(ສພຊ) ໃນລະຫວ່າງວັນທີ 21-23 ກຸມພາ 2019 ທີ່ແຂວງໄຊຍະບູລີ, ທ່ານ ນາງ ປານີ ຢາທໍ່ ຕູ້ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ເຮັດວຽກກັບການນໍາຂອງແຂວງ ແລະ ເຂົ້າຮ່ວມງານມະຫາກໍາບຸນຊ້າງປີ 2019.

ໃນການເຄື່ອນໄຫວຢ້ຽມຢາມ ແລະ ເຮັດວຽກໃນຄັ້ງນີ້, ທ່ານປະທານສະພາແຫ່ງຊາດ ໄດ້ເຂົ້າຮ່ວມກອງປະຊຸມກັບການນໍາຂອງແຂວງ ທີ່ສະໂມສອນແຂວງ ເຂົ້າຮ່ວມມີທ່ານ ພົງສະຫວັນ ສິດທະວົງ ກໍາມະການສູນກາງພັກ, ເຈົ້າແຂວງໆໄຊຍະບູລີ; ມີບັນດາພະແນກການອ້ອມຂ້າງແຂວງ, ທະຫານ-ຕໍາຫລວດ ແລະ ພາກສ່ວນທີ່ກ່ຽວຂ້ອງ; ກອງປະຊຸມໄດ້ຮັບຟັງການລາຍງານສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ ເຊິ່ງເຫັນໄດ້ຜົນສໍາເລັດຫລາຍດ້ານໃນປີຜ່ານມາ ເປັນຕົ້ນວຽກງານປ້ອງກັນຊາດ-ປ້ອງກັນຄວາມສະຫງົບ ໄດ້ສືບຕໍ່ນໍາພາເອົາແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານຂອງພັກກາຍເປັນຂອງປະຊາຊົນໃຫ້ເປັນຮູບປະທຳຫລາຍຂຶ້ນ, ທົ່ວແຂວງສືບຕໍ່ຮັກສາໄດ້ສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມເປັນລະບຽບຮຽບຮ້ອຍ; ວຽກງານເສດຖະກິດ ເຫັນວ່າ: ປີ 2018 ຜ່ານມາ ເສດຖະກິດຂອງແຂວງມີການຂະຫຍາຍຕົວຢ່າງຕໍ່ເນື່ອງ ບັນດາຂະແໜງການມີການຂະຫຍາຍຕົວ ເປັນຕົ້ນຂະແໜງກະສິກໍາ ແລະ ປ່າໄມ້, ອຸດສາຫະກໍາ ແລະ ການບໍລິການ; ວຽກງານການສຶກສາ ແລະ ສາທາລະນະສຸກ ໄດ້ເອົາໃຈໃສ່ປັບປຸງລະດັບຄຸນນະພາບການຮຽນ-ການສອນຂອງຄູ, ນັກຮຽນ, ນໍ້າໃຈບໍລິການຮັບໃຊ້,​ ຈັນຍາບັນຂອງພະນັກງານແພດໝໍ ຢູ່ໂຮງໝໍ ແລະ ສຸກສາລາ, ສູນບໍລິການຕ່າງໆໃຫ້ສູງຂຶ້ນກວ່າເກົ່າ, ຊຸກຍູ້ການຈັດຕັ້ງປະຕິບັດບັນດາຄາດໝາຍດ້ານການພັດທະນາແບບຍືນຍົງ ເປັນຮູບປະທໍາຕົວຈິງຫລາຍຂຶ້ນ ແລະ ສາມາດບັນລຸໄດ້ບັນດາຄາດໝາຍຈໍານວນໜຶ່ງ; ວຽກງານຄຸ້ມຄອງບໍລິຫານລັດຂອງແຂວງ ບັນດາພະແນກການ, ອົງການ, ກົມກອງທ້ອງຖິ່ນແຕ່ລະເມືອງ ໄດ້ມີມາດຕະການໃນການຫັນມາບັງຄັບໃຊ້ກົດໝາຍ, ບັນດານິຕິກໍາລຸ່ມກົດໝາຍ ເຂົ້າໃນການບໍລິຫານວຽກງານຂອງຕົນຫລາຍຂຶ້ນ ແລະ ມີຄວາມສັກສິດເທື່ອລະກ້າວ, ອົງການປົກຄອງແຂວງໄດ້ນໍາເອົານິຕິກຳລຸ່ມກົດໝາຍຜ່ານສະພາປະຊາຊົນແຂວງແລ້ວ 9 ສະບັບ; ພ້ອມກັນນີ້, ຍັງໄດ້ອອກຂໍ້ຕົກລົງແຕ່ງຕັ້ງຄະນະກໍາມະການລົງຕິດຕາມຊຸກຍູ້ການຈັດຕັ້ງບັນດາມະຕິ, ຄໍາສັ່ງ ແລະ ນິຕິກໍາລຸ່ມກົດໝາຍຂອງສູນກາງ ກໍຄືຂັ້ນແຂວງວາງອອກ.

ຄຽງຄູ່ກັບຜົນສໍາເລັດນັ້ນ, ເຫັນວ່າຍັງມີຈຸດອ່ອນຂໍ້ຄົງຄ້າງບາງດ້ານທີ່ຈະຕ້ອງໄດ້ສືບຕໍ່ປັບປຸງແກ້ໄຂ ຄື: ປະກົດການຫຍໍ້ທໍ້ໃນສັງຄົມ, ບັນຫາຢາເສບຕິດ, ຂີ້ລັກງັດແງະ,  ຫລິ້ນກິນຟຸມເຟືອຍ, ອຸບັດເຫດຕາມທ້ອງຖະໜົນ ແລະ ບັນຫາອາດສະຍາກໍາອື່ນໆ; ເສດຖະກິດສືບຕໍ່ຂະຫຍາຍຕົວຢ່າງຕໍ່ເນື່ອງ ແຕ່ບໍ່ທັນຮັບປະກັນລັກສະນະຍືນຍົງ ຍ້ອນອັດຕາສ່ວນໂຄງປະກອບເສດຖະກິດ ດ້ານອຸດສາຫະກໍາ, ການບໍລິການຍັງຢູ່ໃນລະດັບຕໍ່າ, ຍັງຂາດຖານລາຍຮັບທີ່ໝັ້ນທ່ຽງ ຄໍ້າປະກັນໃຫ້ແກ່ເສດຖະກິດມະຫາພາກ ກໍຄືລາຍຮັບງົບປະມານຂອງລັດ; ການຜະລິດກະສິກໍາເປັນສິນຄ້າ ເຖິງວ່າເປັນຂະບວນການດີ, ແຕ່ສະມັດຕະພາບຍັງຕໍ່າ, ປະລິມານຍັງໜ້ອຍ, ຄຸນນະພາບຍັງບໍ່ທັນດີ, ຄວາມສາມາດແກ່ງແຍ່ງແຂ່ງຂັນກັບຕະຫລາດພາຍນອກຍັງບໍ່ທັນແຂງແຮງ; ລັດຍັງບໍ່ທັນມີມາດຕະການຕົວຈິງ ໃນການຊຸກຍູ້ສົ່ງເສີມເສດຖະກິດຂະໜາດນ້ອຍ, ຂະໜາດກາງຢ່າງເປັນຮູບປະທໍາ ເຮັດໃຫ້ບັນດາຫົວໜ່ວຍທີ່ມີຢູ່ແລ້ວບໍ່ມີຄວາມເຂັ້ມແຂງ ແລະ ຍືນຍົງ ເປັນຕົ້ນການສະໜອງແຫລ່ງທຶນໃນອັດຕາດອກເບ້ຍທີ່ເໝາະສົມ, ການຄໍ້າປະກັນລາຄາ ແລະ ອື່ນໆ; ການປະຕິບັດໂຄງການລົງທຶນຂອງລັດຈໍານວນໜຶ່ງ ທຽບໃສ່ສັນຍາຮັບເໝົາກໍ່ສ້າງເຫັນວ່າມີຄວາມຫລ້າຊ້າ; ວຽກງານທ່ອງທ່ຽວຍັງບໍ່ທັນມີຄວາມເຂັ້ມແຂງຍ້ອນຂາດຫລາຍປັດໄຈ ຕົ້ນຕໍແມ່ນບໍ່ຮູ້ຂົນຂວາຍດືງດູດແຫລ່ງທຶນມາພັດທະນາແຫລ່ງທ່ອງທ່ຽວທີ່ມີຢູ່ແລ້ວ, ອີກດ້ານໜຶ່ງການບໍລິຫານລັດ ບາງຂອດຍັງບໍ່ທັນເປີດຊ່ອງທາງອໍານວຍຄວາມສະດວກໃຫ້ແກ່ນັກທ່ອງທ່ຽວໄດ້ຢ່າງສະດວກສະບາຍ; ອີກບັນຫາໜຶ່ງແມ່ນຍັງຂາດບຸກຄະລາກອນທີ່ເກັ່ງ, ມີຄວາມຮູ້ຄວາມສາມາດ ຢູ່ໃນແຕ່ລະຂົງເຂດ ໂດຍສະເພາະຢູ່ຂົງເຂດເສດຖະກິດ, ຂົງເຂດວິທະຍາສາດເຕັກໂນໂລຊີ ແລະ ການພົວພັນຕ່າງປະເທດ; ພ້ອມກັນນັ້ນ, ທ່ານ ພົງສະຫວັນ ສິດທະວົງ ຍັງໄດ້ໃຫ້ຮູ້ກ່ຽວກັບແຜນວຽກຈຸດສຸມສໍາລັບປີ 2019 ເພື່ອຮັບປະກັນໃຫ້ບັນລຸຕາມຄາດໝາຍທີ່ວາງອອກໃນແຜນພັດທະນາເສດຖະສິດ-ສັງຄົມ 5 ປີ 2016-2020 ທີ່ແຂວງວາງອອກ ພ້ອມທັງສະເໜີນໍາລັດຖະບານເບິ່ງຄືນການແບ່ງຂັ້ນຄຸ້ມຄອງການເງິນງົບປະມານລະຫວ່າງສູນກາງ ແລະ ທ້ອງຖິ່ນ ໃຫ້ມີຄວາມເໝາະສົມ ບໍ່ໃຫ້ອັດຕາຂາດດຸນງົບປະມານສູງເກີນໄປ  ແລະ ຂໍແຫລ່ງທຶນເພື່ອກໍ່ສ້າງໂຮງໝໍແຂວງຫລັງໃຫມ່.

ທ່ານ ນາງ ປານີ ຢາທໍ່ຕູ້ ໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນໍາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ ເຊິ່ງຈະຕ້ອງສຶບຕໍ່ເອົາໃຈໃສ່ບາງດ້ານ ດັ່ງນີ້: ສະເໜີໃຫ້ສືບຕໍ່ເອົາໃຈໃສ່ແກ້ໄຂສິ່ງກີດຂວາງໃນແຕ່ລະຂະແໜງການ ເປັນຕົ້ນໃນຂົງເຂດວຽກງານປ້ອງກັນຊາດ-ປ້ອງກັນຄວາມສະຫງົບ, ຂົງເຂດເສດຖະກິດ ແລະ ຂົງເຂດອື່ນໆ ຕ້ອງເບິ່ງຄືນວ່າຍ້ອນບັນຫາໃດ ຈື່ງບໍ່ສາມາດບັນລຸຕາມຄາດໝາຍໄດ້ ຈະແມ່ນຍ້ອນບັນຫາໄພທຳມະຊາດ, ພູມສັນຖານ ຫລື ບັນຫາອື່ນໆ ກໍຄວນແກ້ໃຫ້ຖືກຈຸດ; ທ່າແຮງໃນການສ້າງໃຫ້ມີປັດໄຈໃຫມ່ໃນການຜະລິດທຸລະກິດ ຍັງມີຄວາມຄືບໜ້າຊ້າ; ສະນັ້ນ, ຈຶ່ງສະເໜີໃຫ້ເບິ່ງຄືນສາເຫດວ່າເປັນຫຍັງມັນຈຶ່ງຊ້າ; ສືບຕໍ່ຄຸ້ມຄອງລາຄາສິນຄ້າ, ອັດຕາແລກປ່ຽນໃຫ້ມີຄວາມສະຫງົບ ເພາະປັດຈຸບັນລາຄາສິນຄ້າມີການເໜັງຕີງແຮງ ຍ້ອນປະເທດເຮົານຳເຂົ້າສິນຄ້າຫລາຍ; ສະເໜີໃຫ້ພະນັກງານໃນຂົງເຂດຍຸຕິທຳ ສານ, ໄອຍະການ ແລະ ອົງການສືບສວນສອບສວນ ຕ້ອງປະຕິບັດໜ້າທີ່ໃຫ້ຖືກກັບພາລະບົດບາດ, ສິດ ແລະ ໜ້າທີ່ຂອງຕົນ ເພື່ອຮັບປະກັນໄດ້ຄວາມຍຸຕິທຳໃນທົ່ວແຂວງ ພ້ອມທັງສະເໜີໃຫ້ຄະນະພັກຂອງຂະແໜງທີ່ກ່ຽວຂ້ອງ ຕິດຕາມກວດກາຄືນພະນັກງານຂອງຕົນວ່າປະຕິບັດຖືກຕ້ອງຕາມລະບຽບກົດໝາຍ ຫລື ບໍ່?, ຊື່ສັດບໍລິສຸດ ຫລື ບໍ່?, ເອົາໃຈໃສ່ຈັດຕັ້ງປະຕິບັດການເຊື່ອມຊືມກົດໝາຍ ໃຫ້ບັນດາຂະແໜງການທີ່ກ່ຽວຂ້ອງໂດຍສະເພາະແມ່ນ 4 ອົງການ, ເພີ່ມທະວີຄວາມຮັບຜິດຊອບທາງດ້ານການເມືອງຂອງພະນັກງານ ແລະ ການນໍາແຕ່ລະຂັ້ນຂອງອົງການດັ່ງກ່າວ; ນອກຈາກນັ້ນ.

ທ່ານປະທານສະພາແຫ່ງຊາດ ຍັງເນັ້ນໃຫ້ສືບຕໍ່ປັບປຸງກົນໄກການຈັດເກັບລາຍຮັບຂອງແຂວງ; ພ້ອມດຽວກັນນັ້ນ, ກໍຕ້ອງຮີບຮ້ອນນໍາໃຊ້ເຄື່ອງມືທັນສະໄໝເຂົ້າໃນການເກັບລາຍຮັບ; ສະເໜີໃຫ້ບັນດາຂະແໜງການຕ້ອງມີກ່ອງຮັບຟັງຄວາມຄິດເຫັນຂອງປະຊາຊົນ ເພື່ອຕິດຕາມການເຄື່ອນໄຫວຂອງພະນັກງານ ແລະ ຮັບຟັງຄໍາສະເໜີ ຕະຫລອດຮອດຂໍ້ຫຍຸ້ງຍາກຂອງປະຊາຊົນ ເພື່ອແກ້ໄຂຄໍາສະເໜີຕ່າງໆຂອງປະຊາຊົນຢ່າງເໝາະສົມ.

ໃນການເຄື່ອນໄຫວໃນຄັ້ງນີ້, ທ່ານປະທານສະພາແຫ່ງຊາດ ຍັງໄດ້ເຂົ້າຮ່ວມເທສະການມະຫາກຳບຸນຊ້າງ ປະຈໍາປີ 2019 ທີ່ແຂວງໄຊຍະບູລີ, ຢ້ຽມຢາມສູນອະນຸລັກຊ້າງ, ຕິດຕາມຄວາມຄືບໜ້າຂອງໂຄງການກໍ່ສ້າງເຂື່ອນໄຟຟ້ານໍ້າຂອງແຫ່ງທຳອິດຂອງ ສປປລາວ ແລະ ໂຄງການກໍ່ສ້າງຕຶກສະພາປະຊາຊົນແຂວງໄຊຍະບູລີ ຫລັງໃຫມ່.

(ສົມນຶກ ແກ້ວໄຊຍະຈັກ)