(ສພຊ) – ຕອນບ່າຍວັນສຸກທີ 10 ມັງກອນນີ້ ທີ່ສະພາແຫ່ງຊາດ, ສະຫາຍ ປອ. ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສະພາແຫ່ງຊາດ ໄດ້ພົບປະກັບສະຫາຍ ຝ້າມ ມິ່ງ ຈິງ ກໍາມະການກົມການເມືອງສູນກາງພັກກອມມູນິດຫວຽດນາມ, ນາຍົກລັດຖະມົນຕີ ພ້ອມດ້ວຍຄະນະຜູ້ແທນຂັ້ນສູງຂອງ ສສ.ຫວຽດນາມ ໃນໂອກາດມາຢ້ຽມຢາມ ແລະ ເຂົ້າຮ່ວມກອງປະຊຸມຄັ້ງທີ 47 ຂອງຄະນະກໍາມະການຮ່ວມມືທະວີພາຄີລະຫວ່າງສອງລັດຖະບານລາວ-ຫວຽດນາມ ທີ່ຈັດຂຶ້ນໃນວັນທີ 9 ມັງກອນຜ່ານມາ.
ສະຫາຍ ຝ້າມ ມິ່ງ ຈິງ ໄດ້ສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນ ແລະ ຕີລາຄາສູງຕໍ່ສາຍພົວພັນມິດຕະພາບ ແລະ ການພົວພັນຮ່ວມມືລະຫວ່າງສອງປະເທດໃນໄລຍະຜ່ານມາ ທັງໄດ້ແລກປ່ຽນບາງສະພາບການທີ່ພົ້ນເດັ່ນຢູ່ພາກພື້ນ ແລະ ສາກົນ. ພ້ອມກັນນັ້ນ, ກໍລາຍງານຜົນກອງປະຊຸມ ແລະ ການພົບປະສອງຝ່າຍກັບສະຫາຍ ສອນໄຊ ສີພັນດອນ ນາຍົກລັດຖະມົນຕີ ເຊິ່ງສອງຝ່າຍໄດ້ຢືນຢັນຮ່ວມ ກັນທີ່ຈະພ້ອມກັນຈັດຕັ້ງຜັນຂະຫຍາຍບັນດາຂໍ້ຕົກລົງຂອງການນໍາຂັ້ນສູງຂອງສອງພັກ, ບັນດາຂໍ້ຕົກລົງຂອງສອງລັດຖະບານ ທີ່ຫາກໍໄດ້ຕົກລົງກັນ; ສອງຝ່າຍໄດ້ເອກະ ພາບ ແລະ ລົງນາມໃນເອກະສານ 4 ສະບັບຄື: 1) ບົດບັນທຶກຄະນະກໍາມະການຮ່ວມມືທະວີພາຄີລະຫວ່າງສອງລັດຖະບານ ຄັ້ງທີ 47, 2) ຂໍ້ຕົກລົງແຜນການຮ່ວມມືລະ ຫວ່າງສອງລັດຖະບານ ປີ 2025, 3) ຂໍ້ຕົກລົງແຜນການຮ່ວມມືລະຫວ່າງສອງກະ ຊວງສຶກສາທິການ ແລະ ກິລາ, 4) ສັນຍາຊື້-ຂາຍຖ່ານຫີນ, ໄຟຟ້າ ລະຫວ່າງສອງປະ ເທດ. ສອງຝ່າຍຮ່ວມກັນເພີ່ມທະວີການພົວພັນຮ່ວມມືສອງຝ່າຍ ໃຫ້ເຊື່ອມຈອດກັນທາງດ້ານເສດຖະກິດ, ການຄ້າ, ການເງິນ, ການສຶກສາ, ພື້ນຖານໂຄງລ່າງ, ຄົມ ມະນາຄົມ, ພະລັງງານ, ໄຟຟ້າ, ໂທລະຄົມ, ການທ່ອງທ່ຽວ ແລະ ອື່ນໆ; ນອກນັ້ນ, ຍັງເຫັນດີເປັນເອກະພາບຈະຊຸກຍູ້ ແລະ ລະດົມໃຫ້ບັນດາຄູ່ຮ່ວມມືສາກົນທີ່ເໝາະສົມ ໃຫ້ເຂົ້າມາຮ່ວມມື, ລົງທຶນ ແລະ ສະໜັບສະໜູນບັນດາໂຄງການເຊື່ອມຕໍ່ທີ່ເປັນຍຸດ ທະສາດລະຫວ່າງສອງປະເທດໃຫ້ຫຼາຍຂຶ້ນ.
ສະຫາຍ ປອ. ໄຊສົມພອນ ພົມວິຫານ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການຢ້ຽມຢາມ ແລະ ເຂົ້າຮ່ວມກອງປະຊຸມດັ່ງກ່າວ ເຊິ່ງເປັນການປະ ກອບສ່ວນສໍາຄັນເຂົ້າໃນການຮັດແໜ້ນ ແລະ ເພີ່ມພູນຄູນສ້າງສາຍພົວພັນມິດຕະ ພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ເວົ້າລວມ, ກໍຄືສາຍພົວ ພັນຮ່ວມມືລະຫວ່າງອົງການນິຕິບັນຍັດຂອງສອງປະເທດ ໃຫ້ເປັນຮູບປະທຳຍິ່ງໆຂຶ້ນ; ຕີລາຄາສູງຕໍ່ຜົນສຳເລັດຂອງການພົບປະສອງຝ່າຍກັບສະຫາຍ ສອນໄຊ ສີພັນດອນ. ສະຫາຍ ປອ. ໄຊສົມພອນ ພົມວິຫານ ໄດ້ກ່າວວ່າ: ໃນນາມເປັນຕົວແທນດ້ານນິຕິ ບັນຍັດ ໄດ້ເອົາໃຈໃສ່ຢ່າງໃກ້ຊິດຮ່ວມກັບສະພາແຫ່ງຊາດຫວຽດນາມ ໃນການຕິດ ຕາມກວດກາການຈັດຕັ້ງປະຕິບັດຜົນຂອງກອງປະຊຸມສອງກົມການເມືອງ ທີ່ໄດ້ຕົກ ລົງຮ່ວມກັນ; ບັນດາໂຄງການຮ່ວມມືດ້ານເສດຖະກິດ, ການລົງທຶນ, ການຄ້າ ໃຫ້ມີຜົນສຳເລັດ ແລະ ນຳຜົນປະໂຫຍດຕົວຈິງມາສູ່ປະຊາຊົນສອງຊາດ ລາວ-ຫວຽດນາມ ເປັນຕົ້ນແມ່ນບັນດາໂຄງການຮ່ວມມືສອງຝ່າຍທີ່ໄດ້, ກຳລັງ ແລະ ຈະຈັດຕັ້ງປະຕິ ບັດ: 1) ການມອບໂອນທ່າເຮືອຫວຸ້ງອາງ, 2) ໂຄງການທາງດ່ວນວຽງຈັນ-ຮ່າໂນ້ຍ, 3) ໂຄງການທາງລົດໄຟວຽງຈັນ-ທ່າແຂກ-ຫວຸ້ງອາງ, 4) ການຊື້-ຂາຍໄຟຟ້າ, 5) ການສ້າງໂຮງງານພະລັງງານຄວາມຮ້ອນຖ່ານຫີນ, 6) ໂຄງການສວນອຸທິຍານມິດຕະ ພາບລາວ-ຫວຽດນາມ.
(ນາງ ອາລິນ ສຸພິມມະປະດິດ)