(ສພຊ) – ວັນທີ 3 ຕຸລາຜ່ານມາ, ທ່ານ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ເມືອງຫາດຊາຍຟອງ ນະຄອນຫຼວງວຽງຈັນ ໂດຍໄດ້ຮັບການຕ້ອນຮັບຈາກທ່ານ ພູວົງ ວົງຄໍາຊາວ ຄະນະປະຈຳພັກ, ຮອງເຈົ້າຄອງນະຄອນຫຼວງວຽງຈັນ ແລະ ທ່ານ ບຸນເພັງ ສີນະວົງພອນ ເລຂາພັກເມືອງ, ເຈົ້າເມືອງໆຫາດຊາຍຟອງ ເຊິ່ງມີຄະນະພັກ, ອຳນາດການປົກຄອງ, ອົງການຈັດຕັ້ງທັງພາກລັດ ແລະ ເອກະຊົນ, ພະນັກງານ, ທະຫານ-ຕຳຫຼວດ, ພໍ່ແມ່ປະຊາຊົນບັນດາເຜົ່າພາຍໃນເມືອງເຂົ້າຮ່ວມຢ່າງຫຼວງຫຼາຍ; ທ່ານ ບຸນເພັງ ສີນະວົງພອນ ໄດ້ລາຍງານໃຫ້ຊາບໂດຍຫຍໍ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ການກະກຽມກອງປະຊຸມໃຫຍ່ຂອງອົງຄະນະພັກເມືອງ ແລະ ແຜນການຟື້ນຟູຫຼັງໄພພິບັດນ້ຳຖ້ວມໃນໄລຍະທີ່ຜ່ານມາ.

ໂອກາດດັ່ງກ່າວ, ທ່ານ ປອ. ໄຊສົມພອນ ພົມວິຫານ ໄດ້ມີຄໍາເຫັນໂອ້ລົມວ່າ: ໃນໄລຍະທີ່ປະເທດເຮົາກໍາລັງປະສົບກັບໄພທໍາມະຊາດທີ່ຮ້າຍແຮງທີ່ເກີດຂຶ້ນຢູ່ຫຼາຍແຂວງ ລວມທັງຢູ່ເມືອງຫາດຊາຍຟອງນັ້ນ ສູນກາງພັກ, ສະພາແຫ່ງຊາດ ກໍຄືອໍານາດການປົກຄອງນະຄອນຫຼວງວຽງຈັນ ໄດ້ມີຄວາມເປັນຫ່ວງເປັນໄຍຫຼາຍຕໍ່ພໍ່ແມ່ປະຊາຊົນທີ່ປະສົບກັບໄພນໍ້າຖ້ວມ ໂດຍໄດ້ຄົ້ນຄວ້າອອກນິຕິກໍາຕ່າງໆເພື່ອເປັນບ່ອນອີງໃຫ້ບັນດາອົງການຈັດຕັ້ງແຕ່ລະຂັ້ນ ໃນການຈັດຕັ້ງປະຕິບັດ, ແກ້ໄຂບັນຫາໃນສະພາວະສຸກເສີນ; ພ້ອມກັນນັ້ນ, ກໍໄດ້ຄົ້ນຄວ້າດ້ານງົບປະມານ, ວັດຖຸອຸປະກອນ, ເຂົ້າປາອາຫານ, ເຄື່ອງໃຊ້, ຢາປົວພະຍາດ ເພື່ອສົ່ງມາຊ່ວຍອໍານາດການປົກຄອງ ກໍຄືພໍ່ແມ່ປະຊາຊົນ; ໄດ້ເຕົ້າໂຮມບັນດາອຸປະກອນ, ເຄື່ອງມື, ພາຫະນະ ທີ່ນໍາໃຊ້ເຂົ້າໃນການຕ້ານໄພນໍ້າຖ້ວມ ເພື່ອສະກັດກັ້ນບັນຫານໍ້າຖ້ວມໃຫ້ສົ່ງຜົນກະທົບຕໍ່ພໍ່ແມ່ປະຊາຊົນໜ້ອຍທີ່ສຸດ. ຈາກຄວາມພະຍາຍາມຂອງທຸກພາກສ່ວນ ເຮັດໃຫ້ການແກ້ໄຂບັນຫາໄພນໍ້າຖ້ວມໄດ້ຮັບຜົນສໍາເລັດ, ລະດັບນໍ້າຫຼຸດລົງເປັນກ້າວໆ. ການແກ້ໄຂບັນຫາໄພນໍ້າຖ້ວມມາຮອດປັດຈຸບັນ ໄດ້ກັບຄືນສູ່ສະພາບປົກກະຕິແລ້ວ, ແຕ່ກໍຍັງມີບາງວຽກງານທີ່ຈະຕ້ອງໄດ້ສືບຕໍ່ຊ່ວຍພໍ່ແມ່ປະຊາຊົນ ຈຶ່ງສະເໜີໃຫ້ອໍາການປົກຄອງນະຄອນຫຼວງວຽງຈັນ ແລະ ເມືອງຫາດຊາຍຟອງ ປຸກລະດົມກໍາລັງແຮງຂອງພະນັກງານ, ທະຫານ, ຕໍາຫຼວດ, ນັກຮຽນ-ນັກສຶກສາ, ປະຊາຊົນທຸກທົ່ວໜ້າ ໃນການປົວແປງເຮືອນຊານ, ສໍານັກງານອົງການ, ໂຮງຮຽນ, ໂຮງໝໍ ທີ່ຖືກນໍ້າຖ້ວມ ດ້ວຍການເຮັດອະນາ ໄມ, ປັບປຸງບ່ອນເປ່ເພ ໃຫ້ກັບຄືນສູ່ສະພາບປົກກະຕິ ແລະ ສາມາດນໍາໃຊ້ໄດ້ໂດຍໄວ; ເກັບກໍາຂໍ້ມູນຄວາມເສຍຫາຍໃນດ້ານຕ່າງໆ ເປັນຕົ້ນລະບົບຊົນລະປະທານ, ເນື້ອທີ່ເຮັດການຜະລິດກະສິກໍາ, ສັດລ້ຽງ ແລະ ອື່ນໆ ເພື່ອຄົ້ນຄວ້າມາດຕະການຊ່ວຍພໍ່ແມ່ປະຊາຊົນທີ່ຖືກຜົນກະທົບຈາກໄພນໍ້າຖ້ວມທັນເວລາ ແລະ ທັນລະດູການຜະລິດ; ເກັບກໍາຂໍ້ມູນຄວາມເສຍຫາຍດ້ານຖະໜົນຫົນທາງ, ລະບົບສາຍສົ່ງໄຟຟ້າ, ລະບົບໂທລະຄົມມະນາຄົມ ເພື່ອຮີບຮ້ອນປັບປຸງ, ແກ້ໄຂ ບໍ່ໃຫ້ພໍ່ແມ່ປະຊາຊົນຖືກຕັດຂາດຈາກສິ່ງອໍານວຍຄວາມສະດວກທີ່ຈໍາເປັນພື້ນຖານໃນການດໍາລົງຊີວິດເປັນເວລາດົນນານ; ຈັດຕັ້ງໜ່ວຍງານແພດໝໍ ເປັນສູນລວມເຝົ້າລະວັງ ແລະ ຕິດຕາມສຸຂະພາບຂອງປະຊາຊົນໃຫ້ດີ, ວາງແຜນການກວດກາສຸຂະພາບ, ການສະໜອງຢາປິ່ນປົວພະຍາດປະເພດຕ່າງໆໃຫ້ທັນເວລາ.

ໃນການເຄື່ອນໄຫວຢ້ຽມຢາມ ແລະ ເຮັດວຽກຄັ້ງນີ້, ທ່ານ ປອ. ໄຊສົມພອນ ພົມວິຫານ ພ້ອມໄດ້ຄະນະ ໄດ້ມອບເງິນຊ່ວຍໃຫ້ແກ່ເມືອງຫາດຊາຍຟອງ ຈຳນວນ 200 ລ້ານກີບ ເພື່ອຊຸກຍູ້ເຂົ້າໃນວຽກງານຟື້ນຟູສະພາບຫຼັງໄພພິ ບັດນໍ້າຖ້ວມ ພ້ອມທັງໄປເບິ່ງຄອງລະບາຍນ້ຳປາກຫ້ວຍເດື່ອຢູ່ເຂດຊາຍແດນລະຫວ່າງບ້ານນາໄຮ່-ສີຖານໃຕ້ ແລະ ເຂດກະສິກຳປູກພືດຜັກຢູ່ທາງລົງບ້ານດອນເກີດ ອີກດ້ວຍ.

(ອານຸສອນ ພູມມີທອນ)