(ສພຊ) – ຕອນບ່າຍວັນອັງຄານທີ 12 ພະຈິກຜ່ານມາ ທີ່ສະພາແຫ່ງຊາດ, ທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ໄດ້ພົບປະກັບທ່ານ ລູໂບເມຍ ອັນດຣາສຊີ (L’ubomir Andrassy) ປະທານອົງການກວດສອບແຫ່ງລັດ ສ.ສະໂລວັກ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ ສປປລາວ ລະຫວ່າງວັນທີ 11-14 ພະຈິກ 2024.

ໃນໂອກາດນີ້, ທ່ານປະທານສະພາແຫ່ງຊາດ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການຢ້ຽມຢາມ ສປປລາວ ຂອງທ່ານ ລູໂບເມຍ ອັນດຣາສຊີ ແລະ ຄະນະ ເປັນການປະກອບສ່ວນເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີລະຫວ່າງສອງປະເທດ, ເວົ້າສະເພາະແມ່ນສອງອົງການກວດສອບ ໂດຍສອງຝ່າຍໄດ້ມີການແລກປ່ຽນບົດຮຽນ ພ້ອມທັງປຶກສາຫາລືກ່ຽວກັບການຮ່ວມມືໃນຕໍ່ໜ້າລະຫວ່າງສອງອົງການກວດສອບແຫ່ງລັດ ສປປລາວ ແລະ ສ.ສະໂລວັກ ເຊິ່ງເປັນການປະກອບສ່ວນສະໜັບສະໜູນອົງການກວດສອບແຫ່ງລັດ ສປປລາວ ໃຫ້ມີຄວາມເຂັ້ມແຂງຍິ່ງໆຂຶ້ນ; ທ່ານ ປອ. ໄຊສົມພອນ ພົມວິຫານ ຍັງໄດ້ແຈ້ງສະພາບການທີ່ພົ້ນເດັ່ນຂອງປະເທດ ແລະ ການເຄື່ອນ ໄຫວຂອງສະພາແຫ່ງຊາດລາວ ຊຸດທີ IX ໂດຍຫຍໍ້ ໃຫ້ຮັບຊາບອີກດ້ວຍ.

ທ່ານ ລູໂບເມຍ ອັນດຣາສຊີ ໄດ້ສະແດງຄວາມຂອບໃຈຢ່າງສູງຕໍ່ການຕ້ອນຮັບອັນອົບອຸ່ນຂອງປະທານສະພາແຫ່ງຊາດ ພ້ອມທັງແຈ້ງສະພາບການທີ່ພົ້ນເດັ່ນຂອງປະເທດສະໂລວັກ ແລະ ລາຍງານໂດຍຫຍໍ້ການຮ່ວມມືກັບອົງການກວດສອບແຫ່ງລັດ ສປປລາວ ໃນໄລຍະຜ່ານມາ ເຊິ່ງການມາເຄື່ອນໄຫວວຽກງານທາງການຄັ້ງນີ້, ນອກຈາກພົບປະສອງຝ່າຍແລ້ວ, ຍັງມີກອງປະຊຸມແລກປ່ຽນບົດຮຽນໃນ 2 ຫົວຂໍ້: ການພັດທະນາດ້ານບຸກຄະລາກອນ ແລະ ການຈັດຕັ້ງປະຕິບັດຄຳແນະນຳການກວດສອບ.

ສປປລາວ ແລະ ສ.ສະໂລວັກ ໄດ້ສ້າງຕັ້ງສາຍພົວພັນການທູດນຳກັນ ໃນວັນທີ 05 ກັນຍາ 1962.

(ອານຸສອນ ພູມມີທອນ)