ໃນລະຫວ່າງວັນທີ 19-21-22 ກັນຍາ 2023 ທ່ານ ບຸນມີ ພິມມະສອນ ຮອງເລຂາພັກແຂວງ, ປະທານ ຄະນະສະມາຊິກ ສະພາແຫ່ງຊາດ ປະຈໍາເຂດເລືອກຕັ້ງ (ຄສຊຂ) 12 ແຂວງຄໍາມ່ວນ, ປະທານສະພາປະຊາຊົນແຂວງຄໍາມ່ວນ, ທ່ານ ບົວພັນ ແສງຈັນ ກຳມະການພັກແຂວງ ຮອງປະທານສະພາປະຊາຊົນແຂວງຄໍາມ່ວນ ທັງເປັນສະມາຊິກສະພາປະຊາຊົນຂັ້ນແຂວງປະຈໍາເຂດເລືອກ ເມືອງມະຫາໄຊ ພ້ອມດ້ວຍ ຄະນະສະມາຊິກສະພາປະຊາຊົນຂັ້ນແຂວງ ປະຈໍາເຂດເລືອກຕັ້ງເມືອງມະຫາໄຊ, ໄດ້ເຄື່ອນໄຫວພົບປະ ປະຊາຊົນທີຕິດພັນກັບການຈັດຕັ້ງຜັນຂະຫຍາຍ ແລະ ໂຄສະນາເຜີຍແຜ່ຜົນສໍາເລັດ ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງຄໍາມ່ວນ ຊຸດທີ II ຢູ່ 6 ຈຸດ ຂອງເມືອງມະຫາໄຊຄື: ທີ່ ສະໂມສອນເມືອງ, ບ້ານແຕນ, ນາກອກ, ສົມສະໜຸກ, ນາຈານ ແລະ ບ້ານໂນນແດງ; ໂດຍເປັນກຽດເຂົ້າຮ່ວມຕ້ອນຮັບ ແລະ ເຮັດວຽກຂອງ ທ່ານ ສົມບູນ ແກ້ວວົງສາ ເຈົ້າເມືອງມະຫາໄຊ, ມີ ຮອງເຈົ້າເມືອງ, ພ້ອມດ້ວຍບັນດາ ທ່ານຄະນະປະຈໍາພັກເມືອງ, ພະນັກງານ-ລັດຖະກອນ, ກຳລັງປກຊ-ປກສ, ອຳນາດການປົກຄອງຂັ້ນບ້ານ ຕະຫລອດຮອດພໍ່ແມ່ປະຊາຊົນ ເຂົ້າຮ່ວມທັງໝົດ 913 ເທື່ອຄົນ, ຍິງ 344 ເທື່ອຄົນ.

   ຕາມວາລະ ແລະ ແຜນການເຄື່ອນໄຫວຂອງການຈັດຕັ້ງເຜີຍແຜ່ຜົນສຳເລັດ ກອງປະຊຸມສະໄໝສາມັນເທື່ອທີ 5 ຂອງສະພາທັງ 2 ຂັ້ນ, ຄັ້ງນີ້ກໍໄດ້ຮັບຟັງການລາຍງານໂດຍສັງເຂບກ່ຽວກັບການຈັດຕັ້ງປະຕິບັດແຜນການການພັດທະນາເສດຖະກິດ-ສັງຄົມຂອງອຳນາດການປົກເມືອງ ແລະ ຂອງບ້ານແຕ່ລະຈຸດ, ຈາກນັ້ນ ທ່ານ ປະທານ (ຄສຊຂ) ທີ 12 ແຂວງຄໍາມ່ວນ ແລະ ບັນດາທ່ານ ສະມາຊິກສະພາປະຊາຊົນຂັ້ນແຂວງປະຈໍາເຂດເລືອກຕັ້ງເມືອງ ກໍໄດ້ຜັດປ່ຽນກັນຂຶ້ນເຜີຍແຜ່ເນື້ອໃນຜົນສໍາເລັດຂອງກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງຄໍາມ່ວນ ຊຸດທີ II ເຊິ່ງໄດ້ຍົກໃຫ້ເຫັນການພິຈາລະນາ ແລະ ຮັບຮອງບາງບັນຫາສຳຄັນພຶ້ນຖານຕ່າງໆຂອງຊາດ, ຂອງທ້ອງຖິ່ນ, ພ້ອມນັ້ນ, ກໍໄດ້ຮັບຟັງການປະກອບຄໍາຄິດ-ຄໍາເຫັນ ແລະ ຄໍາສະເໜີບາງບັນຫາທີ່ຂັດຂ້ອງໝອງໃຈໂດຍສ່ວນຫລາຍແມ່ນກ່ຽວກັບການສ້າງສາພັດທະນາພື້ນຖານໂຄງລ່າງ, ຕໍ່ກັບບັນຫາທີ່ອຳນາດການປົກເມືອງ , ບ້ານ ແລະ ປະຊາຊົນໄດ້ສະເໜີມານັ້ນ, ບາງບັນຫາທາງ ຄະນະຜູ້ແທນສະພາປະຊາຊົນ ກໍ່ໄດ້ຊີ້ແຈງ ແລະ ໃຫ້ຄວາມກະຈ່າງແຈ້ງ ສ່ວນບາງຄໍາສະເໜີທີ່ຕິດກັບຫລາຍພາກສ່ວນກໍ່ຈະໄດ້ນຳເອົາໄປຄົ້ນຄວ້າ, ປຶກສາຫາລື ແລະ ສັງລວມມອບໃຫ້ຄະນະກໍາມະການທີ່ກ່ຽວຂ້ອງປະສານສົມທົບກັບພາກສ່ວນຕ່າງໆ ຂອງອົງການປົກຄອງແຂວງ ນຳໄປຄົ້ນຄວ້າແກ້ໄຂ ໃຫ້ຖືກຕ້ອງສອດຄ່ອງຕາມກົດໝາຍ ແລະ ລະບຽບການ.

    ໃນໂອກາດດັ່ງກ່າວ ທ່ານ ບຸນມີ ພິມມະສອນ ປະທານ ຄະນະສະມາຊິກ ສະພາແຫ່ງຊາດ ປະຈໍາເຂດເລືອກຕັ້ງ (ຄສຊຂ) 12 ແຂວງຄໍາມ່ວນ, ໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນໍາຕໍ່ອົງການປົກຄອງເມືອງ ແລະ ພາກສ່ວນທີ່ກ່ຽວຂ້ອງ, ຕໍ່ກັບບັນຫາການພັດທະນາເສດຖະກິດ-ສັງຄົມຂອງເມືອງທີຕິດພັນກັບສອງວາລະແຫ່ງຊາດ ແລະ ການເກັບລາຍຮັບເຂົ້າງົບປະມານໃຫ້ສູ້ຊົນຈັດຕັ້ງປະຕິບັດບັນດາຄາດໝາຍທີ່ວາງໄວ້, ຕໍ່ກັບສະພາບການເໜັງຕີງຂອງລາຄານໍ້າມັນເຊື້ອໄຟ, ລາຄາສິນຄ້າ, ອັດຕາແລກປ່ຽນ ແລະ ຄວາມຫຍຸ້ງຍາກອຶ່ນໆ ສົ່ງຜົນກະທົບສ້າງຄວາມເສຍຫາຍ ໃຫ້ແກ່ເສດຖະກິດ ແລະ ການດຳລົງຊີວິດຂອງປະຊາຊົນ ກໍຄືຂອງອົງການຈັດຕັ້ງພັກ-ລັດ ໃນການຮ່ວມກັນແກ້ໄຂບັນຫາທີ່ມີຄວາມຫຍຸ້ງຍາກໃຫ້ບັນລຸຜົນສຳເລັດຕາມຈຸດປະສົງຄາດໝາຍ ພ້ອມນີ້ ທ່ານ ບຸນມີ ພິມມະສອນ ຍັງໄດ້ເນັ້ນ ໃຫ້ອຳນາດການປົກຄອງເມືອງ, ບ້ານ ແລະ ພໍ່ແມ່ປະຊາຊົນ ສືບຕໍ່ຍຶດໝັ້ນຕໍ່ການນຳພາຂອງພັກ-ລັດ, ຮັກສາມູນເຊື້ອທີ່ຍາດມາໄດ້ໃນທ່າມກາງສະພາບການຫຍຸ້ງຍາກທາງດ້ານເສດຖະກິດ ໃຫ້ຜະລິດເອງ ກຸ້ມຕົນເອງ ເປັນເຈົ້າຕົນເອງ; ໃຫ້ເອົາໃຈໃສ່ປຸກລະດົມປູກຝັງຈິດສຳນຶກ ແລະ ສົ່ງເສີມໃຫ້ລູກຫຼານໄດ້ຮ່ຳຮຽນໃຫ້ສອດຄ່ອງກັບສະພາບຕົວຈິງ, ຕ້ານປະກົດການຫຍໍ້ທໍ່ຕ່າງໆທີ່ຈະເກີດຂຶ້ນ ແລະ ສ້າງຂະບວນການຜະລິດເປັນສິນຄ້າໜຶ່ງເມືອງ-ໜຶ່ງຜະລິດຕະພັນ ກໍຄືຂະບວນການປັບປຸງຊີວິດການເປັນຢູ່ຂອງປະຊາຊົນໃຫ້ນັບມື້ດີຂຶ້ນເປັນກ້າວໆ.

ໂດຍ: ເອື້ອ ມະໂນສິງ