ໃນໄລຍະຢ້ຽມຢາມ, ທີ່ສະພາແຫ່ງຊາດຫວຽດນາມ ໄດ້ມີການພົບປະສອງຝ່າຍລະຫວ່າງສະຫາຍ ພົຕ. ປອ. ວົງສັກ ພັນທະວົງ ກັບ ສະຫາຍ ພົຕ. ເລ ເຕິນ ເຕີຍ ພ້ອມດ້ວຍຄະນະຂອງສອງຝ່າຍ ເຊິ່ງສະຫາຍ ພົຕ. ເລ ເຕິນ ເຕີຍ ໄດ້ກ່າວສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ເປັນກັນເອງຖານສະຫາຍອ້າຍນ້ອງ ຕໍ່ຄະນະຜູ້ແທນສະພາແຫ່ງຊາດລາວ. ສອງຝ່າຍໄດ້ຮ່ວມກັນຕີລາຄາຄືນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງອົງການນິຕິບັນຍັດ ກໍຄືສອງກຳມາທິການປ້ອງກັນຊາດ-ປ້ອງກັນຄວາມສະຫງົບ ທີ່ໄດ້ຮັບການເສີມຂະຫຍາຍຢ່າງຕໍ່ເນື່ອງຕະຫຼອດມາ ເຊິ່ງມີການແລກປ່ຽນການຢ້ຽມຢາມ ແລະ ຂໍ້ມູນຂ່າວສານທີ່ມີຄວາມສົນໃຈນຳກັນຢ່າງປົກກະຕິ ໂດຍສະເພາະການຈັດຕັ້ງປະຕິບັດພາລະບົດບາດ ແລະ ໜ້າທີ່ຂອງກຳມາທິການປ້ອງກັນຊາດ-ປ້ອງກັນຄວາມສະຫງົບ ໃນເຄິ່ງສະໄໝຜ່ານມາຂອງສະພາແຫ່ງຊາດຊຸດປັດຈຸບັນ; ສອງຝ່າຍຮ່ວມກັນທົບທວນຄືນການຮ່ວມມືຂອງສອງກາໍມາທິການໃນໄລຍະຜ່ານມາ ເຫັນວ່າໄດ້ຮັບການເສີມຂະ ຫຍາຍຢ່າງຕັ້ງໜ້າ ໂດຍໄດ້ແລກປ່ຽນຄຳຄິດຄຳເຫັນນຳກັນຢ່າງຈິງໃຈ, ແທດຕົວຈິງ ໃນການປະຕິບັດໜ້າທີ່ຂອງສອງກຳມາທິການ. ພິເສດ, ໃນການຢ້ຽມຢາມ ແລະ ແລກປ່ຽນບົດຮຽນຄັ້ງນີ້, ສອງຝ່າຍໄດ້ລົງເລິກແລກປ່ຽນບົດຮຽນ ປະສົບການໃນການສ້າງກົດໝາຍ ແລະ ນິຕິກຳຕ່າງໆໃນຂົງປ້ອງກັນຊາດ-ປ້ອງກັນຄວາມສະຫງົບ (ປກຊ-ປກສ), ການຕິດຕາມກວດກາ ເຊິ່ງສອງຝ່າຍພິຈາລະນາການຕິດຕາມກວດກາຮ່ວມກັນ ເພື່ອຊຸກຍູ້ການຈັດຕັ້ງປະຕິບັດສັນ ຍາ, ສົນທິສັນຍາ ທີ່ສອງລັດຖະບານໄດ້ລົງນາມຮ່ວມກັນ ເປັນຕົ້ນບັນດາການຮ່ວມມືໃນການພັດທະນາຊົນນະບົດ, ການພັດທະນາໝູ່ບ້ານລຽບຕາມຊາຍແດນ, ການຮ່ວມມືຂົງເຂດວຽກງານ ປກຊ-ປກສ ໃຫ້ໄດ້ຮັບການຈັດຕັ້ງປະຕິ ບັດໃນຕໍ່ໜ້າ ໄດ້ຮັບຜົນດີ.

ພາຍຫຼັງການພົບປະສອງຝ່າຍ, ຄະນະຜູ້ແທນສະພາແຫ່ງຊາດລາວ ໄດ້ເຂົ້າຢ້ຽມຂໍ່ານັບສະຫາຍ ພົທ. ເຈິ່ນ ກວາງ ເຟືອງ (Trần Quang Phương) ກຳມະການສູນກາງພັກກອມມູນິດຫວຽດນາມ, ຮອງປະທານສະພາແຫ່ງຊາດ ເຊິ່ງໄດ້ດາໍເນີນໄປດ້ວຍບັນຍາກາດອັນອົບອຸ່ນ, ເປັນກັນເອງຖານສະຫາຍອ້າຍນ້ອງ. ສະຫາຍ ພົຕ. ປອ. ວົງສັກ ພັນທະວົງ ໄດ້ສະແດງຄວາມຂອບໃຈທີ່ສະຫາຍຮອງປະທານສະພາແຫ່ງຊາດໃຫ້ການຕ້ອນຮັບໃນຄັ້ງນີ້ ພ້ອມທັງແຈ້ງໃຫ້ຊາບຜົນສຳເລັດການພົບປະສອງຝ່າຍ. ສະຫາຍຮອງປະທານສະພາແຫ່ງຊາດ ກໍໄດ້ຊີ້ນຳໃຫ້ສອງກຳ ມາທິການປ້ອງກັນຊາດ-ປ້ອງກັນຄວາມສະຫງົບ ສືບຕໍ່ຮັກສາມູນເຊື້ອການຮ່ວມມືກັນໃຫ້ນັບມື້ເຂົ້າສູ່ລວງເລິກ.

ໃນວັນທີ 13 ສິງຫາ, ຄະນະຍັງໄດ້ຢ້ຽມຢາມສະຖານເອກອັກຄະລັດຖະທູດ ແຫ່ງ ສປປລາວ ປະຈຳ ສສ.ຫວຽດນາມ ເພື່ອເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ IX ໂດຍມີທ່ານ ນາງ ຄຳເພົາ ເອີນທະວັນ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປລາວ ປະຈຳ ສສ.ຫວຽດ ນາມ ພ້ອມດ້ວຍຄະນະນຳ, ພະນັກງານສະຖານທູດ, ພະນັກງານການບິນລາວ ແລະ ບັນດາຜູ້ຕາງໜ້ານັກສຶກສາ ລາວທີ່ກຳລັງຮ່ຳຮຽນຢູ່ສະຖາບັນການສຶກສາໃນນະຄອນຫຼວງຮ່າໂນ້ຍ ເຂົ້າຮ່ວມຮັບຟັງ.

ນອກຈາກເຄື່ອນໄຫວວຽກງານຢູ່ນະຄອນຫຼວງຮ່າໂນ້ຍແລ້ວ, ຄະນະຜູ້ແທນສະພາແຫ່ງຊາດລາວ ຍັງໄດ້ໄປຢ້ຽມຢາມແຂວງແທ່ງຫວາ (Thanh Hóa) ເຊິ່ງໄດ້ພົບປະເຮັດວຽກກັບສະພາປະຊາຊົນແຂວງ, ກອງບັນຊາການທະຫານແຂວງ, ກອງບັນຊາການທະຫານຊາຍແດນແຂວງ ແລະ ກອງບັນຊາການຕຳຫຼວດແຂວງ ພ້ອມທັງຢ້ຽມ ຢາມພື້ນຖານທາງດ້ານເສດຖະກິດຈຳນວນໜຶ່ງຂອງແຂວງອີກດ້ວຍ.