(ສພຊ): ສະຫາຍ ນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ ປະທານສະພາແຫ່ງຊາດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ສະຫາຍ ພົນໂທ ເຈີນ ເດີນ ກຳມະການສູນກາງພັກກອມມູນິດຫວຽດນາມຮອງລັດຖະມົນຕີກະຊວງປ້ອງກັນ ປະເທດແຫ່ງ ສສ ຫວຽດນາມ ພ້ອມດ້ວຍຄະນະ ໃນວັນທີ 30 ມິຖຸນາ ຜ່ານມາ ທີ່ສະພາແຫ່ງຊາດ ເນື່ອງໃນໂອກາດເຂົ້າ ຮ່ວມເປີດງານວາງສະແດງສິນຄ້າລາວ-ຫວຽດນາມ 2018. ສະຫາຍ ນາງ ປານີ ຢາທໍ່ຕູ້ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການເປີດງານວາງສະແດງສິນຄ້າລາວ -ຫວຽດຄັ້ງນີ້ ຊຶ່ງເປັນການສົ່ງ ເສີມໃຫ້ມີການແລກປ່ຽນສິນຄ້າລະຫວ່າງສອງປະເທດໃຫ້ ມີຄວາມກວ້າງຂວາງອອກ, ເຮັດໃຫ້ຜູ້ປະກອບການກໍຄືຜູ້ບໍລິໂພກໃນ ສປປ ລາວ ໄດ້ຮັບຮູ້ສິນຄ້າ ແລະ ນຳໃຊ້ສິນຄ້າ ຈາກ ສສ ຫວຽດນາມ ຫຼາຍຂຶ້ນ. ພ້ອມດຽວກັນນີ້ທ່ານຍັງ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ການພົວ ພັນຮ່ວມມືທີ່ເປັນມູນ ເຊື້ອລະຫວ່າງສອງປະເທດທີ່ຍາມໃດກໍໄດ້ຮ່ວມມືກັນຢ່າງໃກ້ຊິດ, ມີການແລກປ່ຽນບົດຮຽນ, ຂໍ້ມູນຂ່າວສານຊຶ່ງກັນ ແລະ ກັນພິເສດແມ່ນການຊ່ວຍເຫຼືອ ດ້ານວັດຖຸອຸປະກອນເຂົ້າໃນ ການສົ່ງເສີມສ້າງກອງທັບປະຊາຊົນລາວ ເພື່ອຮັບໃຊ້ໜ້າທີ່ປົກປັກຮັກສາ ແລະ ສ້າງສາພັດທະນາປະເທດຊາດໃຫ້ມີຄວາມສະຫງົບໝັ້ນຄົງ ແລະ ສີວິໄລຕໍ່ໄປ. ໃນໂອກາດດຽວກັນ, ສະຫາຍ ພົນໂທ ເຈີນ ເດີນ ໄດ້ສະແດງຄວາມຂອບໃຈຕໍ່ການ ຕ້ອນຮັບອັນອົບອຸ່ນພ້ອມທັງ ລາຍງານໃຫ້ຮູ້ວ່າການເປີດງານວາງສະແດງສິນຄ້າຄັ້ງນີ້ ເປັນຄັ້ງທີ 4 ທີ່ໄດ້ມີການປະສານສົມທົບກັບກະຊວງອຸດສາຫະກຳ ແລະ ການຄ້າຂອງ ສປປ ລາວ ຈັດງານດັ່ງກ່າວ ຂຶ້ນ ຊຶ່ງປີ 2018 ນີ້ມີການວາງສະແດງສິນຄ້າຮ້ອຍກວ່າຫົວໜ່ວຍລາຍການສິນຄ້າຈາກ ສສ ຫວຽດນາມ; ໃນນັ້ນ ຍັງມີອີກຫຼາຍບໍລິສັດທີ່ມີຊື່ສຽງຂອງ ຫວຽດນາມ ກໍໄດ້ມາເຂົາຮ່ວມ; ທັງນີ້ກໍເພື່ອເປັນການແລກ ປ່ຽນບົດຮຽນຕ່າງໆກັບນັກທຸລະກິດລາວ ທັງເປັນການປຸກລະດົມ ແລະ ສົ່ງເສີມໃຫ້ມີ ການແລກປ່ຽນສິນຄ້າລະຫວ່າງ ສອງປະເທດໃຫ້ມີຄວາມກວ້າງ ຂວາງອອກ; ພ້ອມນີ້ ສະຫາຍ ຮອງລັດຖະມົນຕີຍັງໄດ້ຕີລາ ຄາສູງຕໍ່ການພົວພັນຮ່ວມມື ທີ່ເປັນມູນເຊື້ອຂອງພັກ-ລັດ, ກອງທັບ ກໍຄືປະຊາຊົນສອງປະ ເທດທີ່ຍາມໃດກໍໃຫ້ການຊ່ວຍ ເຫຼືອຊຶ່ງກັນ ແລະ ກັນເປັນຢ່າງດີ; ພ້ອມທັງສະແດງຄວາມ ຂອບໃຈຕໍ່ພັກ-ລັດກໍຄືປະຊາຊົນລາວ ທີ່ອຳນວຍ ຄວາມສະດວກໃນການເຄື່ອນຍ້າຍອັດຖິ ຂອງທະຫານອາສາສະໝັກຫວຽດນາມ ທີ່ເສຍຊີວິດຢູ່ ສປປ ລາວ ໃນປາງສົງຄາມຕື່ມອີກ. (ຂ່າວ: ນາງ ອາລິນ ສຸພິມ ມະປະດິດ ສພຊ)