ໃນໂອກາດທີ່ເຂົ້າຮ່ວມພິທີສະເຫຼີມສະຫຼອງວັນສ້າງຕັ້ງອົງການກວດສອບແຫ່ງລັດ, ທ່ານນາງ ປານີ ຢາທໍ່ຕູ້ ປະທານ ສະພາແຫ່ງຊາດ ໄດ້ເນັ້ນໃຫ້ອົງການກວດສອບສ້າງນັກກວດສອບຢ່າງມີຄຸນນະພາບ. ມີຈັນຍາບັນ, ຈັນຍາທໍາ ມີຄວາມຊື່ ສັດບໍລິສຸດ, ມີຄວາມທ່ຽງທຳ.
ພິທີສະເຫຼີມສະຫຼອງວັນສ້າງຕັ້ງອົງການກວດສອບແຫ່ງລັດ ຄົບຮອບ 22 ປີ (5 ສິງຫາ 1998-5 ສິງຫາ 2020) ໄດ້ຈັດຂຶ້ນໃນວັນທີ 5 ສິງຫານີ້ ທີ່ຫ້ອງປະຊຸມຂອງອົງການດັ່ງກ່າວ ໂດຍການເປັນປະ ທານຂອງທ່ານນາງ ປານີ ຢາທໍ່ຕູ້, ມີຄະນະນຳ, ພະນັກງານລັດຖະກອນ ແລະ ພາກສ່ວນກ່ຽວຂ້ອງເຂົ້າຮ່ວມ.
ໃນພິທີ, ທ່ານນາງ ວຽງທອງ ສີພັນດອນ, ປະທານອົງການກວດສອບແຫ່ງລັດ ໄດ້ລາຍງານປະຫວັດຄວາມເປັນມາຂອງອົງການກວດສອບແຫ່ງລັດ, ພ້ອມທັງໄດ້ຍົກໃຫ້ເຫັນເຖິງຜົນງານຂອງອົງການກວດສອບແຫ່ງລັດຍາດມາໄດ້ແຕ່ລະໄລຍະ.
ປັດຈຸບັນ, ກົງຈັກການຈັດ ຕັ້ງຂອງອົງການກວດສອບແຫ່ງລັດ ປະກອບດ້ວຍຂັ້ນສູນກາງ ປະກອບມີ 1 ຫ້ອງການ, 4 ກົມ, 1 ສະຖາບັນຝຶກອົບຮົມ ແລະ ອົງການກວດສອບຢູ່ຂັ້ນທ້ອງຖິ່ນປະກອບມີ 3ພາກ, ມີພະນັກງານ-ລັດຖະກອນອົງການກວດສອບທັງໝົດ 431 ທ່ານ. ທ່ານກ່າວອີກວ່າ: ໃນໄລຍະຜ່ານມາອົງການກວດສອບແຫ່ງລັດ ສາມາດດໍາເນີນການກວດສອບໄດ້ທັງໝົດ 810 ເທື່ອ ໃນນັ້ນ ໄດ້ກວດສອບຢູ່ບັນດາກະຊວງ,ອົງການ, ແຂວງ ແລະ ນະຄອນຫຼວງ 492 ເທື່ອ; ກວດສອບທະນາຄານ 36 ເທື່ອ; ກວດສອບວິສາຫະກິດ 106 ເທື່ອ ແລະ ກວດສອບໂຄງການເງິນກູ້ຢືມ ແລະ ຊ່ວຍເຫຼືອຈາກຕ່າງປະເທດ 157 ເທື່ອ. ກວດສອບເຫັນລາຍຮັບເພີ່ມ 3.808,38 ຕື້ກີບ, ລາຍຈ່າຍເພີ່ມ 9.990,73 ຕື້ກີບ ຊຶ່ງພາຍຫຼັງກອງປະຊຸມສະພາແຫ່ງຊາດຮັບຮອງ ກໍໄດ້ມີການດໍາເນີນການກວດສອບເກັບກູ້ຄືນໄດ້ຈໍານວນຫຼວງຫຼາຍສົມຄວນ.ສໍາລັບວຽກງານຮ່ວມມືພົວພັນກັບຕ່າງປະເທດ, ແມ່ນສາມາດຍາດແຍ່ງເອົາການຊ່ວຍເຫຼືອທາງດ້ານວິຊາການ, ທາງດ້ານທຶນຮອນ, ບົດຮຽນອັນກ້າວໜ້າມາພັດທະນາວຽກງານກວດສອບແຫ່ງລັດໃຫ້ນັບມື້ນັບເຂັ້ມແຂງ ແລະ ສາມາດເຊື່ອມໂຍງກັບພາກພື້ນ ແລະ ສາກົນເທື່ອລະກ້າວ ໃນຂອບການຮ່ວມມືທັງສອງຝ່າຍ,ຫຼາຍຝ່າຍ ແລະ ສະຖາບັນກວດສອບສາກົນ, ພາກພື້ນ ແລະ ປະເທດຮ່ວມມືຍຸດທະສາດ.
ທ່ານ ນາງ ປານີ ຢາທໍ່ຕູ້ ໄດ້ສະແດງຄວາມຊົມເຊີຍຍ້ອງຍໍຕໍ່ຜົນງານທີ່ອົງການກວດສອບແຫ່ງລັດຍາດມາໄດ້ ໃນຕະຫຼອດໄລຍະ 22 ປີທີ່ຜ່ານມາ, ພ້ອມທັງເນັ້ນໜັກໃຫ້ຄະນະນຳອົງການກວດສອບແຫ່ງລັດ ສືບຕໍ່ສຶກສາອົບຮົມການເມືອງ-ແນວຄິດ ໃຫ້ພະນັກງານ,ນັກກວດສອບແຫ່ງລັດເປັນປົກກະຕິ, ເລິກເຊິ່ງ ແລະ ທົ່ວເຖິງ ເພື່ອສ້າງໃຫ້ພະນັກງານ-ນັກກວດສອບມີຄວາມໜັກແໜ້ນ, ມີຄຸນສົມບັດສິນທໍາປະຕິວັດ, ມີຈັນຍາບັນ, ຈັນຍາທໍາ ມີຄວາມຊື່ສັດບໍລິສຸດ ໃນນັ້ນ ສໍາລັບນັກກວດສອບສິ່ງທີ່ສໍາຄັນກວ່າໝູ່ ແມ່ນຈັນຍາບັນ ຊຶ່ງໝາຍເຖິງຄວາມຊື່ສັດ ແລະ ຄວາມທ່ຽງທໍາ; ສືບຕໍ່ປັບປຸງກົງຈັກການຈັດຕັ້ງໃຫ້ມີຄວາມເຂັ້ມແຂງ; ສືບຕໍ່ກໍ່ສ້າງ ແລະ ຍົກລະດັບພະນັກງານ-ນັກກວດສອບ ທາງດ້ານວິຊາສະເພາະ ໃຫ້ເປັນມືອາຊີບ ເພື່ອຕອບສະໜອງຄວາມຮຽກຮ້ອງຕ້ອງການຂອງວຽກງານ ໃນສະເພາະໜ້າ ແລະ ຍາວນານ, ໃນໄລຍະສັ້ນ ຕ້ອງຈັດຝຶກອົບຮົມກັບທີ່ພ້ອມທັງເຮັດຕົວຈິງ ໂດຍເນັ້ນໃສ່ການພັດທະນາທັກສະໃນການກວດສອບຕົວຈິງ, ໃນໄລຍະຍາວສ້າງໃຫ້ໄດ້ນັກກວດສອບທີ່ມີຄຸນນະພາບ ຕາມຂັ້ນຂອງນັກກວດສອບ ທີ່ໄດ້ກໍານົດໄວ້; ສືບຕໍ່ສ້າງ ແລະ ປັບປຸງນິຕິກໍາ ເພື່ອເປັນເຄື່ອງມືຮັບໃຊ້ໃນວຽກງານກວດສອບແຕ່ລະດ້ານ ໃຫ້ຄົບຖ້ວນ; ການປະຕິບັດພາລະບົດບາດຂອງອົງການກວດສອບແຫ່ງລັດ ໃນສະພາບທີ່ເສດຖະກິດ, ແຜນການ, ການເງິນ-ເງິນຕາ ຂອງປະເທດເຮົາພົບຄວາມຫຍຸ້ງຍາກ, ການລະເມີດວິໄນແຜນການ-ການເງິນ ຍັງມີຢ່າງແຜ່ຫຼາຍ ອົງການກວດສອບຕ້ອງໄດ້ເພີ່ມທະວີເອົາໃຈໃສ່ໃນສະພາບເລັ່ງທວງດັ່ງກ່າວ ເພື່ອເຮັດໃຫ້ເສດຖະກິດ-ການເງິນພາກລັດ ມີຄວາມເຂັ້ມງວດ, ມີປະສິດທິພາບ ແລະ ປະສິດທິຜົນ. ສະນັ້ນ, ຕ້ອງໄດ້ເຂັ້ມງວດແລະໜັກແໜ້ນຕື່ມ ເພື່ອກວດໃຫ້ເຫັນ, ວິເຄາະວິໄຈໃຫ້ໄດ້ ແລະ ສະເໜີມາດຕະການແກ້ໄຂ ໃຫ້ປະກົດຜົນເປັນຈິງ ແລະ ທັນກັບເວລາ.
ແຫຼ່ງຂ່າວທີ່ມາ: ໜັງສືພິມ ປະຊາຊົນ