດດັ່ງກ່າວ, ສະຫາຍ ນາງ ປານີ ຢາທໍ່ຕູ້ ໄດ້ສະແດງຄວາມຍິນດີຕ້ອນຮັບ  ສະຫາຍ ລູເບັນ ເລມີໂກຍ ເຟີໂລ ດ້ວຍຄວາມຈິງໃຈ ພ້ອມທັງຕີລາຄາສູງຕໍ່ການເດີນທາງມາຢ້ຽມຢາມ ແລະ ເຮັດວຽກຢູ່ ສປປລາວ ໃນຄັ້ງນີ້ ເຊິ່ງ ສປປລາວ ແລະ ສ. ກູ​ບາ ແມ່ນສອງປະເທດຮ່ວມ​ອຸດົມ​ການອັນ​ດຽວ​ກັນ ​ອຸດົມ​ການ​ສັງຄົມ​ນິຍົມ. ພັກ, ລັດ ​ແລະ ປະຊາຊົນສອງປະເທດ ເຖິງວ່າຢູ່ຄົນລະທະວີບກໍຕາມ ເຄີຍມີມູນເຊື້ອພົວພັນຮ່ວມມືກັນ ແລະ ຊ່ວຍ​​ເຫລືອເຊື່ອໝັ້ນເຊິ່ງກັນ ແລະ ກັນ ມາແຕ່ດົນນານ. ໃນສະໄໝຕໍ່ສູ້ກູ້ຊາດ ຕ້ານ​ຈັກກະພັດ​ຜູ້​ຮຸກ​ຮານ ຂອງປະຊາຊົນລາວ ​ໂດຍ​ພາຍ​ໃຕ້​ການ​ນໍາພາ​ຂອງ​ພັກ​ປະຊາຊົນ​ປະຕິວັດລາວ ​ໃນ​ເມື່ອ​ກ່ອນ ພັກ-ລັດ ເເລະ ປະຊາຊົນ​ກູບາອ້າຍ​ນ້ອງ ໄດ້​ຊ່ວຍ​ເຫລືອ​ປະຊາຊົນ​ລາວໂດຍ​ດີ​ຕະຫລອດ​ມາ ​ໂດຍ​ໄດ້​ສົ່ງ​ຜູ້​ຊ່ຽວຊານ, ​ແພດ​ໝໍ ມາ​ຊ່ວຍ​ປະຊາຊົນ​ລາວ ເຊິ່ງພັກ, ລັດ ​ແລະ ປະຊາຊົນລາວ​ ຈົດ​ຈໍາ​ບໍ່​ມີ​ວັນ​ລືມ​ ມາໃນໄລຍະໃໝ່, ໄລຍະປັດຈຸບັນ, ສອງປະເທດ ໄດ້ສືບຕໍ່ເສີມຂະຫຍາຍສາຍພົວພັນຮ່ວມມືທີ່ມີແຕ່ດົນນານນັ້ນໃຫ້ນັບມື້ນັບຮັດແໜ້ນຢ່າງບໍ່ຢຸດຢັ້ງ, ຕີລາຄາສູງຕໍ່ຜົນສໍາເລັດຂອງການພົບປະລະຫວ່າງສອງສານປະຊາຊົນສູງສຸດລາວ ແລະ ກູບາ ເຊິ່ງເປັນພື້ນຖານສໍາຄັນໃຫ້ແກ່ການຮ່ວມມືຂອງສອງສານປະຊາຊົນ ລາວ-ກູບາ ໃນຕໍ່ໜ້າຢ່າງມີປະສິດທິຜົນ. ສະເໜີໃຫ້ສືບຕໍ່ຮ່ວມມືໃຫ້ຫລາຍກວ່າເກົ່າ ບໍ່ວ່າຈະເປັນການຮ່ວມມືທາງດ້ານເສດຖະກິດ-ສັງຄົມ, ສືບຕໍ່ແລກປ່ຽນບົດຮຽນຮ່ວມກັນໃນການປັບປຸງກົດໝາຍ ແລະ ດ້ານອື່ນໆ.

ໃນການຢ້ຽມຂໍ່ານັບ, ສະຫາຍ ລູເບັນ ເລມີໂກຍ ເຟີໂລ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ຈາກສະຫາຍປະທານສະພາແຫ່ງຊາດ ພ້ອມທັງລາຍງານຜົນການພົບປະສອງຝ່າຍລະຫວ່າງ ສອງສານປະຊາຊົນສູງສຸດລາວ ແລະ ກູບາ ໃຫ້ຮັບຊາບໂດຍສັງເຂບ ເຊິ່ງການມາຢ້ຽມຢາມລາວໃນຄັ້ງນີ້ເປັນຄັ້ງທໍາອິດ ຮູ້ສຶກພາກພູມໃຈຫລາຍປະເທດລາວສວຍງາມ, ປະຊາຊົນລາວເປັນຄົນມີນໍ້າໃຈ ພ້ອມທັງກ່າວວ່າຈະສືບຕໍ່ເສີມຂະຫຍາຍສາຍພົວພັນມິດຕະພາບອັນດີງາມ ລະຫວ່າງສອງປະເທດ ແລະ ຈະເປັນອີກແຮງໜຶ່ງທີ່ຈະກະຕຸກຊຸກຍູ້ສາຍພົວພັນຂອງສອງສະພາແຫ່ງຊາດລາວ-ກູບາ ໃຫ້ເຂົ້າສູ່ລວງເລິກ.