(ສພຊ) ທ່ານ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ຊຸກຍູ້ການຜະລິດ ຢູ່ເມືອງສັງທອງ ໃນວັນທີ 15 ມີນາ 2022 ຢູ່ທີ່ສະໂມສອນເມືອງ ໂດຍການຕ້ອນຮັບຂອງທ່ານ ອາດສະພັງທອງ ສີພັນດອນ ເຈົ້າຄອງນະຄອນຫລວງວຽງຈັນ ພ້ອມດ້ວຍເຈົ້າເມືອງ-ຮອງເຈົ້າເມືອງ, ຫົວໜ້າພະແນກການ ຕະຫລອດຮອດພະນັກງານຫລັກແຫລ່ງ ແລະ ພາກ ສ່ວນກ່ຽວຂ້ອງ.
ໃນການລົງຢ້ຽມຢາມ ທ່ານ ພົງສະຫວັນ ສີສຸພັນ ເຈົ້າເມືອງໆສັງທອງ ໄດ້ລາຍງານແຜນພັດທະນາເສດຖະ ກິດ-ສັງຄົມ ແລະ ສະພາບການຈັດຕັ້ງປະຕິບັດມາດຕະການປ້ອງກັນ ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ໃນທົ່ວເມືອງໂດຍຫຍໍ້ ເຊິ່ງໄດ້ຍົກໃຫ້ເຫັນຜົນສຳເລັດທີ່ສາມາດຍາດມາໄດ້ໃນໄລຍະຜ່ານມາ ກໍຄືການພັດທະນາເສດຖະກິດທີ່ມີການຂະຫຍາຍຕົວໃນລະດັບດີ ນໍາພາປະຊາຊົນສ້າງເສດຖະກິດຄອບຄົວ ດ້ວຍການທຳການຜະລິດໃຫ້ເປັນສິນຄ້າ ແລະ ນໍາພາພັດທະນາພື້ນຖານໂຄງລ່າງໃນເຂດຕ່າງໆພາຍໃນເມືອງ ພ້ອມກັບການປະຕິບັດມາດຕະການປ້ອງກັນພະຍາດໂຄວິດ-19 ຢ່າງເຂັ້ມງວດ ດ້ວຍຄວາມເອົາໃຈໃສ່ຢ່າງຕັ້ງໜ້າ.

ຈາກນັ້ນ, ທ່ານ ຂັນທອງ ພິນນະກຳ ຫົວໜ້າກອງທຶນບ້ານສາມັກຄີແນວລາວສ້າງຊາດ ບ້ານປາກແຖບ ເມືອງສັງທອງ ກໍໄດ້ລາຍງານໃຫ້ຮູ້ກ່ຽວກັບໂຄງການກອງທຶນບ້ານແນວລາວສ້າງຊາດ ເຊິ່ງກອງທຶນດັ່ງກ່າວສ້າງຕັ້ງຂຶ້ນໃນວັນທີ 27 ພຶດສະພາ 2020 ໂດຍການອະນຸຍາດຈາກທ່ານ ເຈົ້າເມືອງໆສັງທອງ ໂຄງຮ່າງການຈັດຕັ້ງກອງທຶນບ້ານ ປະກອບມີ 7 ທ່ານ ໃນນີ້, ບໍລິຫານກອງທຶນບ້ານໂດຍກົງມີ 5 ທ່ານ, ມີທີ່ປຶກສາ 1 ທ່ານ, ມີກວດກາ 1 ທ່ານ, ດ້ານການຈັດຕັ້ງຂັ້ນເມືອງ ແລະ ຊີ້ນໍາກອງທຶນບ້ານປະກອບມີ: ຄະນະຊີ້ນຳ ແລະ ກອງເລຂາຄະນະປະສານງານໂຄງການຊຸກຍູ້ ແລະ ສົ່ງເສີມກະສິກໍາ ຕິດພັນກັບການຜະລິດເມືອງສັງທອງ ການດໍາເນີນກິດຈະກໍາຂອງກອງທຶນບ້ານປາກແຖບ ແມ່ນຕິດພັນກັບແຜນພັດທະນາເສດຖະກິດຂອງລັດ ກໍຄືສູນກາງແນວລາວສ້າງຊາດ ເປັນຕົ້ນແມ່ນ ໂຄງການສ້າງຄອບຄົວ ແລະ ບ້ານສາມັກຄີປອງດອງ ທີ່ຕິດພັນກັບການແກ້ໄຂຄວາມທຸກຍາກຂອງປະຊາຊົນບັນດາເຜົ່າ ເພື່ອໃຫ້ປະຊາຊົນຢູ່ເຂດຫ່າງໄກສອກຫລີກ ເຂົ້າເຖິງແຫລ່ງທຶນໄດ້ງ່າຍຂຶ້ນ ໂດຍການເນັ້ນສ້າງຄອບຄົວຕົວແບບ ໃຫ້ປະຊາຊົນໄດ້ຮຽນຮູ້, ໄດ້ຮັບການເຝິກອົບຮົມ, ສາມາດຜະລິດຜົນກະສິກໍາ ແລະ ຂາຍເປັນສິນຄ້າໄດ້.
ການລົງຢ້ຽມຢາມຄັ້ງນີ້ ຍັງໄດ້ມີການແລກປ່ຽນຄຳຄິດຄຳເຫັນ ຮ່ວມກັນປຶກສາຫາລືໃນຫລາຍບັນຫາທີ່ເປັນພື້ນຖານ ໃນການພັດທະນາເມືອງສັງທອງ ການຂະຫຍາຍການຜະລິດໃຫ້ເປັນສິນຄ້ານັບມື້ນັບຫລາຍ ລວມທັງການຈັດຕັ້ງປະຕິບັດການຕ້ານ ສະກັດກັ້ນ ແລະ ປ້ອງກັນພະຍາດໂຄວິດ-19.
ໃນໂອກາດດັ່ງກ່າວ ທ່ານປະທານສະພາແຫ່ງຊາດ ກໍໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນຳ ເຊິ່ງກ່ອນອື່ນທ່ານໄດ້ສະແດງຄວາມຍ້ອງຍໍຕໍ່ຄະນະນຳເມືອງ ທີ່ໄດ້ເອົາໃຈໃສ່ພັດທະນາເມືອງ ເຮັດໃຫ້ວຽກງານຫລາຍດ້ານມີການຂະຫຍາຍຕົວ ຜັນແປໄປໄດ້ຢ່າງຈະແຈ້ງຕັ້ງໜ້າ ເຊິ່ງເມືອງສັງທອງກໍແມ່ນເມືອງໜຶ່ງ ທີ່ມີທ່າແຮງທາງດ້ານພື້ນຖານໂຄງລ່າງ ດ້ານກະສິກໍາປູກຝັງ-ລ້ຽງສັດ ເຫັນໄດ້ວ່າມີການພັດທະນານັບມື້ນັບດີຂຶ້ນ ເສດຖະກິດກໍຂະຫຍາຍຕົວມີທ່າກ້າວ ການນຳພາຂອງຄະນະນຳໃນການປ້ອງກັນພະຍາດໂຄວິດ-19 ແມ່ນປະຕິບັດໄດ້ດີ ເຮັດໃຫ້ຊິວິດການເປັນຢູ່ຂອງປະຊາຊົນດີຂຶ້ນຢ່າງຕໍ່ເນື່ອງ ແຕ່ແນວໃດກໍຕາມ ຂໍຮຽກຮ້ອງໃຫ້ຄະນະນຳເມືອງສືບຕໍ່ເອົາໃຈໃສ່ຊີ້ນຳ-ນຳພາ ໃນການຈັດຕັ້ງປະຕິບັດທຸກວຽກງານຢ່າງຮອບດ້ານ ຫັນເອົາມູນເຊື້ອທີ່ມີມາຜັນຂະຫຍາຍ ໃຫ້ເກີດມີປະສິດທິຜົນ ທັງເພີ່ມທະວີເອົາໃຈໃສ່ໂຄສະນາປ້ອງກັນພະຍາດໂຄວິດຢ່າງຕໍ່ເນື່ອງ ບໍ່ໃຫ້ຖືເບົາ ນໍາໃຊ້ທ່າແຮງຂອງເມືອງໃຫ້ເປັນປະໂຫຍດ ເປັນຕົ້ນ: ດ້ານກະສິກຳ, ປູກຝັງ-ລ້ຽງສັດ, ການບໍລິການ, ການທ່ອງທ່ຽວ ພ້ອມທັງນຳພາສ້າງເສດຖະກິດຂອງເມືອງໃຫ້ຂະຫຍາຍຕົວ ສ້າງໄດ້ຜະລິດຕະພັນຂອງເມືອງໃຫ້ກາຍເປັນສິນຄ້າໃຫ້ຫລາຍ ເຮັດໃຫ້ປະຊາຊົນຮັ່ງມີ ແລະ ສຳຄັນຕ້ອງນຳພາສ້າງເມືອງໃຫ້ເຂັ້ມແຂງ ຮັບປະກັນໄດ້ຄວາມສະຫງົບ ປອດໄພເປັນລະບຽບຮຽບຮ້ອຍ ຕິດພັນກັບ 2 ວາລະແຫ່ງຊາດ ໃນການແກ້ໄຂຄວາມຫຍຸ້ງຍາກທາງດ້ານເສດຖະກິດ, ແກ້ໄຂບັນຫາຢາເສບຕິດໃຫ້ໄດ້ຢ່າງຂາດຕົວ.
ໃນໂອກາດເຄື່ອນໄຫວຢ້ຽມຢາມ ຄະນະ ຍັງໄດ້ມອບເງິນສົດ ຈໍານວນ 20 ລ້ານກີບ ແລະ ອຸປະກອນປ້ອງກັນພະຍາດໂຄວິດ-19 ໃຫ້ເມືອງສັງທອງອີກດ້ວຍ. ຈາກນັ້ນ, ຄະນະ ກໍໄດ້ຢ້ຽມຢາມຕົວຈິງສູນໂຄງການຂອງແນວລາວສ້າງຊາດ ທີ່ເປັນສູນການຜະລິດກະສິກຳ ທີ່ຈະສ້າງໃຫ້ເປັນຕົວແບບໃນການປູກພຶດເປັນສິນຄ້າ ຢູ່ເມືອງສັງທອງ ເຊິ່ງປູກພືດໃຫ້ໝາກຫລາຍຊະນິດ ເປັນຕົ້ນ ໝາກແຕງເມລອນ ແລະ ໝາກເລັ່ນພັນຕ່າງປະເທດ ສະໜອງຈຳໜ່າຍໃຫ້ບໍລິສັດຄູ່ຮ່ວມສັນຍາ ໃນເນື້ອທີ່ 18 ເຮັກຕາ ແລະ ປູກໃນເຮືອນຮົ່ມ 20 ຫລັງ ແບບຮັບປະກັນມາດຕະຖານ ປອດສານພິດ.

(ພາບ ແລະ ຂ່າວ: ອານຸສອນ ພູມມີທອນ)