(ສພຊ) ວັນທີ 14 ກຸມພາ 2022, ທ່ານ ຮສ.ປອ ລິນຄໍາ ດວງສະຫວັນ ປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ (ກສຕສ) ທັງເປັນສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 1 ນະຄອນຫຼວງວຽງຈັນ ພ້ອມດ້ວຍຄະນະ ໄດ້ເຄື່ອນໄຫວພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ (ສພຊ) ຊຸດທີ IX ແລະ ກອງປະຊຸມສະໄໝສາມັນເທື່ອທີ 2 ຂອງສະພາປະຊາຊົນນະຄອນຫຼວງວຽງຈັນ (ສປນວ) ຊຸດທີ II ຢູ່ທີ່ພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ (ນວ) ໂດຍການຕ້ອນຮັບຂອງທ່ານ ສຸລິວັນ ພົມມະຫາໄຊ ຫົວໜ້າພະແນກໂຍທາທິການ ແລະ ຂົນສົ່ງ ນວ ພ້ອມດ້ວຍພາກສ່ວນທີ່ກ່ຽວຂ້ອງ.

         ໃນການເຄື່ອນໄຫວຄັ້ງນີ້, ໄດ້ຮັບຟັງການລາຍງານສະພາບລວມໂດຍຫຍໍ້ຂອງພະແນກໂຍທາທິການ ແລະ ຂົນສົ່ງ ນວ; ຈາກນັ້ນ, ບັນດາທ່ານຜູ້ແທນໄດ້ຜັດປ່ຽນກັນເຜີຍແຜ່ຜົນສຳເລັດກອງປະຊຸມ ສພຊ, ສປນວ ແລະ ໄດ້ຮັບຟັງຄຳຄິດຄຳເຫັນ, ຄຳສະເໜີ ເປັນຕົ້ນການຊຸກຍູ້ວຽກງານຕິດຕາມກວດກາການປະຕິບັດລະບຽບກົດໝາຍ, ການເສຍຄ່າທາງ, ວຽກງານຂົນສົ່ງ ແລະ ບັນຫາອື່ນໆອີກຈໍານວນໜຶ່ງ; ພ້ອມນັ້ນ, ບັນດາຜູ້ແທນຈະໄດ້ນຳເອົາຄຳເໜີດັ່ງກ່າວໄປສະເໜີໃຫ້ພາກສ່ວນກ່ຽວຂ້ອງພິຈາລະນາແກ້ໄຂໃນຕໍ່ໜ້າ.