(ສພຊ) – ຕອນບ່າຍວັນທີ 9 ທັນວາຜ່ານມາ ທີ່ສະພາແຫ່ງຊາດ, ທ່ານ ປອ. ໄຊສົມພອນ ພົມວິຫານ ປະ ທານສະພາແຫ່ງຊາດ ໄດ້ຮັບຕ້ອນການເຂົ້າພົບປະຂອງພະສັງຄະລາດ ເຊຣ໌ເກ ຜູ້ປົກຄອງສາສະໜາເຢຊູ ນິກາຍໂອໂຕດົກ ລັດເຊຍ ປະຈຳພາກພື້ນອາຊີຕາເວັນອອກສຽງໃຕ້ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ແລະ ເຮັດວຽກ ຢູ່ ສປປລາວ ເພື່ອເປັນການປະກອບສ່ວນເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ອັນເປັນມູນ ເຊື້ອທີ່ດີງາມລະຫວ່າງສອງປະເທດ ເວົ້າລວມ, ເວົ້າສະເພາະແມ່ນການແລກປ່ຽນຂໍ້ມູນກ່ຽວກັບວຽກງານສາສະໜາເຢຊູ ນິກາຍໂອໂຕດົກ ລັດເຊຍ.

ໃນການພົບປະ, ທ່ານ ປອ. ໄຊສົມພອນ ພົມວິຫານ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ສາຍພົວພັນມິດຕະພາບອັນເປັນມູນເຊື້ອທີ່ດີງາມໃນການການເປັນຄູ່ຮ່ວມຍຸດທະສາດລະຫວ່າງສອງປະເທດ ລາວ-ລັດເຊຍ ທີ່ໄດ້ຮັບການເສີມຂະຫຍາຍຢ່າງຕໍ່ເນື່ອງ ທັງລາຍງານສະພາບການທີ່ພົ້ນເດັ່ນຂອງ ສປປລາວ ແລະ ສະພາແຫ່ງຊາດ; ພ້ອມນັ້ນ, ຍັງແຈ້ງໃຫ້ຊາບກ່ຽວກັບສະພາບການເຊື່ອຖືສາສະໜາຢູ່ ສປປລາວ ຕົ້ນຕໍແມ່ນສາສະໜາພຸດ ກວມເອົາ 60 ກວ່າສ່ວນຮ້ອຍ ເຊິ່ງລັດຖະທຳມະນູນ ແຫ່ງ ສປປລາວ ມາດຕາ 43 ໄດ້ກຳນົດສິດໃນການເຊື່ອຖື ຫຼື ບໍ່ເຊື່ອຖື ຂອງພົນ ລະເມືອງ ທີ່ບໍ່ຂັດກັບກົດໝາຍ ແລະ ບໍ່ກໍ່ໃຫ້ເກີດການແບ່ງແຍກໃນສັງຄົມ.

ພະສັງຄະລາດ ເຊຣ໌ເກ ໄດ້ລາຍງານສາຍພົວພັນມິດຕະພາບອັນເປັນມູນເຊື້ອທີ່ດີງາມລະຫວ່າງສອງປະເທດ, ທັງໄດ້ແຈ້ງການເຄື່ອນໄຫວຢ້ຽມຢາມຢູ່ ສປປລາວ ໃຫ້ທ່ານປະທານສະພາແຫ່ງຊາດ ແລະ ຄະນະຕ້ອນຮັບ ໄດ້ຮັບຊາບ.