(ສພຊ) ວັນທີ 22 ສິງຫາ 2023 ທີ່ຫ້ອງຮັບແຂກສະພາແຫ່ງຊາດ, ສະຫາຍ ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສະພາແຫ່ງຊາດ ແຫ່ງ ສປປລາວ ໄດ້ຕ້ອນຮັບການເຂົ້າຢ້ຽມຂຳ່ນັບຂອງສະຫາຍ ອວງ ຈູລິວ ອະດີດກໍາມະການສູນກາງພັກ, ອະດີດຮອງປະທານສະພາແຫ່ງຊາດ, ປະທານຄະນະສັນຕິພາບ ຫວຽດນາມ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ແລະ ເຮັດວຽກ ຢູ່ ສປປລາວ ລະຫວ່າງວັນທີ 19-22 ສິງຫາ 2023 ເພື່ອປຶກສາຫາລືກັນກ່ຽວກັບສະພາບການພາກພື້ນ, ສາກົນ ແລະ ແລກປ່ຽນບົດຮຽນການເຄື່ອນໄຫວ ການທູດປະຊາຊົນ.

ໂອກາດນີ້, ສະຫາຍ ໄຊສົມພອນ ພົມວິຫານ ກໍໄດ້ຕີລາຄາສູງ ແລະ ສະແດງຄວາມຕ້ອນຮັບຢ່າງອົບອຸ່ນຕໍ່ ການມາຢ້ຽມຢາມ ຂອງຄະນະຜູ້ແທນຄະນະສັນຕິພາບຫວຽດນາມ ເຊິ່ງເປັນການປະກອບສ່ວນອັນສຳຄັນ ເຂົ້າໃນການຮັດແໜ້ນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ຂອງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ໃຫ້ນັບມື້ໄດ້ຮັບການເສີມຂະຫຍາຍ ແລະ ກ້າວເຂົ້າສູ່ລວງເລິກຢ່າງບໍ່ຢຸດຢັ້ງ. ພ້ອມນັ້ນ, ສະຫາຍປະທານສະພາແຫ່ງຊາດລາວ ຍັງໄດ້ຊົມເຊີຍຜົນສຳເລັດການພົບປະ 2 ຝ່າຍ ແລະ ຜົນການສຳມະນາ ໃນຫົວຂໍ້: “ການທູດປະຊາຊົນ” ເຊິ່ງເປັນຫົວຂໍ້ທີ່ສຳຄັນ ໃນການຮ່ວມມືສອງຝ່າຍ ໃນສະພາບການໂລກ, ພາກພື້ນພວມມີຄວາມສັບສົນ ແລະ ການທູດປະຊາຊົນ ພວມມີບົດບາດສຳຄັນຫຼາຍ; ສອງຝ່າຍໄດ້ມີກົນໄກແລກປ່ຽນຂໍ້ມູນ-ຂ່າວສານ, ແລກປ່ຽນບົດຮຽນ ແລະ ສະໜັບສະໜູນ ເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ, ສ້າງສະພາບແວດລ້ອມທີ່ເອື້ອອໍານວຍ ໃນການເສີມສ້າງມິດຕະພາບ, ສັນຕິພາບ ແລະ ການຮ່ວມມືເພື່ອການພັດທະນາຢູ່ທັງພາຍໃນປະເທດ ກໍຄືໃນພາກພືື້ນ ແລະ ສາກົນ, ຂໍໃຫ້ສືບຕໍ່ຮ່ວມມືກັນຢ່າງແໜ້ນແຟ້ນ ແລະ ໃຫ້ການສະໜັບສະໜູນຊ່ວຍເຫຼືອ ເຊິ່ງກັນ ແລະ ກັນ ໃນການເຄື່ອນໄຫວ ຢູ່ໃນເວທີພາກພື້ນ ແລະ ສາກົນ. ສຳລັບການພົວພັນຮ່ວມມື ລະຫວ່າງ ສອງສະພາແຫ່ງຊາດລາວ ແລະ ຫວຽດນາມ ໃນໄລຍະຜ່ານມາ ແມ່ນໄດ້ຮັບການເສີມຂະຫຍາຍຂຶ້ນຢ່າງຕໍ່ເນື່ອງ ເຊິ່ງໄດ້ນໍາເອົາຜົນປະໂຫຍດຕົວຈິງມາສູ່ສອງອົງການນິຕິບັນຍັດ ໂດຍສະເພາະໃນປີສາມັກຄີມິດຕະພາບລາວ-ຫວຽດນາມ ປີ 2022 ຜ່ານມາ, ສອງສະພາຂອງສອງປະເທດ ກໍໄດ້ຮ່ວມກັນຈັດຫຼາຍກິດຈະກໍາ ເພື່ອສະເຫຼີມສະຫຼອງວັນດັ່ງກ່າວ. ພ້ອມນັ້ນ, ທັງສອງສະພາແຫ່ງຊາດ ຍັງໄດ້ມີການຮ່ວມມື, ຊ່ວຍເຫຼືອ ແລະ ສະໜັບສະໜູນ ເຊິ່ງກັນ ແລະ ກັນ ໃນເວທີລັດຖະສະພາພາກພື້ນ ແລະ ສາກົນ ເປັນຕົ້ນແມ່ນ ກອງປະຊຸມສະມັດຊາໃຫຍ່ລັດຖະສະພາ ລະຫວ່າງ ຊາດອາຊຽນ (AIPA), ກອງປະຊຸມສະມັດຊາໃຫຍ່ຂອງສະຫະພັນລັດຖະສະພາກົນ (IPU) ແລະ ການເຄື່ອນໄຫວໃນເວທີລັດຖະສະພາອື່ນໆ.

ຈາກນັ້ນ, ສະຫາຍ ອວງ ຈູລິວ ກໍໄດ້ກ່າວສະແດງຄວາມຂອບໃຈຕໍ່ສະຫາຍປະທານສະພາແຫ່ງຊາດ ແຫ່ງ ສປປ ລາວ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ພ້ອມໄດ້ລາຍງານໃຫ້ຮູ້ກ່ຽວກັບຈຸດປະສົງຂອງການມາຢ້ຽມຢາມ ແລະ ເຮັດວຽກຢູ່ ສປປລາວ ໃນຄັ້ງນີ້, ພ້ອມທັງອວຍພອນແດ່ສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ຫວຽດນາມ-ລາວ-ຫວຽດນາມ ຈົ່ງສືບຕໍ່ ໄດ້ຮັບການເສີມຂະຫຍາຍ ໃຫ້ກ້າວເຂົ້າສູ່ລວງເລິກຢ່າງສວຍສົດງົດງາມ ແລະ ເກີດດອກອອກຜົນຊົ່ວກາລະນານ.