(ສພຊ) ວັນທີ 12 ກໍລະກົດ 2023 ທີ່ຫ້ອງຮັບແຂກສະພາແຫ່ງຊາດ, ສະຫາຍ ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສະພາແຫ່ງຊາດ ແຫ່ງ ສປປລາວ ໄດ້ຕ້ອນຮັບການເຂົ້າຢ້ຽມຂຳ່ນັບຂອງສະຫາຍ ຖ໋າຍ ແທງ ກຸ່ຍ ກຳມະການສູນກາງພັກ, ເລຂາຄະນະພັກ, ປະທານສະພາປະຊາຊົນແຂວງ, ຫົວໜ້າຄະນະຜູ້ແທນສະພາແຫ່ງຊາດ ແຂວງເຫງະອານ ສສ.ຫວຽດນາມ ພ້ອມດ້ວຍຄະນະ; ໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກຢູ່ແຂວງບໍລິຄຳໄຊ, ນະຄອນຫຼວງວຽງຈັນ ແລະ ແຂວງວຽງຈັນ ໃນລະຫວ່າງວັນທີ 12-16 ກໍລະກົດ 2023.
ໂອກາດນີ້, ສະຫາຍ ໄຊສົມພອນ ພົມວິຫານ ກໍໄດ້ກ່າວສະແດງຄວາມຕ້ອນຮັບຢ່າງອົບອຸ່ນ ແລະ ຕີລາຄາສູງຕໍ່ການຢ້ຽມຢາມ ສປປລາວ ຂອງສະຫາຍ ຖ໋າຍ ແທງ ກຸ່ຍ ໃນຄັ້ງນີ້ ຈະເປັນການປະກອບສ່ວນຮັດແໜ້ນ ແລະ ເພີ່ມພູນຄູນສ້າງສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ ເວົ້າລວມ, ເວົ້າສະເພາະ ລະຫວ່າງ ສະພາແຫ່ງຊາດລາວ ແລະ ສະພາປະຊາຊົນແຂວງເຫງະອານ ໃຫ້ນັບມື້ເຂົ້າສູ່ລວງເລິກ ແລະ ເກີດດອກອອກຜົນຍິ່ງໆຂຶ້ນ; ສະພາແຫ່ງຊາດລາວ ແລະ ສະພາແຫ່ງຊາດຫວຽດນາມ ໄດ້ມີມູນເຊື້ອແຫ່ງການພົວພັນ ແລະ ຮ່ວມມືກັນຢ່າງສະໜິດແໜ້ນ, ນັບມື້ນັບເປັນຮູບປະທໍາ ແລະ ມີໝາກຜົນຍິ່ງໆຂຶ້ນ ເຊິ່ງສະແດງອອກໃນການແລກປ່ຽນການຢ້ຽມຢາມໃນລະດັບຄະນະຜູ້ແທນຂັ້ນປະທານສະພາແຫ່ງຊາດ, ຮອງປະທານສະພາແຫ່ງຊາດ, ກຳມາທິການ, ຄະນະເລຂາທິການ ແລະ ຂັ້ນວິຊາການ ຕະຫຼອດຮອດສະພາຂັ້ນທ້ອງຖິ່ນນໍາກັນ; ສອງຝ່າຍມີການຈັດກອງປະຊຸມສຳມະນາທາງໄກ ເພື່ອແລກປ່ຽນບົດຮຽນທີ່ມີຄວາມສົນໃຈນໍາກັນ; ນອກຈາກນີ້, ສອງຝ່າຍ ຍັງໄດ້ຮ່ວມມື, ສະໜັບສະໜູນ ແລະ ຊ່ວຍເຫຼືອ ເຊິ່ງກັນ ແລະ ກັນ ໃນການເຄື່ອນໄຫວ ໃນເວທີລັດຖະສະພາພາກພື້ນ ແລະ ສາກົນ. ໃນປີນີ້, ສະພາແຫ່ງຊາດລາວ ຈະເປັນເຈົ້າພາບຈັດກອງປະຊຸມສຸດຍອດລັດຖະສະພາ (CLV) ຄັ້ງທີ 1 ແລະ ໃນປີ 2024, ສປປລາວ ໄດ້ຮັບກຽດເປັນປະທານອາຊຽນ ແລະ ຈະເປັນເຈົ້າ ພາບກອງປະຊຸມສຸດຍອດອາຊຽນ ຄັ້ງທີ 43 ແລະ ຄັ້ງທີ 44. ໃນນັ້ນ, ສະພາແຫ່ງຊາດລາວ ກໍຈະເປັນເຈົ້າພາບຈັດກອງປະຊຸມໃຫຍ່ສະມັດຊາລັດຖະສະພາລະຫວ່າງຊາດອາຊຽນ (AIPA) ຄັ້ງທີ 45. ຫວັງເປັນຢ່າງຍິ່ງວ່າ ຈະໄດ້ຮັບການສະໜັບສະໜູນຈາກ ສສ.ຫວຽດນາມ ກໍຄື ແຂວງເຫງະອານ; ພ້ອມນັ້ນ, ທ່ານປະທານສະພາແຫ່ງຊາດລາວ ຍັງໄດ້ສະເໜີໃຫ້ແຂວງເຫງະອານ ສືບຕໍ່ຮ່ວມມືກັບ ນະຄອນຫຼວງວຽງຈັນ, ແຂວງບໍລິຄໍາໄຊ, ແຂວງວຽງຈັນ ແລະ ບັນດາແຂວງ ຂອງ ສປປລາວ ເປັນຕົ້ນ ໃຫ້ມີການແລກປ່ຽນຄະນະຜູ້ແທນຂັ້ນສູງໄປມາຫາສູ່ກັນ, ການແລກປ່ຽນຂໍ້ມູນຂ່າວສານ ໃນຂະແໜງການຕ່າງໆ ຂອງສອງຝ່າຍ ໂດຍສະເພາະວຽກງານການກໍ່ສ້າງພັກ, ວຽກງານຮາກຖານ, ວຽກງານຄຸ້ມຄອງບຸກຄະລາກອນ ແລະ ສະເໜີໃຫ້ມີການຮ່ວມມືດ້ານການຄ້າ-ການລົງທຶນ, ວຽກງານການທ່ອງທ່ຽວ, ວຽກງານການສຶກສາ ແລະ ວຽກງານການຄຸ້ມຄອງຕົວເມືອງ.
ຈາກນັ້ນ, ສະຫາຍ ປະທານສະພາປະຊາຊົນແຂວງເຫງະອານ ກໍໄດ້ກ່າວສະແດງຄວາມຂອບໃຈຕໍ່ສະຫາຍ ປະທານສະພາແຫ່ງຊາດ ແຫ່ງ ສປປລາວ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ພ້ອມນັ້ນ, ຍັງໄດ້ລາຍງານໃຫ້ຮູ້ກ່ຽວກັບຈຸດປະສົງຂອງການມາຢ້ຽມຢາມ ສປປລາວ ກໍຄືບັນດາແຂວງຕ່າງໆໃນຄັ້ງນີ້ ພ້ອມທັງອວຍພອນແດ່ສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ຫວຽດນາມ-ລາວ-ຫວຽດນາມ ຈົ່ງໝັ້ນຄົງຂະໜົງແກ່ນຊົ່ວກາລະນານ.
