(ສພຊ) ຕອນບ່າຍວັນທິດທີ 24 ກຸມພາ ທີ່ຫ້ອງຮັບແຂກສະພາແຫ່ງຊາດ (ສພຊ) ສະຫາຍ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ປະທານ ສພຊ ໄດ້ຕ້ອນຮັບສະຫາຍ ຫງວຽນ ຟູຈ້ອງ ເລຂາທິການໃຫຍ່ຄະນະບໍລິຫານງານສູນກາງພັກຄອມມູນິດຫວຽດນາມ, ປະທານປະເທດແຫ່ງສາທາລະນະລັດສັງຄົມນິຍົມຫວຽດນາມ ພ້ອມດ້ວຍຄະນະຜູ້ແທນຂັ້ນສູງພັກ-ລັດຫວຽດນາມ ເນື່ອງໃນໂອກາດທີ່ເດີນທາງມາຢ້ຽມຢາມສັນຖະວະໄມຕີ ຢູ່ ສປປລາວ ຢ່າງເປັນທາງການ ໃນລະຫວ່າງວັນທີ 24-25 ກຸມພາ 2019.
ສະຫາຍ ນາງ ປານີ ຢາທໍ່ຕູ້ ໄດ້ກ່າວສະແດງຄວາມຍິນດີຕ້ອນຮັບອັນອົບອຸ່ນຕໍ່ສະຫາຍ ຫງວຽນ ຟູຈ້ອງ ພ້ອມດ້ວຍຄະນະ ທັງຕີລາຄາສູງຕໍ່ການເລືອກ ສປປລາວ ເປັນປະເທດທໍາອິດທີ່ເດີນທາງມາຢ້ຽມຢາມລັດຖະກິດການຕ່າງປະເທດ ເຊິ່ງເປັນການຢືນຢັນຄວາມສາມັກຄີອັນພິເສດ, ການຮ່ວມມືອັນຮອບດ້ານຂອງລາວ-ຫວຽດນາມ ໃຫ້ນັບມື້ນັບເຕີບໃຫຍ່ເຂົ້າສູ່ລວງເລິກ ແລະ ສະແດງຄວາມຊົມເຊີຍຕໍ່ສະຫາຍເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ, ປະທານປະເທດແຫ່ງສາທາ ລະນະລັດສັງຄົມນິຍົມຫວຽດນາມ ທີ່ໄດ້ຮັບຄວາມໄວ້ວາງໃຈຈາກພັກ-ລັດ, ປະຊາຊົນຫວຽດນາມ ໂດຍສະເພາະກອງປະຊຸມສະໄໝສາມັນຂອງ ສພຊ ຫວຽດນາມ ທີ່ໄດ້ເລືອກຕັ້ງໃຫ້ເປັນປະທານປະເທດແຫ່ງ ສສ.ຫວຽດນາມ, ຊົມເຊີຍຜົນຂອງການພົບຂອງສອງເລຂາທິການໃຫຍ່ ລາວ-ຫວຽດນາມ ແລະ ຜົນຂອງການພົບປະເຮັດວຽກຮ່ວມກັບສະຫາຍ ທອງລຸນ ສີສຸລິດ ນາຍົກລັດຖະມົນຕີ ສປປລາວ ໄດ້ສໍາເລັດຢ່າງຈົບງາມ. ພ້ອມນັ້ນ, ຍັງຕີລາຄາສູງ ແລະ ຂອບໃຈຕໍ່ພັກ, ລັດຖະບານຫວຽດນາມ ທີ່ໄດ້ໃຫ້ການຮ່ວມມືຕໍ່ ສປປລາວ ຕະຫລອດມາ ເປັນຕົ້ນແມ່ນໄດ້ປະກອບສ່ວນທຶນໃນການສ້າງຫໍສະພາແຫ່ງຊາດລາວຫລັງໃໝ່ ເຊິ່ງເປັນຂອງຂວັນອັນລ້ຳຄ່າຂອງພັກ-ລັດ, ປະຊາຊົນຫວຽດນາມມອບໃຫ້ ພັກ-ລັດປະຊາຊົນລາວ ແລະ ຈະສືບຕໍ່ຮ່ວມມືເສີມຂະຫຍາຍສາຍພົວພັນໃນຂອບເຂດສິດ, ພາລະບົດບາດຂອງສະພາແຫ່ງຊາດ ຮ່ວມກັບສະພາແຫ່ງຊາດຫວຽດນາມ ໃຫ້ກ້າວເຂົ້າສູ່ລວງເລິກ.
ສະຫາຍ ຫງວຽນ ຟູຈ້ອງ ກໍໄດ້ກ່າວສະແດງຄວາມຂອບໃຈຕໍ່ສະຫາຍ ນາງ ປານີ ຢາທໍ່ຕູ້ ທີ່ໄດ້ໃຫ້ການຕ້ອນຮັບອັນອົບອຸ່ນ ພ້ອມທັງໄດ້ແຈ້ງໃຫ້ຮູ້ກ່ຽວກັບຈຸດປະສົງການເດີນທາງມາຢ້ຽມຢາມ ສປປລາວ ໃນຄັ້ງນີ້ ໂດຍໄດ້ຮັບການເຊື້ອເຊີນຂອງສະຫາຍ ບຸນຍັງ ວໍລະຈິດ ເລຂາທິການໃຫຍ່ພັກປະຊາຊົນປະຕິວັດລາວ, ປະທານປະເທດ ແຫ່ງ ສປປລາວ ເພື່ອສືບຕໍ່ສາຍພົວພັນການຮ່ວມມືຂອງສອງປະເທດໃຫ້ມີປະສິດທິຜົນເພີ່ມຂຶ້ນ ແລະ ລາຍງານກ່ຽວກັບຜົນການພົບປະກັບເລຂາທິການໃຫຍ່ພັກປະຊາຊົນປະຕິວັດລາວ ໄດ້ເຊັນເອກະສານການຮ່ວມມືຮອບດ້ານ 9 ສະບັບ ແລະ ການພົບປະເຮັດວຽກຮ່ວມກັບສະຫາຍນາຍົກລັດຖະມົນຕີ ສປປລາວ ແລະ ສະເໜີໃຫ້ສອງສະພາແຫ່ງຊາດ ລາວ-ຫວຽດນາມ ໃຫ້ມີການພົວພັນຮ່ວມມື ໃນການຕິດຕາມກວດກາ ແລະ ເສີມຂະຫຍາຍສິດເປັນເຈົ້າຂອງປະຊາຊົນ ແລະ ສະແດງຄວາມຂອບໃຈທີ່ສະພາແຫ່ງຊາດລາວ ໄດ້ສະໜັບສະໜູນຄຽງບ່າຄຽງໄຫລ່ກັບສະພາແຫ່ງຊາດຫວຽດນາມ ໃນໄລຍະຜ່ານມາຈົນເຖິງປັດຈຸບັນ.
ສະຫາຍ ຫງວຽນ ຟູຈ້ອງ ພ້ອມດ້ວຍຄະນະ ຍັງໄດ້ເຂົ້າຢ້ຽມຊົມໂຄງການກໍ່ສ້າງຫໍສະພາແຫ່ງຊາດລາວຫລັງໃໝ່ ເພື່ອຕິດຕາມເບິ່ງຄວາມຄືບໜ້າຂອງການກໍ່ສ້າງ.
(ສອນສັກ ວັນວິໄຊ)