(ສພຊ) – ວັນທີ 18 ຕຸລາຜ່ານມາ ທີ່ຫໍປະຊຸມແຫ່ງຊາດ ໄດ້ມີການພົບປະສອງຝ່າຍລະຫວ່າງສະຫາຍ ສຸບັນ ສະວະບຸດ ຄະນະປະຈຳສະພາແຫ່ງຊາດ, ປະທານກຳມາທິການວຽກງານສະມາຊິກສະພາແຫ່ງຊາດ (ກວສຊ) ກັບສະຫາຍ ນາງ ຫງວຽນ ແທັງ ຫ້າຍ (Nguyễn Thanh Hải) ກຳມະການສູນກາງພັກກອມມູນິດຫວຽດນາມ, ຄະນະປະຈຳສະພາແຫ່ງຊາດ, ຫົວໜ້າຄະນະວຽກງານສະມາຊິກສະພາແຫ່ງຊາດ ໃນໂອກາດຮ່ວມໃນຄະນະຜູ້ແທນສະພາແຫ່ງຊາດ ສສ.ຫວຽດນາມ ເຂົ້າຮ່ວມກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຫຼື ໄອປາ ຄັ້ງທີ 45 ທີ່ ສປປລາວ ເປັນເຈົ້າພາບ.

ໃນການພົບປະ, ສະຫາຍ ສຸບັນ ສະວະບຸດ ໄດ້ສະເໜີກ່ຽວກັບວຽກງານຂອງ ກວສຊ ຕາມພາລະບົດບາດທີ່ມີ 4 ວຽກໃຫຍ່ຄື: ການຄຸ້ມຄອງສະມາຊິກສະພາແຫ່ງຊາດ (ສສຊ) ໃນນີ້ ກໍມີນະໂຍບາຍຕ່າງໆ, ການບັນຈຸສັບຊ້ອນ ສສຊ ສັງກັດກຳມາທິການ, ການແຕ່ງຕັ້ງຍົກຍ້າຍ; ການພັດທະນາ: ປະສານສົມທົບກັບພາກສ່ວນຕ່າງໆໃນການສ້າງຄວາມເຂັ້ມແຂງໃຫ້ ສສຊ ແລະ ສະມາຊິກສະພາປະຊາຊົນຂັ້ນແຂວງ (ສສຂ), ການຄົ້ນຄວ້າດ້ານໂຄງປະກອບຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ (ສພຂ); ການກະກຽມວຽກງານເລືອກຕັ້ງ; ການສ້າງ-ປັບປຸງນິຕິກຳ ເປັນຕົ້ນລະບຽບການດໍາເນີນກອງປະຊຸມ, ການເຄື່ອນໄຫວຂອງຄະນະ ສສຊ ແລະ ອື່ນໆ. ປະທານ ກວສຊ ແຈ້ງໃຫ້ຊາບອີກວ່າ: ສໍາລັບຕໍ່ໜ້ານີ້ ພັກໄດ້ກຳນົດແນວທາງໃຫ້ປັບປຸງບູລະນະອໍານາດການປົກຄອງທ້ອງຖິ່ນ ເຊິ່ງຈະໃຫ້ມີການສ້າງຕັ້ງຕາແສງ; ກຳນົດເອົາເລຂາພັກແຂວງ ເປັນປະທານ ສພຂ, ເລຂາພັກເມືອງ ເປັນຫົວໜ້າຄະນະ ສສຂ ປະຈໍາເມືອງ (ປັດຈຸບັນ ລາວຍັງບໍ່ທັນມີສະພາປະຊາຊົນເມືອງ) ແລະ ໃນປີ 2025 ຕ້ອງກະກຽມດ້ານຕ່າງໆໃຫ້ແກ່ການເລືອກຕັ້ງ ສສຊ ແລະ ສສຂ ເຊິ່ງຈະດໍາເນີນຂຶ້ນໃນຕົ້ນປີ 2026.

(ນາງ ອາລິນ ສຸພິມມະປະດິດ)