ໃນ ວັນທີ 23 ເມສາ 2018 ທີ່ນະຄອນຫລວງວຽງຈັນ, ທ່ານ ນາງ ປານີ ຢາທໍ່ຕູ້ ປະທານ ສະພາແຫ່ງຊາດ ແຫ່ງ ສປປ ລາວ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂ່ຳນັບ ຂອງ ສະຫາຍ ນາງ ຕ໋ອງ ທິ ຝ໋ອງ ຮອງປະທານ ຜູ້ປະຈຳການສະພາແຫ່ງຊາດແຫ່ງ ສສ ຫວຽດນາມ ພ້ອມດ້ວຍຄະນະ, ໃນໂອກາດເດີນທາງຢ້ຽມຢາມ ແລະ ແລກປ່ຽນບົດຮຽນຢ່າງເປັນທາງການ ຢູ່ ສປປ ລາວ ໃນ ລະຫວ່າງວັນທີ 23-26 ເມສາ ນີ້.

ໃນໂອກາດດັ່ງກ່າວ, ທ່ານ ນາງ ປານີ ຢາທໍ່ຕູ້ ​ໄດ້​ສະ​ແດງ​ຄວາມຍິນ​ດີ ​ຕ້ອນຮັບ ​ແລະ ຕີ​ລາ ຄາ​ສູງຕໍ່ ທ່ານ ນາງ ຕ໋ອງ ທິ ຝ໋ອງ ທີ່​ໄດ້​ນຳພາ​ຄະນະ ​ ເດີນທາງ​ມາເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້, ເຊິ່ງ​ເປັນ​ການ​ປະກອບສ່ວນ ອັນສຳຄັນ ​ເຂົ້າ​ໃນ​ການເສີມຂະຫຍາຍ ສາຍພົວພັນມິດຕະພາບອັນເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ໂດຍສະເພາະ ລະຫວ່າງ ສອງສະພາແຫ່ງຊາດ ລາວ-ຫວຽດນາມ ໃຫ້ນັບມື້ເຂົ້າສູ່ລວງເລິກ ແລະ ເກີດດອກອອກຜົນຢ່າງແທ້ຈິງ.

ໃນ ໂອກາດດຽວກັນນີ້, ທ່ານ ນາງ ຕ໋ອງ ທິ ຝ໋ອງ ກໍ​ໄດ້​ສະ​ແດງ​ຄວາມ​ຂອບໃຈ ​ ມາຍັງທ່ານ ນາງ ປານີ ຢາທໍ່ຕູ້ ທີ່​ໄດ້​ສະຫລະ ​ເວລາ​ອັນ​ມີຄ່າ​ ໃຫ້ການຕ້ອນຮັບອັນອົບອຸ່ນ ​ໃນ​ຄັ້ງ​ນີ້, ພ້ອມ​ທັງ​ແຈ້ງຈຸດປະສົງ​ ຂອງ​ການ​ເດີນທາງ​ມາ ສປປ ລາວ ໃນຄັ້ງ​ນີ້, ໃຫ້​ ທ່ານປະທານສະພາແຫ່ງຊາດ ຊາບຕື່ມອີກ.