(ສພຊ) ລະຫວ່າງວັນທີ 5-7 ມີນາ 2018, ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ພ້ອມດ້ວຍຄະນະ ໄດ້ເດີນທາງຢ້ຽມຢາມພົບປະພໍ່ແມ່ປະຊາຊົນຢູ່ 2 ແຂວງພາກກາງຄື: ຄຳມ່ວນ ແລະ ສະຫວັນນະເຂດ.

ໂອກາດເຮັດວຽກຢູ່ແຂວງຄໍາມ່ວນ ປະທານສະພາແຫ່ງຊາດ ພ້ອມດ້ວຍຄະນະ ໄດ້ຮັບການຕ້ອນຮັບຈາກທ່ານ ໂອໄດ ສຸດາພອນ ເຈົ້າແຂວງໆຄຳມ່ວນ ພ້ອມດ້ວຍຄະນະນຳອ້ອມຂ້າງແຂວງ, ຈາກນັ້ນ ທ່ານປະທານສະພາແຫ່ງຊາດ ພ້ອມດ້ວຍຄະນະ ໄດ້ເຮັດວຽກຮ່ວມກັບສະພາປະຊາຊົນແຂວງຄໍາມ່ວນ, ຮັບຟັງລາຍງານສະພາບລວມໃນການຈັດຕັ້ງປະຕິບັດພາລະບົດບາດຂອງຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງທີ 12 ແລະ ສະພາປະຊາຊົນແຂວງຄຳມ່ວນ ໃນໄລຍະຜ່ານມາ, ພົບປະໂອ້ລົມຄະນະບໍລິຫານງານພັກແຂວງ, ພະນັກງານຫລັກແຫລ່ງຂອງແຂວງ ເຊິ່ງໄດ້ຮັບຟັງການລາຍງານໂດຍຫຍໍ້ກ່ຽວກັບການພັດທະນາເສດ ຖະກິດ-ສັງຄົມຂອງແຂວງ ຈາກທ່ານເຈົ້າແຂວງ ແລະ ພົບປະໂອ້ລົມຄະນະພັກເມືອງ, ບ້ານ, ເຂດຈຸດສຸມ ແລະ ປະຊາຊົນ ຢູ່ບ້ານກອງລໍ ເມືອງຄູນຄຳ.

ປະທານສະພາແຫ່ງຊາດ ພ້ອມດ້ວຍຄະນະ ໄດ້ສືບຕໍ່ພົບປະຢ້ຽມຢາມແຂວງສະຫວັນນະເຂດ ໂດຍການຕ້ອນຮັບຂອງທ່ານ ຄຳເຜີຍ ຜັນທະຈອນ  ຮອງເລຂາພັກແຂວງ, ປະທານສະພາປະຊາຊົນແຂວງ ເຊິ່ງໄດ້ເຮັດວຽກຮ່ວມກັບການນໍາຂອງແຂວງ, ພະນັກງານຫລັກແຫລ່ງຂອງແຂວງ ກ່ອນອື່ນໄດ້ຮັບຟັງບົດລາຍງານຫຍໍ້ກ່ຽວກັບການພັດທະນາເສດຖະກິດ-ສັງຄົມຂອງແຂວງ ໄດ້ເຮັດວຽກຮ່ວມກັບຄະນະພັກ, ອຳນາດການປົກຄອງ ແລະ ປະຊາຊົນກຸ່ມບ້ານຫ້ວຍຫອຍ ເມືອງພິນ ແຂວງສະຫວັນນະເຂດ, ຈາກນັ້ນ ຄະນະ ຍັງໄດ້ຢ້ຽມຢາມເຂື່ອນໄຟ້ຟ້າເຊລະນອງ 1.

ພາຍຫລັງຮັບຟັງບົດລາຍງານຂອງອຳນາດການປົກຄອງ ແລະ ຄຳຄິດຄຳເຫັນ, ຂໍ້ສະເໜີຕ່າງໆທ່ານປະທານສະພາແຫ່ງຊາດ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດຢ່າງຮອບດ້ານຂອງແຂວງ, ຂອງເມືອງເວົ້າລວມ, ເວົ້າສະເພາະແມ່ນຂອງແຕ່ລະບ້ານ ໄດ້ມີການພັດທະນາຮອບດ້ານ ຕິດພັນກັບແຫລ່ງທ່ອງທ່ຽວ ທັງໄດ້ມີການປັບປຸງປ່ຽນແປງ, ພັດທະນາດີຂຶ້ນ ສາມາດດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ຽວຊົມສະຖານທີ່ດັ່ງກ່າວເພີ່ມຂຶ້ນໃນແຕ່ລະປີ, ເຮັດໃຫ້ປະຊາຊົນມີລາຍຮັບ ແລະ ຊີວິດການເປັນຢູ່ດີຂຶ້ນເປັນກ້າວໆ; ພ້ອມນັ້ນທ່ານຍັງໄດ້ຮຽກຮ້ອງໃຫ້ເອົາໃຈໃສ່ໃນການປະຕິບັດທິດທາງແຜນການດັ່ງກ່າວ ໃຫ້ມີການປ່ຽນແປງທີ່ດີຂຶ້ນກວ່າເກົ່າ; ອຳນາດການປົກຄອງຕ້ອງໄດ້ຍົກລະດັບການຊີ້ນຳ-ນຳພາ ຕາມທິດທີ່ໄດ້ຮັບຜົນສຳເລັດໃຫ້ສູງຂຶ້ນເລື້ອຍໆ ໂດຍຕິດພັນກັບວຽກງານປ້ອງກັນຊາດ-ປ້ອງກັນຄວາມສະຫງົບ, ຕິດພັນກັບການກໍ່ສ້າງວຽກງານພັກ, ປັບປຸງວຽກງານຈັດຕັ້ງມະຫາຊົນ.

ປະທານສະພາແຫ່ງຊາດ ຍົກໃຫ້ເຫັນວ່າ ຖ້າເສດຖະກິດພັດທະນາ ແຕ່ວຽກງານປ້ອງກັນຊາດ-ປ້ອງກັນຄວາມສະຫງົບ ບໍ່ທັນສະຫງົບ ກໍເຮັດໃຫ້ວຽກງານການພັດທະນາເສດຖະກິດນັ້ນຖືກຢຸດສະງັກ ເພາະວຽກປ້ອງກັນຊາດ-ປ້ອງກັນຄວາມສະຫງົບ ແມ່ນວຽກໜຶ່ງຢູ່ແຖວໜ້າໃນການຕັດສິນບັນດາວຽກງານອື່ນໆ, ສໍາລັບວຽກງານສຶກສາ ເນັ້ນໃຫ້ເອົາໃຈໃສ່ໃຫ້ລູກຫລານຂອງພໍ່ແມ່ປະຊາຊົນ ຕ້ອງໄດ້ຮັບການສຶກສາຢ່າງທົ່ວເຖິງ, ສ່ວນວຽກງານສາທາລະນະສຸກ ເນັ້ນໃຫ້ແຂວງ, ເມືອງ ເອົາໃຈໃສ່ເລື່ອງໂພຊະນາການຂອງເດັກນ້ອຍ, ເຫັນວ່າເດັກນ້ອຍອາຍຸ 8-10 ປີ ເກນຄວາມສູງຍັງຕໍ່າຫລາຍ ສະແດງໃຫ້ເຫັນເຖິງວຽກງານໂພຊະນາການຍັງບໍ່ໄດ້ດີເທົ່າທີ່ຄວນ ໂດຍໄດ້ຮຽກຮ້ອງໃຫ້ສອງຂະແໜງການດັ່ງກ່າວປະສານສົມທົບກັບອົງການຈັດຕັ້ງມະຫາຊົນ ຕິດພັນກັບຄອບຄົວ ຈົ່ງພ້ອມກັນແກ້ໄຂບັນຫາດັ່ງກ່າວ ໃຫ້ເປັນຕ່ອງໂສ້, ເປັນລະບົບ ທັງແຂວງ, ເມືອງ, ບ້ານ, ຄອບຄົວ ຈຶ່ງຈະສາມາດແກ້ໄຂບັນຫາດັ່ງກ່າວ ເພື່ອບັນລຸຄາດໝາຍສູ້ຊົນ ເພາະເປັນບັນຫາກົກທີ່້ຕັດສິນປະເທດຊາດຂອງພວກເຮົາ ສືບຕໍ່ຂະຫຍາຍຕົວໃນແງ່ໝັ້ນທ່ຽງ ຈຶ່ງຕ້ອງໄດ້ມີຊັບພະຍາກອນທີ່ອຸດົມສົມບູນ ທາງດ້ານຮ່າງກາຍ, ສະຕິປັນຍາ ເພື່ອພັດທະນາປະເທດຊາດໃຫ້ຈະເລີນກ້າວໜ້າ.        ພ້ອມນັ້ນ, ຕ້ອງເອົາໃຈໃສ່ສູ້ຊົນໃຫ້ບັນດາປາກົດການຫຍໍ້ທໍ້ໃນສັງຄົມໃຫ້ໝົດໄປເທື່ອລະກ້າວ; ສືບຕໍ່ພັດທະນາເສດຖະກິດ-ສັງຄົມໃຫ້ດີຂຶ້ນ ເປັນຕົ້ນແມ່ນການພັດທະນາການປູກຝັງ-ລ້ຽງສັດ ຕິດພັນກັບການທ່ອງທ່ຽວ, ຕິດພັນກັບການປຸງແຕ່ງຜະລິດຕະພັນກະສິກຳຂອງຊາວບ້ານ ໂດຍໄດ້ຈາກສະຕິປັນຍາ ແລະ ຫົວຄິດປະດິດສ້າງໃຫ້ມີຫລາກຫລາຍສີສັນ ເພື່ອວາງສະແດງ ແລະ ຈຳໜ່າຍສ້າງລາຍຮັບໃຫ້ປະຊາຊົນພາຍໃນບ້ານ ພ້ອມທັງເສີມຂະຫຍາຍຮີດຄອງປະເພນີ ແລະ ວັດທະນະທຳອັນດີງາມຂອງທ້ອງຖິ່ນ ເພື່ອສ້າງຄວາມປະທັບໃຈ ແລະ ດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດນັບມື້ນັບຫລາຍຂຶ້ນ. ຫລັງຈາກນັ້ນ, ປະທານສະພາແຫ່ງຊາດ ພ້ອມດ້ວຍຄະນະ ໄດ້ມອບເຄື່ອງຊ່ວຍເຫລືອຈຳນວນໜຶ່ງໃຫ້ສອງແຂວງດັ່ງກ່າວ.

(ນາງ ໄຊໂສພາພອນ ມິ່ງມຸງຄຸນ)