(ສພຊ) – ຕອນບ່າຍວັນທີ 27 ທັນວາ 2024 ທີ່ຫໍສະພາແຫ່ງຊາດ (ສພຊ), ທ່ານ ປອ. ໄຊສົມພອນ ພົມວິ ຫານ ກຳມະການກົມການເມືອງສູນກາງພັກ, ປະທານສະພາແຫ່ງຊາດ ໄດ້ພົບປະໂອ້ລົມນັກຮົບສື່ມວນຊົນ ໃນໂອກາດວັນອອກໜັງສືພິມ “ຜູ້ແທນປະຊາຊົນ” ສະບັບທີ 1,000 ແລະ ວັນສ້າງຕັ້ງສື່ມວນຊົນສະພາແຫ່ງຊາດ ຄົບ ຮອບ 28 ປີ (12 ມິຖຸນາ 1996 ຫາ 12 ມິຖຸນາ 2024); ເຂົ້າຮ່ວມມີທ່ານປະທານກຳມາທິການວັດທະນະທຳ-ສັງຄົມ, ທ່ານເລຂາທິການສະພາແຫ່ງຊາດ, ທ່ານຮອງລັດຖະ ມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງ ທ່ຽວ ພ້ອມດ້ວຍບັນດາສື່ມວນຊົນທຸກພາກສ່ວນຢູ່ສູນ ກາງ, ຄະນະທີ່ປຶກສາວຽກງານສື່ມວນຊົນຂອງ ສພຊ ແລະ ພາກສ່ວນທີ່ກ່ຽວຂ້ອງ ລວມທັງໝົດ 85 ທ່ານ, ຍິງ 31 ທ່ານ.

ທ່ານ ປອ. ໄຊສົມພອນ ພົມວິຫານ ໄດ້ສະແດງຄວາມຮູ້ສຶກພາກພູມໃຈເປັນຢ່າງຍິ່ງທີ່ໄດ້ມີໂອກາດພົບປະ ແລະ ໂອ້ລົມນັກຮົບສື່ມວນຊົນຂອງສະພາແແຫ່ງຊາດ, ບັນດາອົງການຈັດຕັ້ງພັກ-ລັດ ແລະ ພາກສ່ວນຕ່າງໆ ໃນໂອກາດວັນສ້າງຕັ້ງສື່ມວນຊົນສະພາແຫ່ງຊາດ ຄົບຮອບ 28 ປີ ແລະ ການຜະລິດໜັງສືພິມຜູ້ແທນປະຊາຊົນ ສະບັບທີ 1,000 ທັງຢື້ຢາມຖາມຂ່າວອັນອົບອຸ່ນບັນດານັກຮົບສື່ມວນຊົນທີ່ເຂົ້າຮ່ວມໃນມື້ນີ້ ແລະ ຂໍຝາກຄວາມຢື້ຢາມຖາມຂ່າວ, ຄວາມຄິດຮອດຄິດເຖິງ, ຄວາມເປັນຫ່ວງເປັນໄຍ ໄປຍັງບັນດານັກຮົບສື່ມວນຊົນທີ່ກໍາລັງປະຕິບັດໜ້າທີ່ວິຊາສະເພາະຢູ່ສະຖານທີ່ຕ່າງໆໃນຂອບເຂດທົ່ວປະເທດ, ຢູ່ເຂດຫ່າງໄກສອກຫຼີກ, ເຂດທຸລະກັນດານ ຂໍໃຫ້ບັນດາທ່ານຈົ່ງມີສຸຂະພາບແຂງແຮງ, ຕັ້ງໜ້າປະຕິບັດວຽກງານໃຫ້ໄດ້ຮັບຜົນສໍາເລັດ, ເຮັດໃຫ້ການນໍາເອົາຂໍ້ມູນຂ່າວສານຂອງພັກ-ລັດ ສົ່ງໄປເຖິງປະຊາຊົນລາວບັນດາເຜົ່າ ຢ່າງຄົບຖ້ວນ ແລະ ມີປະສິດທິພາບ.

ທ່ານປະທານສະພາແຫ່ງຊາດ ຕີລາຄາສູງຕໍ່ຄວາມບຸກບືນ, ຫ້າວຫັນຂອງສື່ມວນຊົນຕ່າງໆ ໃນການປະຕິບັດໜ້າທີ່ການເມືອງຂອງຕົນໄດ້ຮັບຜົນສໍາເລັດຫຼາຍດ້ານ ເປັນຕົ້ນການໂຄສະນາເຜີຍແຜ່ການເຄື່ອນໄຫວວຽກງານຂອງສູນກາງພັກ, ການດໍາເນີນກອງປະຊຸມສະໄໝສາມັນຂອງສະພາແຫ່ງຊາດແຕ່ລະຄັ້ງ, ການເປັນເຈົ້າພາບຈັດກອງປະຊຸມສຸດຍອດອາຊຽນ ຄັ້ງທີ 44 ແລະ 45, ກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຫຼື ໄອປາ (AIPA) ຄັ້ງທີ 45 ໄດ້ຮັບຜົນສໍາເລັດເປັນຢ່າງດີ ເຮັດໃຫ້ປະຊາຊົນບັນດາເຜົ່າໄດ້ຮັບຮູ້ການເຄື່ອນໄຫວຂອງພັກ-ລັດ. ສໍາລັບວຽກງານສື່ມວນຊົນຂອງສະພາແຫ່ງຊາດ ໄດ້ຮັບການສ້າງຕັ້ງ ແລະ ປະຕິບັດໜ້າ ທີ່ການເມືອງຂອງຕົນມາຮອດປັດຈຸບັນ ໄດ້ມີອາຍຸການ 28 ປີ ແລະ ໄດ້ຮັບການພັດ ທະນາຢ່າງບໍ່ຢຸດຢັ້ງ ເປັນຕົ້ນໜັງສືພິມ, ວິທະຍຸກະຈາຍສຽງ, ໂທລະພາບ, ສື່ສັງຄົມອອນລາຍ ເຮັດໃຫ້ການໂຄສະນາເຜີຍແຜ່ການເຄື່ອນໄຫວຂອງສະພາແຫ່ງຊາດ ມີຄວາມກວ້າງຂວາງ ແລະ ມີປະສິດທິຜົນນັບມື້ສູງຂຶ້ນ; ພິເສດ, ການພິມໜັງສືພິມຜູ້ ແທນປະຊາຊົນຂອງສະພາແຫ່ງຊາດ ມາຮອດປັດຈຸບັນໄດ້ກ້າວເຂົ້າສູ່ສະບັບທີ 1,000 ໃນອາທິດທີ່ຈະມາເຖິງນີ້.

ທ່ານ ປອ. ໄຊສົມພອນ ພົມວິຫານ ໄດ້ຕາງໜ້າໃຫ້ກົມການເມືອງສູນກາງພັກ, ຄະນະປະຈໍາສະພາແຫ່ງຊາດ ສະແດງຄວາມຍ້ອງຍໍຊົມເຊີຍບັນດາສື່ມວນຊົນທີ່ສາມາດຍາດໄດ້ຜົນສໍາເລັດໃນການເຄື່ອນໄຫວວຽກງານ, ປະກອບສ່ວນເຂົ້າໃນການໂຄສະນາເຜີຍແຜ່ແນວທາງນະໂຍບາຍຂອງພັກ, ແຜນພັດທະນາເສດຖະກິດ-ສັງຄົມ, ກົດໝາຍ ແລະ ເອກະສານສໍາຄັນຂອງພັກ-ລັດ ໄດ້ຮັບຜົນສໍາເລັດເປັນຢ່າງດີຕະຫຼອດມາ.

ນອກນັ້ນ, ທ່ານປະທານສະພາແຫ່ງຊາດຍັງໄດ້ມີຄຳເຫັນເນັ້ນໜັກບາງບັນຫາສຳຄັນດັ່ງນີ້:

1. ການເຄື່ອນໄຫວວຽກງານສື່ມວນຊົນ ຕ້ອງຮັບປະ ກັນການຜັນຂະຫຍາຍ ແລະ ໂຄສະນາເຜີຍແຜ່ແນວທາງນະໂຍບາຍຂອງພັກ ໃຫ້ສັງຄົມໄດ້ຮັບຮູ້ເຂົ້າໃຈ ແລະ ເຂົ້າ ຮ່ວມການຈັດຕັ້ງປະຕິບັດ ດັ່ງຄໍາເຫັນຂອງປະທານ ໄກສອນ ພົມວິຫານ ໄດ້ກ່າວໄວ້ວ່າ “…ທຸກການເຄື່ອນໄຫວດ້ານຖະແຫຼງຂ່າວ, ໜັງສືພິມ, ການກະຈາຍສຽງ, ການພິມຈໍາໜ່າຍ, ຮູບເງົາ, ສິລະປະວັນນະຄະດີ… ຕ້ອງສະແດງອອກເປັນຈິງເຖິງເນື້ອໃນ ແລະ ລັກສະນະວັດທະນະທໍາໃໝ່ທີ່ກ້າວໜ້າ, ຕ້ອງຕິດແໜ້ນກັບແນວທາງນະໂຍບາຍຂອງພັກ ແລະ ລັດ, ຕ້ອງຕິດແໜ້ນກັບຊີວິດອອກແຮງງານກໍ່ສ້າງ ແລະ ການຕໍ່ສູ້ຂອງປະຊາຊົນບັນດາເຜົ່າ ແນໃສ່ເຊີດຊູສະຕິຕື່ນຕົວສັງຄົມນິຍົມ, ນໍ້າໃຈຟົດຟື້ນອອກແຮງງານ, ປະດິດສ້າງຂອງປະຊາຊົນບັນດາເຜົ່າ ໃນພາລະກິດປົກປັກຮັກສາ ແລະ ສ້າງສາປະເທດຊາດ…” ຄໍາເຫັນຂອງປະທານ ໄກສອນ ພົມວິຫານ ມີຄຸນຄ່າ ແລະ ເປັນເຂັມທິດເຍືອງທາງໃຫ້ແກ່ການເຄື່ອນໄຫວວຽກງານສື່ມວນຊົນຂອງພວກເຮົາຕະຫຼອດໄປ.

2. ວຽກງານສື່ມວນຊົນ ເປັນວຽກງານທີ່ມີຄວາມສໍາຄັນ, ເປັນປາກກະບອກສຽງໃນການໂຄສະນາເຜີຍແຜ່ແນວທາງນະໂຍບາຍຂອງພັກ, ລັດຖະທໍາມະນູນ, ກົດ ໝາຍ ລວມທັງການເຄື່ອນໄຫວວຽກງານຂອງສູນກາງພັກ, ສະພາແຫ່ງຊາດ ກໍຄືລັດ ຖະບານ ໃຫ້ພະນັກງານ, ທະ ຫານ-ຕໍາຫຼວດ ກໍຄືປະຊາຊົນບັນດາເຜົ່າ ໄດ້ຮັບຮູ້ເຂົ້າໃຈ, ເຊື່ອມຊືມ ແລະ ເຂົ້າຮ່ວມຈັດຕັ້ງປະຕິບັດວຽກງານຕ່າງໆໃຫ້ໄດ້ຮັບຜົນສໍາເລັດ, ນໍາເອົາໝາກຜົນແຫ່ງການສ້າງສາພັດທະນາເສດຖະກິດ-ສັງຄົມ ມາສູ່ປະເທດຊາດ, ປັບປຸງຊີວິດການເປັນຢູ່ຂອງປະຊາຊົນບັນດາເຜົ່າໃຫ້ນັບມື້ດີຂຶ້ນ. ໝາຍຄວາມວ່າ: ສື່ມວນຊົນປະເພດຕ່າງໆ ມີບົດບາດສໍາຄັນຫຼາຍໃນການນໍາເອົາແນວທາງນະໂຍບາຍຂອງພັກ, ກົດ ໝາຍ, ແຜນພັດທະນາເສດຖະກິດ-ສັງຄົມ ໄປເຜີຍແຜ່ໃຫ້ພໍ່ແມ່ປະ ຊາຊົນຢູ່ບັນດາແຂວງ, ເມືອງ, ບ້ານ ລວມທັງເຂດຫ່າງໄກສອກຫຼີກ ໂດຍຜ່ານສື່ປະເພດຕ່າງໆ ເປັນຕົ້ນ ໂທລະພາບ, ວິທະຍຸກະຈາຍສຽງ, ໜັງສືພິມ, ສື່ສັງຄົມອອນລາຍ; ອີກດ້ານໜຶ່ງ, ນັກຮົບສື່ມວນຊົນ ກໍເປັນຜູ້ທີ່ມີພອນສະຫວັນໃນການເວົ້າຈາປາໄສ, ມີຄວາມຊໍານານໃນການຜັນຂະຫຍາຍເນື້ອໃນເອກະສານສໍາຄັນຕ່າງໆໃຫ້ຜູ້ອ່ານ, ຜູ້ຟັງ ມີຄວາມສົນໃຈຕິດຕາມຢ່າງຕັ້ງໜ້າ. ສະນັ້ນ,​ ຈຶ່ງສະເໜີໃຫ້ເຫັນໄດ້ຄວາມສໍາຄັນໃນວຽກງານສື່ມວນຊົນ ແລະ ບຸກບືນສູ້ຊົນໃນໜ້າທີ່ວຽກງານຂອງຕົນ.

3. ການໂຄສະນາເຜີຍແຜ່ການເຄື່ອນໄຫວວຽກງານຂອງສະພາແຫ່ງຊາດ, ສະ ພາປະຊາຊົນຂັ້ນແຂວງ ມີຄວາມສໍາຄັນຫຼາຍ ໂດຍສະເພາະການດໍາເນີນກອງປະຊຸມສະໄໝສາມັນ, ການເຄື່ອນໄຫວຕິດຕາມກວດກາການປະຕິບັດກົດໝາຍ ແລະ ອື່ນໆ. ເນື່ອງຈາກວ່າສະພາແຫ່ງຊາດ ເປັນອົງການຕົວແທນແຫ່ງສິດ ແລະ ຜົນປະໂຫຍດຂອງປະຊາ ຊົນບັນດາເຜົ່າ ເປັນອົງການສູງສຸດແຫ່ງອໍານາດລັດ, ສະພາປະຊາຊົນຂັ້ນແຂວງ ກໍເປັນອົງການຕົວແທນຂອງປະຊາ ຊົນບັນດາເຜົ່າຢູ່ທ້ອງຖິ່ນ ຈຶ່ງມີໜ້າທີ່ຕ້ອງໄດ້ລາຍງານການເຄື່ອນໄຫວວຽກງານຂອງຕົນ ໃຫ້ຜູ້ມີສິດເລືອກຕັ້ງ ກໍຄືປະຊາຊົນບັນດາເຜົ່າ ໄດ້ຮັບຮູ້, ເຂົ້າໃຈ ແລະ ເຂົ້າຮ່ວມການຈັດຕັ້ງປະຕິບັດມະຕິຂອງສະພາແຫ່ງຊາດ, ມະຕິຂອງສະ ພາປະຊາຊົນຂັ້ນແຂວງ ໃຫ້ເກີດໝາກຜົນຕໍ່ປະເທດຊາດ; ສະນັ້ນ, ຈຶ່ງສະເໜີມາຍັງສື່ມວນຊົນ ຈົ່ງໄດ້ເອົາໃຈໃສ່ເກັບກໍາ, ຄົ້ນຄວ້າ, ວິເຄາະວິໄຈວຽກງານຕ່າງໆ ໃຫ້ເລິກເຊິ່ງ, ໂຄສະນາເຜີຍແຜ່ຜ່ານສື່ມວນຊົນປະເພດຕ່າງໆ ຢ່າງກວ້າງ ຂວາງ, ທົ່ວເຖິງເປົ້າໝາຍຕ່າງໆ.

ການໂຄສະນາເຜີຍແຜ່ການດໍາເນີນກອງປະຊຸມສະ ໄໝສາມັນຂອງສະພາແຫ່ງ ຊາດແຕ່ລະຄັ້ງ ສະເໜີໃຫ້ສື່ມວນຊົນເອົາໃຈໃສ່ການສໍາພາດສະມາຊິກສະພາແຫ່ງ ຊາດ ຕໍ່ຫົວຂໍ້ຕ່າງໆທີ່ຕິດພັນກັບບັນຫາພົ້ນເດັ່ນຂອງສັງ ຄົມ, ບັນຫາທີ່ສັງຄົມມີຄວາມສົນໃຈຫຼາຍ ເພື່ອໃຫ້ຜູ້ແທນອະທິບາຍທີ່ມີເຫດມີຜົນ ໃຫ້ຜູ້ມິສິດເລືອກຕັ້ງໄດ້ເຂົ້າໃຈຕໍ່ບັນຫາຕ່າງໆ; ການຖ່າຍທອດການປະກອບຄໍາເຫັນຂອງສະມາຊິກສະພາແຫ່ງຊາດຢູ່ກອງປະຊຸມ ກໍເປັນວຽກງານທີ່ສໍາຄັນ ເພື່ອເຮັດໃຫ້ຜູ້ມີສິດເລືອກຕັ້ງ ໄດ້ຮັບຮູ້ການປະຕິ ບັດໜ້າທີ່ຕົວແທນຂອງຕົນຢູ່ກອງປະຊຸມສະພາແຫ່ງຊາດ.

4. ການເຄື່ອນໄຫວວຽກງານຈຸດສຸມຂອງສະພາແຫ່ງຊາດໃນປັດຈຸບັນ ແມ່ນການປັບປຸງລັດຖະທໍາມະນູນ ສະບັບປີ 2015 ເຊິ່ງເປັນການຜັນຂະຫຍາຍແນວທາງນະໂຍບາຍຂອງພັກ ເຂົ້າໃນເນື້ອໃນຂອງລັດຖະທໍາມະນູນ ໂດຍສະເພາະການບູລະນະອົງການປົກຄອງທ້ອງຖິ່ນໃຫ້ມີຄວາມໜັກແໜ້ນ, ເຂັ້ມແຂງ. ວຽກງານດັ່ງກ່າວມີຄວາມສໍາຄັນຫຼາຍ, ເນື່ອງຈາກລັດຖະທໍາມະນູນ ເປັນກົດໝາຍພື້ນ ຖານຂອງຊາດ, ທຸກກົດໝາຍຕ້ອງສອດຄ່ອງກັບລັດຖະທໍາມູນ; ນອກຈາກນັ້ນ, ລັດຖະທໍາມະນູນຍັງໄດ້ກໍານົດລະບົບອົງການຈັດຕັ້ງລັດ, ພາລະບົດບາດ, ສິດ ແລະ ໜ້າທີ່ຂອງອົງການຈັດຕັ້ງດັ່ງກ່າວ, ກໍານົດສິດ ແລະ ພັນທະຂອງພົນ ລະເມືອງ ແລະ ອື່ນໆ. ເພື່ອເຮັດໃຫ້ການປັບປຸງລັດຖະທໍາ ມະນູນມີຄວາມສອດຄ່ອງກັບແນວທາງນະໂຍບາຍຂອງພັກ, ສະພາບການຕົວຈິງຂອງປະເທດ ແລະ ສາມາດຈັດຕັ້ງປະຕິບັດໄດ້ຍາວນານ; ສະນັ້ນ, ການໂຄສະນາເຜີຍແຜ່ການປັບປຸງ ທັງເປັນການລະດົມຄວາມຄິດເຫັນຢ່າງກວ້າງ ຂວາງຈາກປະຊາຊົນບັນດາເຜົ່າ, ຊັ້ນຄົນຕ່າງໆ ໂດຍຜ່ານສື່ມວນຊົນແມ່ນມີຄວາມສໍາຄັນຫຼາຍ ຈຶ່ງຂໍໃຫ້ບັນດາສື່ມວນຊົນເປັນເຈົ້າການໃນວຽກງານດັ່ງກ່າວຕື່ມ.

5. ການເຄື່ອນໄຫວປະຕິບັດໜ້າທີ່ວຽກງານຂອງສະພາແຫ່ງຊາດຊຸດທີ IX ກໍຄືສະພາປະຊາຊົນຂັ້ນແຂວງ ຊຸດທີ II ມາຮອດປັດຈຸບັນ ໄດ້ກ້າວເຂົ້າສູ່ໄລຍະທ້າຍອາຍຸການແລ້ວ, ໃນປີ 2025 ນີ້ ເປັນປີທີ່ຈະມີການກະກຽມໃຫ້ແກ່ການເລືອກຕັ້ງສະມາ ຊິກສະພາແຫ່ງຊາດຊຸດທີ X ກໍຄືສະມາຊິກສະພາປະຊາຊົນຂັ້ນແຂວງ ຊຸດທີ III ເຊິ່ງເປັນປາງບຸນໃຫຍ່ຂອງທົ່ວປວງຊົນລາວທັງຊາດ. ເພື່ອເຮັດໃຫ້ການເລືອກຕັ້ງບັນລຸຕາມລະດັບຄາດໝາຍ ເປັນຕົ້ນ ເພດ, ເຜົ່າ, ໄວ; ສະນັ້ນ, ການໂຄສະນາເຜີຍແຜ່ວຽກງານເລືອກຕັ້ງຂອງສື່ມວນຊົນປະເພດຕ່າງໆ ມີຄວາມສໍາຄັນຫຼາຍ ຈຶ່ງສະເໜີໃຫ້ສື່ມວນຊົນຈົ່ງໄດ້ກະກຽມດ້ານເຄື່ອງມື, ຮູບ ແບບ, ວິທີການໂຄສະນາ ໃຫ້ສອດຄ່ອງກັບທຸກເປົ້າໝາຍ ທັງສາມາດດຶງດູດຄວາມສົນໃຈຂອງປະຊາຊົນໃນການຕິດຕາມການໂຄສະນາ.

6. ວຽກງານສື່ມວນຊົນໃນປັດຈຸບັນ ໄດ້ມີການພັດ ທະນາ, ກ້າວໜ້າ​, ຂະຫຍາຍຕົວຢ່າງວ່ອງໄວ ໂດຍສະເພາະສື່ສັງຄົມອອນລາຍ ເຮັດໃຫ້ອິດທິກໍາລັງປໍລະປັກ ນໍາໃຊ້ສື່ສັງຄົມອອນລາຍໃນທາງທີ່ບໍ່ຖືກຕ້ອງ, ໃສ່ຮ້າຍປ້າຍສີໃນທາງທີ່ບໍ່ຖືກຕ້ອງຕາມຄວາມເປັນຈິງ ເຮັດໃຫ້ປະຊາຊົນຈໍານວນໜຶ່ງທີ່ມີທັດສະນະຫຼັກໝັ້ນການເມືອງບໍ່ທັນໜັກແໜ້ນ ຫຼົງເຊື່ອ, ສ້າງຄວາມແຕກແຍກພາຍໃນ ເຊິ່ງເປັນໄພອັນຕະລາຍໄລຍະຍາວ; ຕໍ່ໜ້າສະພາບການດັ່ງກ່າວ ເປັນໜ້າທີ່ອັນໜັກໜ່ວງຂອງບັນດາສື່ຕ່າງໆທີ່ເຮັດໜ້າທີ່ວຽກ ງານສື່ມວນຊົນ ຈະຕ້ອງໄດ້ຄົ້ນຄວ້າວິທີການແກ້ໄຂຢ່າງມີເຫດມີຜົນ, ສອດຄ່ອງກັບແຕ່ລະບັນຫາ ຈຶ່ງສະເໜີໃຫ້ເອົາໃຈໃສ່ວຽກງານດັ່ງກ່າວ.

ພາຍຫຼັງສຳເລັດພິທີດັ່ງກ່າວ ບັນດາສື່ມວນຊົນຍັງໄດ້ເຂົ້າຢ້ຽມຊົມຫ້ອງມູນເຊື້ອຂອງສະພາແຫ່ງຊາດອີກດ້ວຍ ເຊິ່ງໄດ້ເປີດຢ່າງເປັນທາງການແຕ່ວັນທີ 30 ກັນຍາ 2024 ເປັນຕົ້ນມາ.

(ກົົງທະນູຄຳ ພິພັດເສລີ)