(ສພຊ) – ຕອນບ່າຍວັນທີ 14 ຕຸລາຜ່ານມາ, ທ່ານ ບຸນຕາ ເທບພະວົງ ຄະນະປະຈຳສະພາແຫ່ງຊາດ, ປະທານກຳມາທິການວັດທະນະທຳ-ສັງຄົມ (ກວທສ) ໄດ້ຕ້ອນຮັບ ແລະ ພົບປະກັບທ່ານ ມາກ-ອານເດຣ ໂປຣສ (Marc -Andre Prost) ຜູ້ອຳນວຍການອົງການອາຫານໂລກ ປະຈຳ ສປປລາວ ເພື່ອປຶກສາຫາລືວຽກງານການຊຸກຍູ້, ຊ່ວຍເຫຼືອ ແລະ ສະໜັບສະໜູນເຊິ່ງກັນແລະກັນ ໃນການປະຕິບັດພາລະບົດບາດ, ສິດ ແລະ ໜ້າທີ່ຂອງສອງພາກສ່ວນ.
ທ່ານ ບຸນຕາ ເທບພະວົງ ໄດ້ລາຍງານໂດຍສັງເຂບກ່ຽວກັບການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ຂອງກຳມາທິການວັດທະນະທຳ-ສັງຄົມ ພ້ອມທັງແຈ້ງໃຫ້ຊາບວຽກງານຈຸດສຸມຂອງກຳມາທິການໃນປັດຈຸບັນ ເປັນຕົ້ນການເຂົ້າຮ່ວມ ແລະ ຮັບໃຊ້ກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຫຼື ໄອປາ (AIPA) ຄັ້ງທີ 45 ທີ່ຈະດຳເນີນໃນວັນທີ 17-24 ຕຸລານີ້ ທີ່ນະຄອນຫຼວງວຽງຈັນ ໂດຍຮັບຜິດຊອບການເປັນປະທານກອງປະຊຸມກໍາມາທິການວຽກງານສັງຄົມ ເຊິ່ງຈະຄົ້ນຄວ້າ, ພິຈາລະນາ ແລະ ຮັບຮອງເອົາມະຕິຂອງກອງປະຊຸມດັ່ງກ່າວ ຈໍານວນ 5 ສະບັບ.
ທ່ານ ມາກ-ອານເດຣ ໂປຣສ ໄດ້ລາຍງານໃຫ້ຊາບເຖິງພາລະບົດບາດ ແລະ ໜ້າທີ່ຂອງອົງການອາຫານໂລກ, ການຮ່ວມມື ແລະ ສະໜັບສະໜູນຂະແໜງການຕ່າງໆ ຢູ່ ສປປລາວ ເພື່ອຊ່ວຍໃຫ້ຫຼຸດພົ້ນອອກຈາກປະເທດດ້ອຍພັດທະນາ ເຊິ່ງອົງການອາຫານໂລກໄດ້ວາງ 4 ເປົ້າໝາຍຍຸດທະສາດ ເປັນຕົ້ນເສີມຂະຫຍາຍ ແລະ ສ້າງຄວາມເຂັ້ມແຂງໃຫ້ແຜນງານອາຫານທ່ຽງຂອງລັດຖະບານ, ສະໜັບສະໜູນວຽກງານປ້ອງກັນການຂາດໂພຊະນາການ, ເສີມສ້າງຄວາມເຂັ້ມແຂງໃຫ້ແກ່ປະຊາຊົນໃນເຂດທີ່ມີຄວາມສ່ຽງຕໍ່ການເກີດໄພພິບັດ ໂດຍການເພີ່ມຄວາມອາດສາມາດໃນການປັບຕົວຕໍ່ການປ່ຽນແປງຂອງອາກາດ ແລະ ການຄຸ້ມຄອງໄພພິບັດ, ສະໜັບສະໜູນລັດຖະບານໃນການຊ່ວຍເຫຼືອສຸກເສີນຕໍ່ໄພພິບັດ; ທ່ານແຈ້ງໃຫ້ຊາບອີກວ່າ: ອົງການອາຫານໂລກ ໄດ້ຮ່ວມມືກັບລັດຖະບານລາວ ແລະ ພາກສ່ວນຕ່າງໆ ສືບຕໍ່ສະໜັບສະໜູນ ແລະ ຊຸກຍູ້ສົ່ງເສີມໃນການແກ້ໄຂບັນຫາດ້ານໂພຊະນາການ, ການຄ້ຳປະກັນສະບຽງອາຫານ ແລະ ການເຂົ້າເຖິງການສຶກສາ, ສາທາລະນະສຸກ ຂອງປະຊາຊົນບັນດາເຜົ່າໃນເຂດຊົນນະບົດ ແລະ ເຂດຫ່າງໄກສອກຫຼີກ ຕິດພັນກັບຜະລິດກະສິກໍາ ເພື່ອເຮັດໃຫ້ປະຊາຊົນ ແລະ ເດັກນ້ອຍໃນເຂດດັ່ງກ່າວ ໄດ້ມີໂພຊະນາການທີ່ດີຂຶ້ນ.
ໃນຕອນທ້າຍ, ທັງສອງຝ່າຍໄດ້ຕົກລົງໃຫ້ມີການສືບຕໍ່ຜັນຂະຫຍາຍຜົນຂອງການພົບປະຄັ້ງນີ້ ໃຫ້ເກີດດອກອອກຜົນ ແລະ ເປັນຮູບປະທຳ; ທ່ານປະທານ ກວທສ ຍັງໄດ້ສະເໜີແຕ່ງຕັ້ງໜ່ວຍງານຜູ້ປະສານງານຂອງທັງສອງຝ່າຍ ເພື່ອເຮັດວຽກການວາງແຜນດ້ານວິຊາການ ໂດຍສະເພາະການເສີມຂະຫຍາຍສາຍພົວພັນໃຫ້ມີຄວາມໃກ້ຊິດ ແລະ ສະໜິດສະໜົມ, ຊຸກຍູ້ຊ່ວຍເຫຼືອເຊິ່ງກັນແລະກັນ, ສ້າງຄວາມເຂັ້ມແຂງໃນການປະຕິບັດວຽກງານຕ່າງໆ.
(ນາງ ອາລິນ ສຸພິມມະປະດິດ)