(ສພຊ) ວັນທີ 7 ມັງກອນ 2021, ທີ່ຫ້ອງປະຊຸມອົງການປົກຄອງເມືອງໄຊເສດຖາ ນະຄອນຫລວງວຽງຈັນ (ນວ), ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ  ພ້ອມດ້ວຍຄະນະ ໄດ້ເຄື່ອນໄຫວຕິດຕາມຊຸກຍູ້ວຽກງານການກະກຽມການເລືອກຕັ້ງສະມາຊິກສະພາແຫ່ງຊາດ (ສສຊ) ຊຸດທີ IX ປະຈຳເຂດເລືອກຕັ້ງທີ 1 ແລະ ສະມາຊິກສະພາປະຊາຊົນນະຄອນຫລວງວຽງຈັນ (ສສນວ) ຊຸດທີ II; ເຂົ້າຮ່ວມມີທ່ານ ອານຸພາບ ຕຸນາລົມ ປະທານສະພາປະຊາຊົນນະຄອນຫລວງວຽງຈັນ (ສປນວ), ມີທ່ານ ໂພຄໍາ ໄຊຍະສອນ ເຈົ້າເມືອງໄຊເສດຖາ ບັນດາທ່ານຄະນະກຳມະການເລືອກຕັ້ງຂັ້ນ ນວ, ຄະນະກຳມະການເລືອກຕັ້ງຂັ້ນເມືອງ, ບ້ານ  ແລະ ພາກສ່ວນກ່ຽວຂ້ອງ.

ໃນພິທີ, ທ່ານ ອານຸພາບ ຕຸນາລົມ ໄດ້ລາຍງານການກະກຽມເລືອກຕັ້ງ ສສຊ ຊຸດທີ IX ແລະ ສສນວ ຊຸດທີ II ວ່າ: ພາຍຫລັງທີ່ໄດ້ຮັບລັດຖະດໍາລັດ, ມະຕິຂອງກົມການເມືອງສູນກາງພັກ, ແຈ້ງການ ແລະ ຄຳແນະນຳຂອງຄະນະກຳມະການເລືອກຕັ້ງລະດັບຊາດ ແລະ ເອກະສານອື່ນໆທີ່ຕິດພັນກັບວຽກງານເລືອກຕັ້ງ. ສປນວ ໄດ້ປະສານສົມທົບກັບອົງການປົກຄອງນະຄອນຫລວງ ໃນການອອກຂໍ້ຕົກລົງແຕ່ງຕັ້ງຄະນະກຳມະການເລືອກຕັ້ງຂັ້ນ ນວ ແລະ ໄດ້ດຳເນີນກອງປະຊຸມຄັ້ງປະຖົມມະລືກຂອງຕົນ ເພື່ອປຶກສາຫາລືກະກຽມວຽກງານເລືອກຕັ້ງ ມີການແບ່ງງານ ແບ່ງຄວາມຮັບຜິດຊອບພາຍໃນຄະນະ ແລະ ແຕ່ງຕັ້ງອະນຸກຳມະການຊ່ວຍວຽກ ແລະ ຄະນະກຳມະການເລືອກຕັ້ງຂັ້ນ ນວ 5 ອະນຸກໍາມະການ;ພ້ອມນີ້, ຍັງໄດ້ສ້າງແຜນດຳເນີນງານເພື່ອກະກຽມວຽກງານເລືອກຕັ້ງອອກເປັນ 4 ບາດກ້າວ ແລະ ເອົາໃຈໃສ່ຊີ້ນຳ–ນໍາພາ ບັນດາອະນຸກຳມະການຊ່ວຍວຽກເຄື່ອນໄຫວຕາມສິດ ແລະ ໜ້າທີ່ຂອງແຕ່ລະອານຸກຳມະການ ເປັນຕົ້ນວຽກງານເລຂານຸການ ໄດ້ຈັດຕັ້ງຜັນຂະຫຍາຍແຈ້ງການ, ຄໍາແນະນຳ ແລະ ເອກະສານອື່ນໆ ທີ່ຕິດພັນກັບວຽກງານເລືອກຕັ້ງທີ່ຂັ້ນເທິງສົ່ງໃຫ້ທ້ອງຖິ່ນ ແລະ ບັນດາອະນຸກໍາມະການຊ່ວຍວຽກຂອງຄະນະກຳມະການເລືອກຕັ້ງຂັ້ນ ນວ ປັດຈຸບັນ ໄດ້ອອກແຈ້ງການ ແລະ ຄໍາແນະນຳ ກ່ຽວກັບວຽກງານເລືອກຕັ້ງຂອງຄະນະກຳມະການເລືອກຕັ້ງຂັ້ນ ນວ 19 ສະບັບ; ໄດ້ຂຶ້ນບັນຊີພົນລະເມືອງ ຜູ້ມີສິດເລືອກຕັ້ງ ແລະ ການກໍານົດໜ່ວຍປ່ອນບັດເລືອກຕັ້ງທົ່ວ ນວ ຄື: ມີພົນລະເມືອງທັງໝົດ 864.242 ຄົນ ຍິງ 440.348 ຄົນ ຜູ້ມີສິດປ່ອນບັດເລືອກຕັ້ງ 592.865 ຄົນ ຍິງ 280.208 ຄົນ ຄາດຄະເນໜ່ວຍປ່ອນບັດເລືອກຕັ້ງ 764 ໜ່ວຍ; ຂຶ້ນແຜນບັນຊີຄວາມຕ້ອງການວັດຖຸອຸປະກອນຮັບໃຊ້ວຽກງານເລືອກຕັ້ງ ເປັນຕົ້ນຫີບປ່ອນບັດ ສສຊ ແລະ ສສນວ, ຕາປະທັບ; ນອກນີ້, ໄດ້ຕິດຕາມຊຸກຍູ້ບັນດາອົງການປົກຄອງເມືອງ, ແຕ່ງຕັ້ງຄະນະກໍາມະການເລືອກຕັ້ງຂັ້ນເມືອງ ແລະ ອະນຸກໍາມະການຊ່ວຍວຽກຂັ້ນເມືອງ  ແລະ ວຽກໂຄສະນາປຸກລະດົມຂະບວນການ, ວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ອື່ນໆ ໄດ້ກະກຽມສຳລັດໂດຍພື້ນຖານ.

ໂອກາດນີ້, ປະທານສະພາແຫ່ງຊາດ ກໍໄດ້ມີຄໍາເຫັນຊີ້ນຳໃຫ້ອະນຸກຳມະການເລືອກຕັ້ງຂັັ້ນ ນວ ເອົາໃຈໃສ່ໃນການຈັດຕັ້ງປະຕິບັດການກະກຽມວຽກງານດັ່ງກ່າວໃຫ້ສຳເລັດ ເປັນຕົ້ນຄະນະກໍາມະການເລືອກຕັ້ງຂັ້ນ ນວ ຊີ້ນໍາຄະນະກຳມະການເລືອກຕັ້ງຂັ້ນເມືອງ ແລະ ບ້ານ ເອົາໃຈໃສ່ຈັດຕັ້ງປະຕິບັດການເຜີຍແຜ່ມະຕິ, ແຈ້ງການ ແລະ ຄຳແນະນຳຂອງຄະນະກຳມະການເລືອກຕັ້ງລະດັບຊາດ ໃຫ້ລົງຮອດປະຊາຊົນຢ່າງທົ່ວເຖິງ; ສະເໜີໃຫ້ຄະນະກໍາມະການເລືອກຕັ້ງຂັ້ນ ນວ, ເມືອງ ແລະ ບັນດາບ້ານເອົາໃຈໃສ່ກວດກາຄືນການເກັບກໍາສະຖິຕິພົນລະເມືອງ ເປັນຕົ້ນຜູ້ມີສິດປ່ອນບັດເລືອກຕັ້ງ ແລະ ອຸປະກອນໃຫ້ລະອຽດເຊັ່ນ: ກາຈໍ້າ, ທຸງຊາດ, ຮູບທ່ານຜູ້ນໍາ ແລະ ອື່ນໆ ໃຫ້ລະອຽດຈະແຈ້ງ; ສ້າງແຜນດຳເນີນງານຂອງແຕ່ລະຄະນະກໍາມະການເລືອກຕັ້ງ ຈົນຮອດຂັ້ນໜ່ວຍງານ ແລະ ໜ່ວຍປ່ອນບັດເລືອກຕັ້ງ; ສະເໜີຄະນະກໍາມະການເລືອກຕັ້ງຂັ້ນ ນວ ຮີບຮ້ອນຈັດສັນງົບປະມານໃຫ້ບັນດາເມືອງ ເພື່ອກະກຽມຄວາມພ້ອມທາງດ້ານອຸປະກອນເປັນຕົ້ນ ຄໍາຂວັນ, ຮູບຜູ້ສະໝັກ ສສຂ; ຊຸກຍູ້ໃຫ້ມີການຈັດຕັ້ງສ້າງຂະບວນການກິລາ, ອອກແຮງງານ ແລະ ປູກພືດລະດູແລ້ງ; ສືບຕໍ່ຮັບປະກັນການຮັກສາຄວາມສະຫງົບ, ປອດໄພ ຕ້ອງຖືເປັນວຽກທີ່ສຳຄັນທີ່ສຸດ; ຄະນະກຳມະການເລືອກຕັ້ງ ຕ້ອງກະກຽມວຽກງານໃຫ້ລະອຽດສອດຄ່ອງ ແລະ ທົ່ວເຖິງ ແນໃສ່ເຮັດໃຫ້ການເລືອກຕັ້ງ ສສຊ ຊຸດທີ IX ປະຈຳເຂດເລືອກຕັ້ງທີ 1 ແລະ ສສນວ ຊຸດທີ II ສໍາເລັດທັນຕາມກຳນົດເວລາ.

ແຫຼ່ງຂ່າວທີ່ມາ: ສະພາແຫ່ງຊາດ