ປະຕິບັດຕາມພາລະບົດບາດຂອງຄະນະປະຈຳພັກແຂວງ ໃນນາມຊີ້ນຳວຽກງານຂົງເຂດສານປະຊາຊົນແຂວງ, ອົງການໄອຍະການປະຊາຊົນແຂວງ ແລະ ພະແນກຍຸຕິທຳແຂວງ ຕອນເຊົາວັນທີ 4 ກັນຍາ 2024 ທ່ານຄຳຟອງ ອິມານີ ຮອງເລຂາພັກແຂວງ ປະທານສະພາປະຊາຊົນແຂວງຫລວງນ້ຳທາ (ສພຂ) ໄດ້ລົງຊູກຍູ້ການຈັດຕັ້ງປະຕິບັດວຽກງານພະນັກງານຫລັກແຫລ່ງຢູ່ພະແນກຍຸຕິທຳແຂວງ, ມຫົວໜ້າພະແນກຍຸຕິທຳແຂວງ, ຮອງປະທານຄະນະກຳມະການຍຸຕິທຳ ປກຊ-ປກສ ສພຂ, ພ້ອມດ້ວຍພະນັກງານຫລັກແຫລ່ງເຂົ້າຮ່ວມຢ່າງພ້ອມພຽງ.
ທ່ານ ນາງ ມະນີພອນ ນາບຸນແພງ ກຳມະການພັກແຂວງ ຫົວໜ້າພະແນກຍຸຕິທຳແຂວງ ໄດ້ລາຍງານການຈັດຕັ້ງປະຕິບັດວຽກງານການເຄື່ອນໄຫວໃນໄລຍະຜ່ານ ໄດ້ຕັ້ງໜ້າເຮັດໜ້າທີ່ການເມືອງ-ນໍາພາແນວຄິດ ໃຫ້ແກ່ພະນັກງານ-ລັດຖະກອນເປັນປົກກະຕິ, ໄດ້ລົງປັບປຸງຄືນຄະນະແກ້ໄຂຂໍ້ຂັດແຍ່ງຂັ້ນບ້ານໄດ້ 9 ບ້ານ, ຈັດຝຶກອົບຮົມຄະນະແກ້ໄຂຂໍ້ຂັດແຍ່ງຂັ້ນບ້ານໄດ້ 13 ບ້ານ, ປະເມີນຄືນຄອບຄົວ ແລະ ບ້ານແບບຢ່າງປະຕິບັດກົດໝາຍໄດ້ 319 ຄອບຄົວ, ອອກໃບຢັ້ງຢືນການເອົາເດັກມາເປັນລູກລ້ຽງຂອງພົນລະເມືອງລາວໄດ້ 4 ສະບັບ, ໃຫ້ຄໍາປຶກສາທາງດ້ານກົດໝາຍໃຫ້ແກ່ປະຊາຊົນໂດຍບໍ່ເສຍຄ່າ 94 ຄັ້ງ, ເປີດການຮຽນການສອນກົດໝາຍຂັ້ນພຶ້ນຖານໄລຍະສັ້ນ 45 ວັນປະຈໍາປີ 2024 ໃນ 4 ເມືອງຂອງແຂວງ, ຈັດກອງປະຊຸມວຽກງານຍຸຕິທໍາຮາກຖານທົ່ວແຂວງ, ລົງກວດກາ ແລະ ປັບປຸງກົດລະບຽບຂອງບ້ານໄດ້ 12 ບ້ານ, ຮັບຂໍ້ຂັດແຍ່ງທັງໝົດ 2 ເລື່ອງ, ໄດ້ກວດກາ, ຢັ້ງຢຶນຄວາມຖຶກຕ້ອງຂອງສັນຍາ ແລະ ເອກະສານປະເພດຕ່າງໆໄດ້ 535 ສະບັບ ແລະ ວຽກງານຈັດຕັ້ງປະຕິບັດວຽກງານຄໍາຕັດສິນຂອງສານປະຕິບັດສໍາເລັດ 13 ເລື່ອງ, ຄະດີແພ່ງ 6 ເລື່ອງ, ອາຍາ 7 ເລື່ອງ; ຈາກນັ້ນ ໃນກອງປະຊຸມຍັງໄດ້ມີການສະເໜີແລກປ່ຽນບັນຫາທີ່ພົບຄວາມຫຍຸ້ງຍາກໃນການຈັດຕັ້ງປະຕິບັດວຽກງານໃນໄລຍະຜ່ານມາ ເພື່ອຊອກຫາວິທີແກ້ໄຂ ເຮັດໃຫ້ວຽກງານຂອງພະແນກຍຸຕິທຳແຂວງ ໄດ້ຮັບການຈັດຕັ້ງປະຕິບັດຢ່າງມີປະສິດທິພາບກວ່າເກົ່າ.
ຕອນທ້າຍ ທ່ານ ຄຳຟອງ ອິມມານີ ຮອງເລຂາຄະນະບໍລິຫານງານພັກແຂວງ ໄດ້ມີຄຳເຫັນໂອ້ລົມ ທ່ານໃຫ້ໄດ້ຮູ້ເຖີງຄວາມສຳຄັນຂອງວຽກງານໃນຂົງເຂດວຽກງານຍຸຕິທຳຢ່າງເລິກເຊິ່ງ, ພ້ອມທັງ ສະແດງຄວາມຍ້ອງຍໍຊົມເຊີຍຕໍ່ການນຳຂອງພະແນກຍຸຕິທຳແຂວງ ແຕ່ລະຂັ້ນທີ່ໄດ້ເອົາໃຈໃສ່ຊີ້ນໍາ-ນໍາພາ ວຽກງານເຫັນວ່າມີຜົນສຳເລັດຫລາຍດ້ານ, ເຖິງຈະພົບບັນຫາຫຍຸ້ງຍາກແຕ່ມີຄວາມຮັບຜິດຊອບສູງສາມາດຈັດຕັ້ງປະຕິບັດຫລາຍໜ້າວຽກ, ໂອກາດ ນີ້ທ່ານຍັງໄດ້ເນັ້ນໝັກໃຫ້ສືບຕໍ່ສືກສາອົບຮົມການເມືອງແນວຄິດໃຫ້ພະນັກງານ-ລັດຖະກອນໃຫ້ມີຄວາມໜັກແໜ້ນ, ເອົາໃຈໃສ່ໃນແບບແຜນວິທີເຮັດວຽກ, ວິທີນຳພາໃຫ້ລະອຽດອ່ອນຢ່າງທ່ຽງທໍາ, ຮັກສາຄວາມມັກຄີພາຍໃນ, ປະຕິບັດລະບຽບກົດໝາຍເຂັ້ມງວດ ແລະ ຊອກຮູ້ຮ່ຳຮຽນເອົາບົດຮຽນໃໝ່ໆ ເພື່ອໝູນໃຊ້ເຂົ້າໃນວຽກງານວິຊາສະເພາະໃຫ້ມີຄຸນນະພາບສູງຂື້ນກວ່າເກົ່າ.
ຂ່າວ ວັນນີ ແຝງບົວວັນ