ໃນລະຫວ່າງວັນທີ 14-16 ສິງຫາ 2022 ທີ່ຜ່າມາ, ທ່ານ ປອ. ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສະພາແຫ່ງຊາດ ແລະ ພັນລະຍາ ພ້ອມດ້ວຍຄະນະຕິດຕາມ ໄດ້ສໍາເລັດການຢຽມຢາມ, ເຮັດວຽກຢູ່ແຂວງອຸດົມໄຊ ໂດຍການຕ້ອນຮັບຂອງທ່ານ ບຸນຄົງ ຫລ້າຈຽມພອນ ກຳມະການສຳຮອງສູນກາງພັກ, ເຈົ້າແຂວງອຸດົມໄຊ ແລະ ທ່ານ ຄໍາດີ ວົງລ້ອມ ປະທານສະພາປະຊາຊາຊົນແຂວງ, ບັນດາທ່ານຮອງເຈົ້າແຂວງ, ຄະນະປະຈຳພັກແຂວງ, ບັນດາທ່ານສະມາຊິກສະພາແຫ່ງຊາດປະຈຳເຂດເລືອກຕັ້ງທີ 4, ສະມາຊິກສະພາປະຊາຊົນແຂວງ ແລະ ພະນັກງານຫລັກແຫລ່ງຈາກພະແນກການຕ່າງໆພາຍໃນແຂວງເຂົ້າຮ່ວມ.

 ຜ່ານການເຄື່ອນໄຫວເຮັດວຽກຢູ່ເມືອງ ແລະ ໄດ້ຮັບຟັງການລາຍງານໂດຍສັງເຂບກ່ຽວກັບສະພາບທີ່ພົ້ນເດັ່ນໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022 ຈາກທ່ານເຈົ້າແຂວງ; ຮັບຟັງການລາຍງານການເຄື່ອນໄຫວວຽກງານສະພາປະຊາຊົນແຂວງອຸດົມໄຊ, ຈາກທ່ານປະທານສະພາແຫ່ງຊາດ ໄດ້ມີຄໍາເຫັນໂອ້ລົມຊີ້ນຳຕໍ່ຄະນະພັກແຂວງ, ສະພາປະຊາຊົນແຂວງ, ສະມາຊິກອົງການປົກຄອງຂອງແຂວງ, ລວມທັງພະແນກການອ້ອມຂ້າງແຂວງ ເຊິ່ງທ່ານໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນຳບາງບັນຫາດັ່ງນີ້:

1. ແຂວງອຸດົມໄຊ ເປັນແຂວງໃຈກາງຂອງບັນດາແຂວງພາກເໜືອ ແລະ ເປັນແຂວງທາງຜ່ານລະຫວ່າງບັນດາແຂວງຢູ່ພາກເໜືອ ແລະ ບັນດາແຂວງພາກໃຕ້, ຈາກຈຸດພິເສດທາງດ້ານທີ່ຕັ້ງດັ່ງກ່າວ ເຮັດໃຫ້ມີການລົງທຶນດ້ານການຄ້າ, ດ້ານການບໍລິການທ່ອງທ່ຽວ, ການຂົນສົ່ງນັບມື້ເພີ່ມຂຶ້ນ, ມີນັກທຸລະກິດ, ນັກລົງທຶນເຂົ້າມາເປັນຈໍານວນຫຼາຍ. ສະນັ້ນ, ຈຶ່ງສະເໜີໃຫ້ຄະນະພັກ, ສະພາປະຊາຊົນແຂວງ, ອົງການປົກຄອງແຂວງ ເພີ່ມທະວີຄວາມເອົາໃຈໃສ່ປົກປັກຮັກສາຄວາມສະຫງົບແຂວງຂອງຕົນ, ຈັດຕັ້ງຜັນຂະຫຍາຍແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານຢ່າງທົ່ວເຖິງ ແລະ ເລິກເຊິ່ງ, ສ້າງ ແລະ ປັບປຸງຕາໜ່າງປ້ອງກັນຊາດ-ປ້ອງກັນຄວາມສະຫງົບ ຢູ່ທ້ອງຖິ່ນຮາກຖານໃຫ້ເຂັ້ມແຂງ, ໜັກແໜ້ນສະກັດກັ້ນອາດຊະຍາກໍາຕ່າງໆຢ່າງທັນການ, ເດັດຂາດ ແລະ ເຂັ້ມງວດ; ເອົາໃຈໃສ່ຄຸ້ມຄອງສໍາມະໂນຄົວ, ການຄຸ້ມຄອງຄົນຕ່າງປະເທດ ໃຫ້ເຂັ້ມງວດຕາມກົດໝາຍ;
2. ແຂວງອຸດົມໄຊ ເປັນແຂວງທີ່ມີຫຼາຍຊົນເຜົ່າ(12 ຊົນເຜົ່າ) ທີ່ມີວັດທະນະທໍາ, ຮີດຄອງປະເພນີທີ່ຈົບງາມ ແລະ ເປັນເອກະລັກຂອງຕົນ, ມີພູມປັນຍາໃນການດໍາລົງຊີວິດ ແລະ ທໍາມາຫາກິນທີ່ດີເດັ່ນຂອງຕົນ, ຖ້າພວກເຮົາມີຄວາມສາມັກປອງດອງເປັນອັນໜຶ່ງອັນດຽວ, ເປັນກໍາລັງແຮງໃນການສ້າງສາພັດທະນາເສດຖະກິດ-ສັງຄົມ ໃຫ້ຈະເລີນຮຸ່ງເຮືອງ. ສະນັ້ນ,​ ຄະນະພັກ, ສະພາປະຊາຊົນແຂວງ ແລະ ອົງການປົກຄອງແຂວງອຸດົມໄຊ ຈະຕ້ອງໄດ້ເອົາໃຈໃສ່ສຶກສາອົບຮົມໃຫ້ປະຊາຊົນບັນດາເຜົ່າ ມີຄວາມສາມັກຄີປອງດອງ, ມີນໍ້າໃຈຮັກຊາດ ແລະ ມີນໍ້າໃຈເສຍສະຫຼະເພື່ອຜົນປະໂຫຍດສ່ວນລວມ, ສ້າງສະຕິເຄົາລົບກົດໝາຍ, ການປະຕິບັດພັນທະຂອງປະຊາຊົນ. ພ້ອມກັນນັ້ນ, ກໍສ້າງເງື່ອນໄຂໃຫ້ອົງການແນວລາວສ້າງຊາດ, ອົງການຈັດຕັ້ງມະຫາຊົນ ໄດ້ເຄື່ອນໄຫວປະຕິບັດໜ້າທີ່ວຽກງານຂອງຕົນຕາມກົດໝາຍກໍານົດຢ່າງມີປະສິດທິພາບ ເພື່ອສຶກສາອົບຮົມບັນດາຊັ້ນຄົນໃຫ້ມີຄວາມສາມັກຄີປອງດອງ, ຕື່ນຕົວ ແລະ ເປັນເຈົ້າການເຂົ້າຮ່ວມພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ແລະ ບັນຫາອື່ນໆ.

    ພາບ/ຂ່າວ: ແສງພອນ ອິນນະລົງ.