ຕອນເຊົ້າວັນທີ 31 ສິງຫາ 2022 ທີ່ສະໂມສອນເມືອງສໍາພັນ, ທ່ານ ທອງສີ ເສົາສຸລິພົມ ປະທານ ຄະນະປະຈໍາສະພາປະຊາຊົນແຂວງ, ປະທານຄະນະ ສສຊ ປະຈໍາເຂດເລືອກຕັ້ງ 2 ພ້ອມດ້ວຍຄະນະທິມງານ ສືບຕໍ່ຈັດຕັ້ງຜັນຂະຫຍາຍ ແລະ ໂຄສະນາເຜີຍແຜ່ເນື້ອໃນຜົນສໍາເລັດ ກອງປະຊຸມສະໄໝສາມັນ ເທື່ອທີ 3 ຂອງສະພາແຫາງຊາດ ຊຸດທີ IX, ມີ ທ່ານ ທອງຕື ເກຍສະບົງ ເຈົ້າເມືອງ-ເມືອງສໍາພັນ, ບັນດາທ່ານຄະນະປະຈຳພັກເມືອງ, ກຳມະການພັກເມືອງ, ຫົວໜ້າ-ຮອງຫົວໜ້າຫ້ອງການອົງການລັດທຽບເທົ່າຫ້ອງການຂັ້ນເມືອງ, ກອງບັນຊາການທະຫານເມືອງ, ກອງບັນຊາການປ້ອງກັນຄວາມສະຫງົບເມືອງ, ອົງການຈັດຕັ້ງມະຫາຊົນຂັ້ນເມືອງ, ອົງການແນວລາວສ້າງຊາດເມືອງ, ສະຫະພັນນັກຮົບເກົ່າ, ໜ່ວຍບໍລິການລັດວິສະຫະກິດປະຈໍາເມືອງ, ພະນັກງານ-ລັດຖະກອນ, ພະນັກງານບຳນານ ແລະ ອົງການຈັດຕັ້ງບ້ານ 2 ບ້ານອ້ອມຂ້າງເທດສະບານເມືອງເຂົ້າຮ່ວມທັງໝົດ ຈໍານວນ 112 ທ່ານ, ຍິງ 32 ທ່ານ
ເພື່ອແນ່ໃຫໃສ່ໃຫ້ທຸກການຈັດຕັ້ງ ແລະ ຜູ້ມີສິດເລືອກຕັ້ງໄດ້ຮັບຮູ້, ເຂົ້າໃຈເຖິງບັນຫາສໍາຄັນພື້ນຖານຂອງຊາດ ແລະ ຂອງແຂວງ ທີ່ສະພາແຫ່ງຊາດ ແລະ ສະພາປະຊາຊົນແຂວງ ຮັບຮອງເອົາ ພ້ອມທັງນໍາເອົາເນື້ອໃນດັ່ງກ່າວໄປຜັນຂະຫຍາຍເຂົ້າໃນວຽກງານຂອງແຕ່ລະພາກສ່ວນ ເພື່ອຮັບປະການໃຫ້ການພັດທະນາເສດຖະກິດ-ສັງຄົມ ແລະ ບັນຫາອື່ນໆ ບັນລຸຕາມແຜນການ. ທີ່ກອງປະຊຸມ ທ່ານ ທອງສີ ເສົາສຸລິພົມ ຜັນຂະຫຍາຍ ແລະ ໂຄສະນາເຜີຍແຜ່ ບັນຫາສໍາພື້ນຖານຂອງຊາດ ທີ່ໄດ້ຮັບຮອງໃນກອງປະຊຸມສະໄໝສາມັນ ເທື່ອ 3 ຂອງສະພາແຫ່ງຊາດ ຊຸດທີ IX ມີ 20 ມະຕິ ໃນນີ້ ມີວຽກງານບຸກຄະລາກອນ, ວຽກງານຂົງເຂດລັດຖະບານ, ວຽກງານສະພາແຫ່ງຊາດ, ວຽກງານການສ້າງ ແລະ ປັບປຸງກົດໝາຍ 9 ສະບັບ. ມີບາງຕອນຂອງເນື້ອໃນມະຕິວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022 ທ່ານໄດ້ກ່າວວ່າ: ກ່ອນອື່ນທ່ານກໍໄດ້ໃຫ້ເຫັນເຖິງຜົນງານ, ສາຍເຫດຂອງການພັດທະນາເສດຖະກິດ-ສັງຄົມໃນໄລຍະຜ່ານມາ ເປັນຕົ້ນ: ລາວເຮົາຮັກສາໄດ້ສະຖຽນລະພາບທາງການດ້ານເມືອງ, ເສດຖະກິດສືບຕໍ່ຂະຫຍາຍຕົວ, ສັງຄົມມີຄວາມສະຫງົບ, ມີຄວາມເປັນລະບຽບຮຽບຮ້ອຍ ແລະ ລວມຍອດຜະລິດຕະພັນພາຍໃນ (GDP) ສາມາດບັນລຸໄດ້ 4,3%. ພ້ອມກັນນັ້ນ, ທ່ານໄດ້ເໜັ້ນຕໍ່ກັບທິດທາງລວມ ແລະ 6 ເປົ້າໝາຍການພັດທະນາເສດຖະກິດ-ສັງຄົມ ທີ່ທຸກຂະແໜງການ ຕ້ອງສຸມໃສ່ຈັດຕັ້ງຜັນຂະຫຍາຍເຂົ້າໃນວຽກງານໃນແຕ່ລະຂົງເຂດທີ່ຕົນຮັບຜິດຊອບຢ່າງຕັ້ງໜ້າເພື່ອໃຫ້ບັນດາຄາດໝາຍທີ່ໄດ້ຮັບຮອງບັນລຸຕາມແຜນການ ເຊັ່ນ: u ເຮັດໃຫ້ເສດຖະກິດຂະຫຍາຍຕົວ ຢ່າງຕໍ່ເນື່ອງ, ມີຄຸນນະພາບ ຕາມທິດສີຂຽວ ແລະ ຍືນຍົງ; v ການພັດທະນາຊັບພະຍາກອນມະນຸດມີຄຸນນະພາບສູງຂຶ້ນ; w ການຍົກລະດັບຊິວິດການເປັນຢູ່ຂອງປະຊາຊົນ; x ການປົກປັກຮັກສາສິ່ງແວດລ້ອມໃຫ້ມີຄວາມສົມດຸນ; y ການສ້າງໂຄງລ່າງພື້ນຖານໃຫ້ມີຄວາມເຂັ້ມແຂງ, ນໍາໃຊ້ທ່ານແຮງ, ກາລະໂອກາດດ້ານທີ່ຕັ້ງພູມມີສາດ ໃນການຮ່ວມມື ແລະ ການເຊື່ອມໂຍງກັບພາກພື້ນ ແລະ ສາກົນ; z ການຄຸ້ມຄອງ-ບໍລິຫານລັດໃຫ້ມີປະສິດທິພາບ.
ໃນຕອນທ້າຍຂອງການເຜີຍແຜ່ທ່ານຍັງໄດ້ຮຽກຮ້ອງໃຫ້ຄະນະພັກ-ຄະນະນໍາຂອງເມືອງ ລວມທັງພະນັກງານ-ລັດຖະກອນ ເອົາໃຈໃສ່ຍົກສູງຄວາມຮັບຜິດຊອບທາງດ້ານການເມືອງຂອງຕົນ, ເອົາໃຈໃສ່ການກໍານົດແຜນການ, ໂຄງການໃຫ້ລະອຽດ ແລະ ເປັນລັກສະນະຍຸດທະສາດ. ເພື່ອຮັບປະກັນໃຫ້ການຈັດຕັ້ງປະຕິບັດມີຄຸນນະພາບ ແລະ ໄດ້ຮັບປະສິດທິຜົນ. ພ້ອມທັງເອົາໃຈໃສ່ໃນການສຶກສາວຽກງານການເມືອງແນວຄິດຢ່າງຕັ້ງໜ້າ ໂດຍສະເພາະຕໍ່ກັບຕົນເອງໃຫ້ມີຄຸນທາດການເມືອງທີ່ໜັກແໜ້ນ ລວມທັງການສຶກສາອົົບຮົບການແນວຄິດໃຫ້ກັບພໍ່ແມ່ປະຊາຊົນຢູ່ຂັ້ນຮາກຖານມີຄວາມຕື່ນຕົວໃນການປະກອບສ່ວນການຈັດຕັ້ງປະຕິບັດແຜນພັດນາເສດຖະກິດ-ສັງຄົມ ຂອງແຂວງ ກໍຄືຂອງເມືອງ ແລະ ການປະກອບສ່ວນໃນການປະຕິບັດລັດຖະທໍາມະນຸນ ແລະ ກົດໝາຍ ເພື່ອບັນລຸຈຸດໝາຍໃນການສ້າງລັດທີ່ປົກຄອງດ້ວຍກົດໝາຍ ຂອງປະຊາຊົນ ໂດຍປະຊາຊົນ ແລະ ເພື່ອຜົນປະຊາຊົນຂອງປະຊາຊົນຢ່າງແທ້ຈິ່ງ.
ຕອນບ່າຍຂອງວັນດຽວກັນ ທ່ານ ທອງສີ ເສົາສຸລິພົມ ພ້ອມດ້ວຍຄະນະ ລົງເຄື່ອນໄຫວທີ່ບ້ານຫາດງາໃຕ້ ມີ ອົງການຈັດຕັ້ງບ້ານ ຫາດງາເໜືອ, ບ້ານຕ່າງຈາກ ແລະ ບ້ານນໍ້າງາ ພ້ອມດ້ວຍ ອໍານາດການປົກຄອງບ້ານຫາດງາໃຕ້ ແລະ ຜູ້ມີສິດເລືອກຕັ້ງເຂົ້າຮ່ວມຮັບຟັງ ຈໍານວນ 65 ຄົນ, ຍິງ 30 ຄົນ ທີ່ຫ້ອງການບ້ານຫາດງາໃຕ້ ແລະ ໃນໂອກາດທີ່ຄະນະທີມງານລົງເຄື່ອນໄຫວໃນຄັ້ງນີ້ ໄດ້ນໍາເອົາເກືອຈໍານວນໜຶ່ງໄປມອບໃຫ້ກັບພໍ່ແມ່ປະຊາຊົນບ້ານດັ່ງກ່າວ.
ພາບ-ຂ່າວ: ນາງ ສຸກສົມພອນ ແກ້ວແສງພະຈັນ