ວັນທີ 25 ມີນາ 2022 ຢູ່ທີ່ຫ້ອງປະຊຸມສານປະຊາຊົນ ແຂວງຫົວພັນ, ທ່ານ ນາງ ອຳໄພວອນ ລ້ອມບຸນແພງ ກຳມະການສຳຮອງສູນກາງພັກ, ຮອງເລຂາພັກແຂວງ, ປະທານຄະນະ ສສຊ ປະຈຳເຂດເລືອກຕັ້ງທີ 8 ແຂວງຫົວພັນ, ປະທານສະພາປະຊາຊົນ ແຂວງຫົວພັນ ລົງພົບປະ ແລະ ໂອ້ລົມຕໍ່ຂົງເຂດຕຸລາການ ຄື ສານປະຊາຊົນແຂວງ ແລະ ອົງການໄອຍະການປະຊາຊົນແຂວງ ໃນນາມຜູ້ຮັບຜິດຊອບ ຊີ້ນຳວຽກງານຂົງເຂດຕຸລາການ ໂດຍມີບັນດາທ່ານປະທານ, ຮອງປະທານ ສານປະຊາຊົນແຂວງ, ສານເຂດ1; ຫົວໜ້າ,ຮອງຫົວໜ້າອົງການໄອຍະການປະຊາຊົນແຂວງ, ອົງການໄອຍະການປະຊາຊົນເຂດ ຕະຫລອດຮອດພະນັກງານວິຊາການພາຍໃນສອງຂົງເຂດ ເຂົ້້າຮ່ວມ ຢ່າງພ້ອມພຽງ.

         ໂອກາດນີ້, ໄດ້ຮັບຟັງການລາຍງານສະພາບການເຄື່ອນໄຫວວຽກງານໃນປີຜ່ານມາຂອງ ສານປະຊາຊົນແຂວງ ແລະ ອົງການໄອຍະການປະຊາຊົນແຂວງ ໂດຍສັງເຂບ. ຈາກນັ້ນທ່ານ ນາງ ອຳໄພວອນ ລ້ອມບຸນແພງ ໄດ້ສະແດງຄວາມຍ້ອງຍໍຊົມເຊີຍ ມາຍັງຄະນະພັກ ກໍຄື ຄະນະນຳຂອງສານປະຊາຊົນ ແລະ ອົງການໄອຍະການປະຊາຊົນແຂວງ ທີ່ໄດ້ເອົາໃຈໃສ່ຈັດຕັ້ງປະຕິບັດຕາມສິດ, ພາລະບົດບາດຂອງຕົນ ໂດຍສະແດງອອກໃນບົດລາຍງານດັ່ງກ່າວ ສາມາດຍາດໄດ້ຜົນສຳເລັດຫລາຍດ້ານ. ຄຽງຄູ່ກັນນີ້, ທ່ານຍັງໄດ້ຮຽກຮ້ອງໃຫ້ ຄະນະພັກ, ຄະນະນຳ ຕະຫລອດຮອດພະນັກງານວິຊາການ ສານປະຊາຊົນແຂວງ ແລະ ອົງການໄອຍະການປະຊາຊົນແຂວງ ເອົາໃຈໃສ່ເຮັດວຽກງານສຶກສາອົບຮົມການເມືອງແນວຄິດ ດ້ວຍຫລາຍຮູບການ, ເຮັດເປັນປົກກະຕິ, ເລິກເຊິ່ງ, ຕໍ່ເນື່ອງ ແທດເໝາະກັບຕົວຈິງ ເພື່ອສ້າງໃຫ້ພະນັກງານ ມີຄວາມຮັບຮູ້, ເຂົ້າໃຈແຈ້ງຕໍ່ແນວທາງນະໂຍບາຍຂອງພັກ, ກົດໝາຍຂອງລັດ ຢ່າງໜັກແໜ້ນ ມີແນວຄິດ ແລະ ການກະທຳອັນໃໝ່, ກ້າວໜ້າທັນສະໄໝ, ມີນ້ຳໃຈຮັກຊາດ ມີຄຸນທາດການເມືອງໜັກແໜ້ນ ມີຄຸນສົມບັດ, ສິນທຳປະຕິບັດ ມີຈັນຍາບັນ, ຈັນຍາທຳ ຕໍ່ການປະຕິບັດໜ້າທີ່ວິຊາສະເພາະ; ຍົກສູງຄວາມຮັບຜິດຊອບຕໍ່ໜ້າທີ່ການເມືອງ ທີ່ໄດ້ຮັບການມອບໝາຍ,

ຕັ້ງໜ້າຝຶກຝົນຫຼໍ່ຫຼອມຕົນເອງຢ່າງຮອບດ້ານ ເພື່ອພັດທະນາຄວາມຮູ້, ຄວາມສາມາດຂອງຕົນໃຫ້ສູງຂຶ້ນ, ມີຄວາມກະຕືລືລົ້ນຕໍ່ໜ້າທີ່ວຽກງານ ທີ່ໄດ້ຮັບການມອບໝາຍ, ມີຄວາມດຸໝັ່ນ, ອົດທົນ ເພື່ອສ້າງຕົນເອງໃຫ້ເປັນຜູ້ຊຳນານງານ ມີຄວາມຊຽວຊານ ກາຍເປັນມືອາຊີບດ້ານວິຊາສະເພາະ, ດ້ານວິຊາການ; ພ້ອມທັງປັບປຸງກົງຈັກການຈັດຕັ້ງໃຫ້ເປັນລະບົບ, ເຂັ້ມແຂງ, ບຳລຸງກໍ່ສ້າງພະນັກງານ, ຜູ້ພິພາກສາໃຫ້ດີ, ເກັ່ງ ມີປະລິມານເພີ່ມຂຶ້ນ ແລ້ວຮັບປະກັນທາງດ້ານຄຸນນະພາບ ເພື່ອສ້າງຜູ້ສືບທອດທີ່ດີ; ເພີ່ມທະວີໃນການປະຕິບັດໜ້າທີ່ວິຊາສະເພາະ ຕາມພາລະບົດບາດ, ສິດ ແລະ ໜ້າທີ່ ຕາມກົດໝາຍຢ່າງເຂັ້ມງວດ ເປັນຕົ້ນແມ່ນ ປັບປຸງ ແບບແຜນວິທີເຮັດວຽກ, ກົນໄກການບໍລິຫານ, ການດຳເນີນ, ການແກ້ໄຂຄະດີ ໃຫ້ມີຄວາມວ່ອງໄວ ຮັບປະກັນຄວາມຖືກຕ້ອງ, ຮອບດ້ານ, ຄົບຖ້ວນ, ພາວະວິໄສ ມີຄວາມປ່ອງໃສໃນທຸກຂັ້ນຕອນ, ການຄົ້ນຄວ້າພິຈາລະນາຕັດສິນຄະດີ ຕ້ອງຖືເອົາກົດໝາຍເປັນຫລັກ ໂດຍພື້ນຖານຕ້ອງອີງໃສ່ຂໍ້ມູນ, ຫລັກຖານ ແລະ ຄວາມເປັນຈິງຂອງຄະດີນັ້ນ ແລະ ເອົາໃຈໃສ່ປັບປຸງກົນໄກການປະສານງານໃຫ້ສອດຄ່ອງ ໂດຍສະເພາະແມ່ນ 4 ພາກສ່ວນທີ່ດຳເນີນຄະດີ ຕາມຂະບວນຍຸຕິທຳ ພ້ອມທັງຈັດຕັ້ງປະຕິບັດເນື້ອໃນບົດບັນທຶກກອງປະຊຸມ 4 ພາກສ່ວນ ຂອງສູນກາງ, ທ້ອງຖິ່ນ ໃຫ້ປະກົດຜົນເປັນຈິງ ພ້ອມນີ້ ຕ້ອງສຸມໃສ່ຈັດຕັ້ງປະຕິບັດມະຕິຂອງສະພາປະຊາຊົນແຂວງ ທີ່ໄດ້ພິຈາລະນາຮັບຮອງເອົາ ໄປຄຽງຄູ່ກັບ 2 ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ການແກ້ໄຂບັນຫາຢ່າເສບຕິດ ໃຫ້ປາກົດຜົນເປັນຈິງ ແລະ ມີຜົນສຳເລັດຕາມແຜນການທີ່ວາງໄວ້.

 (ພາບ ແລະ ຂ່າວໂດຍ ນາງ ປຸ້ຍນິຕາ ເພັງມີໄຊ)